1/27/2012 5:38:20 PM

Probleme në disa vende ballkanike

Moti i keq vështirëson qarkullimin ajror dhe tokësor, zona të bllokuara dhe pa energji elektrike

BUKURESHT- Një numër i madh i vendeve ballkanike është përfshirë nga moti i keq në dëborë, çka ka shkaktuar çrregullime në komunikacion në rajonet malore, ndërkohë që shumë zona janë të shkëputura nga bota.

Moti i keq ka përfshirë veçanërisht Rumaninë, Bullgarinë dhe pjesë të Bosnje-Hercegovinës dhe Serbisë, ku në disa vende është vendosur edhe gjendje e jashtëzakonshme për të ndihmuar qytetarët, të cilët kanë mbetur pa energji elektrike dhe pa ujë.

Në Rumani, në disa zona të caktuara është angazhuar edhe ushtria për të ndihmuar qytetarët e ngujuar dhe për të pastruar rrugët. Në disa pjesë të Rumanisë është çrregulluar edhe komunikacioni rrugor dhe ai hekurudhor.

Në pjesën perëndimore të Bullgarisë, për shkak të motit të keq dhe të shtresës së lartë të dëborës, që shkaktoi ndërprerje në linjat e tensionit të lartë, mbi 50 000 qytetarë janë pa energji elektrike. Komunikacioni ajror po zhvillohet me vonesa, ndërkohë që pista e aeroportit të Sofjes pastrohet çdo gjysmë ore.

Në Bosnje-Hercegovinë, në Han Pijeska është shpallur gjendje e jashtëzakonshme për shkak të shtresës së lartë të dëborës. Dëbora, që bllokoi rrugët në rajonet malore në Serbinë Jugore dhe Lindore, shkaktoi vështirësi në mënjanimin e defekteve në rrjetin elektrik dhe shumë rajone në këto pjesë të vendit mbetën pa energji elektrike. //HermesNews - © 2012//

Ornela Kadaifçiu

Dërgo me email | Stampo artikullin | Artikulli është lexuar 14 here