Video

Rubrikat

Komunikata per shtyp & Njoftime

Sekretet e aromave të Hermesit

6/30/2012 9:20:27 AM

Ponç frutash në bostan

nga Brunhilda Çela

Gatuaj me ne Për këtë ponç na duhet:
1 bostan mesatar
1 verige rrush i bardhë
1 verige rrush i zi ose 1 filxhan boronica pylli
4 pjeshkë por jo të pjekura shumë
4 nektarina gjithashtu jo të qullëta
4-6 zerdeli kjo varet nga madhësia e zerdelisë
1 dorë qershi të qëruara nga bërthamat
2 vazo të vogla qershi për coctail (kjo blihet e gatshme janë qershi të aromatizuara me erë bajame në shurup sheqeri)
kunja druri për zbukurimin jashtë
2 gota konjak
3 lugë sheqer ose jo, unë e bëra pa sheqer pasi kompostoja ka sheqerin e vet edhe lëngu i qershive për coctail gjithashtu po nëse dikujt i pëlqen pak e ëmbël i vë edhe sheqer.
1 kuti komposto të përzier ananas, dardhë....
2 gota verë aromatike pak të ëmbël
ca mjedra per ne fund
ca mjedra për zbukurim
pak rrush serezi
ca qershi me dega për zbukurimet përjashta
2 limona
1 shishe verë me gaz ose shampanjë ose prosecco
copa akulli ose akulli që bëhet nga lëngu i bostanit

Përgatitja: Në fillim frutat e pastruara i presim sipas dëshirës në copa dhe i vemë në një tas të thellë. Rrushit unë ja heq bërthamat, e pres në dysh dhe ja heq një nga një, ose merrni rrush pa fare. Por kur rrushin e pret me dysh nxjerr më shumë lëng.

Pjeshkës gjithashtu ja heq lëkuren ndërsa kajsisë jo patjetër, varet edhe prej llojit. Unë kisha në fakt zerdeli të vogla dhe i vura me gjithë lëkurë. Shtojme aty edhe komposton, sheqerin (nëse do i hidhni) dhe konjakun. I lemë gjithë natën ashtu në lëngun e vet.

Të nesërmen në mëngjes hedhim edhe veren aty tek frutat dhe e fusim përsëri në frigorifer. Ndërkohë merremi me zbukurimin e bostanit. Unë e preva, e qërova nga brenda dhe rreth e qark e preva zig-zag. Pastaj me ndihmën e kunjave të drurit bëjmë zbukurimet anash per këtë ju ndihmojnë fotot.

Lëngun e shalqirit e shtrydha dhe e futa në format e akullit. Në fund kur të jemi gati e servirim duke e hedhur në bostan me copat e akullit prej lëngut të bostanit ose edhe me akull të zakonshëm. Kujt i pelqen mund t'i verë edhe ca gjethe bar blete brenda.

Përpara se ta servirni dhe ta ndani në gotat e ponçit shtoni aty edhe shampanjën (proseccon apo verën me gaz) të ftohte nga frigoriferi.

Është shumë e shijshme, freskuese dhe ka shume sy. Ketë recete e kam krijuar vetë para 12 vjetëve, për herë të parë e kam bërë për ditëlindjen e djalit të madh (23 Qershor), ku frutat janë me bollëk. Gjithmonë çdo vit për ditëlindje përsëritet. Receta e parë u bë me fruta lloje-lloje, me pak nektar frutash në formën e një sallate me fruta. Kuptohet pa Alkohol, pasi ditëlindja festohej me fëmijët e klasës, te them të drejtën me këtë nderohesha se kishte shumë pamje të bukur dhe fëmijët e pëlqenin.

Herë pas here e ndryshoj me fruta të ndryshme dhe zbukurimet jashtë i bej shpesh me frutin yll karambula (këtë vit nuk mu ndodh) apo me feta portokalli, rrush serezi etj etj. Gjithashtu brenda ndonjëherë i ve komposto mandarinash, lëng portokalli pak lëng limoni etj etj. Përdorni fantazite tuaja dhe frutat që ju ndodhen dhe do të shihni që do nderoheni, sidomos nëse do keni një festë a një party veror në kopësht.