1/26/2012 3:55:57 PM

Qofte zgarë me bukë pite dhe salcë kosi

Menunë e sotme e shoqëruam me çaj jasemini

Gatuaj ne me Të mërkurave e kam pushim pothuajse gjithmonë, prandaj planifikoj te gatuar diçka që më merr dhe pak më shumë kohë, por ja vlen, sidomos kur shikoj sytë e fëmijëve që ndrijnë nga kënaqësia e ushqimit të mirë, aromave të guzhinës, tavolinës së shtruar me delikatesë.



















Tek e fundit është detyra e nenave, të kënaqin fëmijët dhe t'i krijojnë ambjent të qetë dhe të ngrohtë kur munden, pasi shpesh herë vijnë të lodhura, të stresuara dhe dashje-padashje u përcjellin stresin dhe fëmijëve.Kam vënë re, ditët që jam pushim dhe e çlodhur dhe ata janë të qetë.

Sot menuja ime ishte qofte zgare, me buke pite të bërë vetë dhe salcë kosi. Bëra dhe një supë me trahana, pak të modernizuar. Recetën e supës së trahanasë do ua nxjerr herë tjetër. Menunë e sotme e shoqëruam me çaj jasemini, pasi na ka zënë pak rrufa. Caji i jaseminit është shumë i shijshëm dhe aromatik dhe ka një veprim relaksues në trupin tonë. Me lulen e jaseminit une bëj shurup dhe një parfe, por këto do ua tregoj kur të jetë koha e lules së jaseminit.
Sot gjithashtu mendova ta dekoroj tavolinën me trëndafilin e dëborës dhe ca dega artificiale me lule të bardha. Pasi mbarova tavolinën, piva nja dy filxhana çaj jasemini dhe ju përvesha punës. Në filllim bëra supën gati dhe pastaj fillova me të tjerat.
Receta e qofteve:
- Mish viçi të grirë tul 400 gr
- Mish qingji të grirë tul 400 gr (ose merrni vetëm mish viçi)
- 60 gr dhjamë qengji ose lope (dhjami i bën të shkrifeta qoftet dhe gjatë pjekjes dhjami kullon)
- 2 qepe
- 1 lugë gjelle jo me maje kripe
- 1 lugë kafeje plot piper te zi
- 1 lugë kafeje piper te kuq djeges nga ai me fara
- 1 lugë çaji plot piper te kuq
- 1 lugë çaji rigon
- 1 majë luge kafeje sodë buke
- 2 lugë gjelle miell

Qoftët e zgarës unë i bëj pa hudhra, pa vezë, pa bukë. Por ju mund t'i vini sigurisht dhe hudhër nëse dëshironi, por nuk është e nevojshme tek qoftet e zgarës. Në një tas hedh mishin e grirë, dhjamin, të gjitha erëzat. Rigonin e shtyp në havan guri me kripën që të bëhet i imët, por, jo se duhet patjetër. I përziej të gjitha bashkë, u shtoj dhe qepën e grirë. Masën e përziejmë dhe e mbulojmë me një folie. E lëmë në frigorifer të pushojë dhe ndërkohë merremi me brumin e bukëve pite.

Për brumin e bukeve pite nëse do bëni 12 copë ju duhet:-


- 1 kg miell
- 1 kos 250 ml
- 2 pako maja pluhur
- Një lugë e vogël kafeje sodë buke
- Uje të vakët rreth 400 ml
- Kripë një lugë çaji


Në një tas hedhim miellin. Shtojmë kripën me sodën dhe i përziejmë. Hedhim dhe majanë, shtojmë kosin dhe ujin duke i zënë brumë që e lemë tv pushojë i mbuluar me një pecetë të lagur derisa të dyfishohet masa.

Ndërkohë bëjmë edhe salcën e kosit:

Për këtë salcë mora:

- 1 kos të trashë grek 300 ml
- 2 thelba hudhër të shtypur
- Një lugë kafeje jo plot kripë

Pak vaj ulliri, koper të grirë, mund t'i vini edhe menderz të thatë (dhjozëm, nanaxhik). Pasi brumi erdhi e mora e punova dhe e ndava në kuleçë duke lyer sipërfaqen e punës me miell. Ndërkohë ndeza furrën të nxehet në 280 gradë. Bëra gjithesej 12 bukë ju mund ta përgjysmoni masën.


























Nxora brumin e qofteve nga frigoriferi dhe u dhashë formën e qofteve si cilindër jo të rrumbullaket as vezake. Qoftet nuk i bëra shumë të mëdha. Me dolën gjithesej 36 copë.

I lashë qoftet ashtu dhe vazhdoj të merrem me kuleçët e bukës. I hapa me pec rreth një pëllëmbë diametri, i lyeva sipër me të verdhë veze përzier me pak qumësht. Shtova sipër dhe ca fara lini dhe susami dhe i vura për të pjekur. Bukët piqen shumë shpejt kur furra ka arritur temperaturën, rrini aty mos ikni, mua më zgjati rreth 7 min pjekja.

Tërë sekreti i këtyre bukëve është temperatura e lartë e furrës dhe shpejtësia e pjekjes. Sidomos në furrë druri, bëhen akoma më të mira(kështu i bëj kur shkoj tek mamaja ime në Graz atje i kam të gjitha kushtet e gatimit me zjarr, furrë druri, sac).

Ato fryhen shumë dhe unë i pres në mes me thikë jo deri në fund i jap formën e një xhepi dhe fëmijët i mbushin me ç'të duan, në rastin e sotëm me qofte zgare. Bukët e nxjerra nga furra i vë nje mbulesë pambuku dhe i mbështjell. Ashtu ato rrinë të buta.


























Në fakt i vogli i do të porsanxjerra: është kërc nga jashtë dhe i butë nga brenda. Tani erdhi koha të merrem me qoftet.

Ndeza zgarën elektrike (në verë i bëj jashtë) dhe vura aty qoftet për të pjekur duke i kthyer nga të gjitha anët. Kur u poqën e fika zgarën, i mbulova me kapak dhe i lashë të pushojnë pak përpara se ti servir. Ndërkohë griva domaten në feta, një gjysëm kastraveci pak qepe, sallatë jeshile (kisha disa lloje sallatash) dhe i servira të gjitha në tavolinë. I mbushëm vete sipas dëshirës. Unë qofteve sipër u vë dhe një përzierje speci djegës (nga ai i ashpri me fara) dhe rigon. //HermesNews - © 2012//



























* Autorja punon farmaciste në Austri: hobi i saj është gatimi, fotografia dhe dekorimet: recetat mund t'i shikoni dhe në profilin e saj facebook-ut "Të gatuajme së bashku"

Brunhilda Cela

Dërgo me email | Stampo artikullin | Artikulli është lexuar 132 here