Video

Rubrikat

Komunikata per shtyp & Njoftime

Sekretet e aromave të Hermesit

6/22/2012 9:53:27 AM

E drejta e Bashkimit Europian

Ky punim mbart në vetvete ambicien për të dhënë një kontribut në njohjen e rendit juridik aktual dhe funksionimit të tij

TIRANE - Libri “E drejta e Bashkimit Europian” u drejtohet kryesisht të gjithë atyre që dëshirojnë të studiojnë të drejtën komunitare në kuadrin e studimeve universitare ose profesionale. Ky punim mbart në vetvete ambicien për të dhënë një kontribut në njohjen e rendit juridik aktual dhe funksionimit të tij. Qëllimi i këtij botimi është që argumentet dhe problematikat, por, mbi të gjitha, të drejtat të shihen nga këndvështrimi i individit, me qëllim që të njihet me rendin juridik të BE-së. Shumë shpejt të drejtat dhe detyrimet që rrjedhin nga ky sistem do të na prekin në mënyrë të drejtpërdrejtë ndaj duket oportune paraqitja e tyre në kuadër të mbrojtjes të së drejtave drejtpërdrejt dhe me thjeshtësi.

Synimi nuk është ta sjellim të plotë këtë fushë, por të hartojmë një tekst universitar, në mënyrë që studentët të mësojnë se si funksionon BE-ja, si janë ndërtuar dhe si funksionojnë institucionet komunitare, cilat janë politikat e Bashkimit Europian dhe si aprovohen këto politika, si merren vendimet dhe si implementohen ato.

Në këtë libër paraqiten aspekte që nga ideja e krijimit të një Komuniteti Europian e deri te ndryshimet më të fundit të Traktatit të Lisbonës. Trajtohet historiku i integrimit europian që në fillesat e tij, plani Marshall për Europën e pas Luftës së dytë Botërore, formimi i Komunitetit Europian deri te krijimi i Bashkimit Europian i ditëve të sotme. Në këtë drejtim një vëmendje e veçantë i kushtohet institucioneve të BE-së, analizës së detajuar të rolit, përbërjes dhe funksionit të tyre.

Për Bashkimin Europian, integrimi është një pjesë shumë e rëndësishme që ka të bëjë me përcaktimin e fushave të ndryshme si ekonomike, politike, monetare, të shtetësisë europiane dhe, së fundmi, me garantimin dhe respektimin e të drejtave dhe lirive themelore. Në një këndvështrim tjetër tregohet dhe roli i rëndësishëm që politika dhe presionet e Shteteve anëtare kanë luajtur në etapat e ndërtimit të një Europe të suksesshme që shohim në ditët e sotme.

Shihet gjithashtu sesi janë bërë të mundura zgjerimet, krijimi i një politike të jashtme dhe të sigurisë së përbashkët si dhe krijimi i një hapësire për liri, siguri dhe drejtësi. Një rol të rëndësishëm në këtë punim ka dhe studimi i hollësishëm i burimeve të së drejtës në BE, studimi i akteve juridike, klasifikimi, duke filluar nga e drejta e origjinës (parësore) pra, ajo që rrjedh drejtpërdrejt nga normat e Traktateve dhe ajo e akteve dytësore (të prejardhura) si rregulloret, direktivat, vendimet, rekomandimet dhe opinionet.

Më tej paraqitet një panoramë e përgjithshme e katër lirive themelore që garantohen dhe respektohen në BE, të sanksionuara nga Traktatet. Në këtë mënyrë, analizohet liria e qarkullimit të mallrave, të personave, shërbimeve dhe kapitaleve, duke e vënë theksin jo vetëm në një bashkim ekonomik dhe monetar ku lëvizja e personit shihej si një transferim i të “mirave materiale” por në një Europë ku politikat për zbatim merren duke e përqendruar vëmendjen pikërisht tek individi dhe sa më afër tij.

Në pjesën e fundit, analizohen marrëdhëniet e Shqipërisë me Bashkimin Europian. Do të paraqitet një panoramë e përgjithshme e hapave të para të këtyre marrëdhënieve, etapat që kanë kaluar si dhe situata aktuale në të cilën ndodhet vendi ynë në kuadër të procesit të integrimit.