1/23/2012 6:09:43 PM

BE sanksione të reja për Sirinë

Damasku kundërshton planin arab, e quan ndërhyrje në punët e brendshme

BRUKSEL - Bashkimi Evropian miratoi sot sanksione të reja kundër Sirisë. Burime diplomatike thonë se, këto sanksione godasin 22 anëtarë të aparatit të sigurisë dhe tetë organizata të tjera, për shkak të vazhdimit të represionit.

Bëhet fjalë për serinë e 11-të të sanksioneve që synojnë personalitete ose entitete, të cilëve u janë bllokuar pasuritë dhe u janë ndaluar vizat në Evropë. Këto masa prekin tashmë rreth 150 persona dhe organizata të lidhura me regjimin e Bachar al-Assad.

Vendimi u mor nga ministrat e jashtëm evropianë të mbledhur në Bruksel. Emrat e personave dhe entiteteve të reja do të publikohen të martën në fletoren zyrtare të BE-së.

"Jemi shumë të shqetësuar për situatën në Siri", deklaroi shefja e diplomacisë së BE-së, Catherine Ashton, përpara mbledhjes. "Bëjmë thirrje përsëri për ndalimin e dhunës dhe që vëzhguesit e Lidhjes Arabe të mund të kryejnë detyrën pa pengesë", shtoi ajo.

Po sot, Damasku kundërshtoi kategorikisht planin e ri arab për një zgjidhje të krizës që parashikon transferimin e pushtetit të presidentit Assad tek zëvendësi i tij dhe krijimin e një qeverie të unitetit kombëtar.

Një zyrtar i cituar nga televizioni zyrtar sirian e cilësoi atë si "ndërhyrje flagrante në punët e brendshme të vendit". hermesnews - © 2012

Ornela Kadaifçiu

Dërgo me email | Stampo artikullin | Artikulli është lexuar 20 here