Video

Obama, SHBA të rrisin besimin

Kohëzgjatja: 0:0

Pare 3603 here

On line 1093 dite

video »

Rubrikat

Komunikata per shtyp & Njoftime

1/21/2012 12:09:46 PM

Barnat e reja te rimbursueshme

Institutit të Sigurimeve të Kujdesit Shëndetësor publikon listën e barnave të rimbursueshme për vitin 2011-të

TIRANË - Lista e Barnave të Rimbursuara (LBR), një nga elementët më të rëndësishëm të punës së Institutit të Sigurimeve të Kujdesit Shëndetësor, është në proçes të vazhdueshëm ndryshimesh sa i takon shtimit të numrit të barnave të përfshira, si dhe në rishikimin e përvitshëm të çmimeve të tregtimit të tyre, por dhe marzheve të tregtimit. LBR, nga viti në vit, ka pësuar ndryshime duke shtuar numrin e barnave të rimburueshme, zgjeruar kategoritë përfituese, etj.

“Gjatë vitit 2011, shpenzimet e rimbursimit të barnave u rritën ndjeshëm, për shkak të zgjerimit të skemës, çmimeve më të larta të barnave, rritjes së kursit të këmbimit të euros dhe disa faktoreve të tjerë. Qeveria ndërhyri duke aplikuar marzhe më të ulëta dhe rrjedhimisht çmime më të ulëta për barnat. Kështu, ne bëmë të mundur që të mjekohen një numër më i madh pacientësh nga muaji në muaj”, tha drejtoresha e ISKSH-së, Elvana Hana. Sipas saj, grupi i pacientëve që trajtohen me barna të shtrenjta, ka qene ai grup që ka përfituar nga ulja e marzheve.

“Politikat e Qeverisë për uljen e çmimit te barnave kanë bërë të mundur mbajtjen e fondit te rimbursimit në nivelin e miratuar dhe rimbursimin e më shumë barnave e si rrjedhim, përfitimin e tyre nga një numër më i madh pacientësh brenda të njëjtës kosto”, tha Hana.

Sot, sipas Hanës, numërohen 420 barna në listën e rimbursimit me një vlerë prej 6.9 miliardë lekë, duke dyfishuar përfitimet e pacientëve, krahasuar me vitin 2006.

Sa i takon Listës së Barnave të Rimbursueshme për vitin 2012, drejtori i Politikave Shëndetësore në Ministrinë e Shëndetësisë, Pëllumb Pipero tha se kjo listë është në diskutim e sipër. “Po shikojmë sa kushton LBR në raport me buxhetin. Po diskutohet nëse do fusim alternativa të reja dhe, në rast se nga ulja e çmimeve do të krijohen hapësira për barna të reja”, tha Pipero.

Kategoritë që kanë përfituar më shumë nga skema e rimbursimit të barnave janë pensionistët, invalidët, veteranët, etj. Aktualisht në shpenzimet e rimbursimit të barnave, këto kategori zënë rreth 90% të shpenzimeve totale të rimbursimit.

Nga skema e sigurimeve Shëndetësore, përfitojnë rimbursim 100 % pensionistët, veteranët, invalidët e plotë të punës, invalidët e luftës, të sëmurët me CA, me TBC, fëmijët 0-12 muaj, si dhe jetimët. Aktualisht, ISKSH e ofron shërbimin e barnave të rimbursuara nëpërmjet 752 farmacive dhe agjencive të kontraktuara (590 + 162 ), si edhe përmes 84 depove farmaceutike (42 importuese dhe 42 distributore).

- Lista e Barnave të Rimbursueshme 2011 -

LBR 2011, u pasurua me 11 alternativa të reja, nga të cilat disa formëdoza barnash që trajtojnë sëmundje kronike, duke krijuar kështu mundësinë e një dozimi më të mirë dhe më efikas për pacientët. Këto barna të reja përdoren për mjekimin e anemisë tek të sëmurët me veshka, për diabetikët, të sëmuret e pneumologjise, kardiologjise, okulistikes etj. Ne total lista e barnave te rimbursueshme 2011 permban 420 barna nga 409 qe ishte ne vitin 2010 (ose 236 principe active).

ISKSH mori përsipër këtë vit edhe mbulimin e TVSH 10% për barnat e rimbursueshme, duke mos cënuar në asnjë rast pacientët.

- Lista e Barnave të Rimbursueshme 2010 -

LBR 2010 u pasurua me 17 barna të reja krahasuar me vitin 2009, nga të cilat disa formëdoza barnash që trajtojnë sëmundje kronike, duke krijuar mundësinë e një dozimi më të mirë dhe më të përshtatshëm për pacientët. Këto barna përdoren për mjekimin e anemisë në insuficiencën renale kronike; diabetit, sëmundjeve pulmonare (të mushkërive), apo dhe të CA (kancer).

Në barnat e reja të shtuara në LBR 2010, përfshihen formë-doza të reja të barnave të listës që përmirësojnë cilësinë e shërbimit, si dhe alternativa mjekuese dhe kombinime të reja të barnave të listës. Të dhënat nga ISKSH tregojnë se për këtë vit pritet të shpenzohen rreth 5.8 miliardë lekë për LBR, që përbën 22.6 % të buxhetit total të ISKSH, nga 4,8 miliardë lekë për vitin 2009 dhe 4.2 miliardë lekë në vitin 2008.

Vlera e rimbursimit këtë vit vetëm për kategoritë e pacientëve që trajtohen me barna të shtrenjta parashikohet të kapë shifrën e 1,1 miliard lekë, ose rreth 18 % të shpenzimeve totale të LBR nga ISKSH.

- Lista e Barnave të Rimbursueshme 2009 -

LBR e vitit 2009 përmban 405 barna (nga 377 barna në 2008), që janë 233 principe aktive (221 në 2008), apo 944 alternativa tregtare. Në këtë listë janë shtuar 74 alternativa tregtare barnash. Përfshirja e barnave të reja për trajtimin e diagnozave të reja rriti vlerën mesatare të recetës. Kjo listë ka përmirësim të ndjeshëm në përmirësimin e mjekimit të diagnozave të trajtuara dhe më parë, si dhe janë shtuar barna që trajtojne diagnoza të pa mbuluara, si Leucemia mieloide Kronike, si dhe Infeksionet e shkaktuara nga CitoMegaloVirus ne transplantet renale, që tashmë bëhen dhe në vendin tonë. Në total për vitin 2009 përfituan medikamente të shtrenjta rreth 835 pacientë, me vlerë rimbursimi prej 743 milion lekë, ose 15.8% të vlerës totale të rimbursimit.

- Lista e Barnave të Rimbursueshme 2008 -

LBR e vitit 2008 përmbante 377 barna, apo 865 alternativa tregtare, që përbëjnë 222 principe aktive. Në këtë listë u zëvendësuan 5 barna të listës me 5 formë-doza të tjera të të njëjtave principe aktive, në përshtatje me tregun farmaceutik (për shkak se ato nuk prodhohen më nga firmat prodhuese farmaceutike). Nga lista u hoqën 9 alternativa barnash, të cilat po kështu nuk prodhohen, apo nuk importohen më në Republikën e Shqipërisë. Ndërkohë, janë shtuar 24 barna të reja, nga të cilat 6 janë principe të reja aktive. E rëndësishme për këtë liste është përfshirja e Insulinave analoge, që sollën përmirësim në trajtimin e të sëmurëve diabetikë.

- Lista e Barnave të Rimbursueshme 2007 -

LBR e vitit 2007 përmbante 362 barna, apo 824 alternativa tregtare, që përbëjnë 220 principe aktive. Në këtë listë janë shtuar 14 barna, 13 principe aktive, ndërsa u hoqën dy barna, si dhe u bë ndryshim i formë-dozave të 6 barnave në përshtatje me ato që qarkullonin në treg.

- Lista e Barnave të Rimbursueshme 2006 -

LBR për vitin 2006 përmbante 355 barna, apo 748 alternativa tregtare, që përbëjnë 207 principe aktive. Po kështu, duke u mbështetur në klasifikimin ndërkombëtar të sëmundshmërisë kronike, ndërmjet klasave të sëmundjeve që janë 16 të tilla, LBR 2006 mbulon trajtimin e 15 klasave (bën perjashtim klasa e XV, që trajton sëmundjet perinatale), që përbën 94% të sëmundshmërisë kronike.

Është e rëndësishme të theksohet që si rrugë e mundshme për mbulimin e defiçitit financiar të ISKSH-së, që u krijua nga rritja e shpenzimeve të rimbursimit gjatë vitit 2005, rreth 10 milion $, u pa ulja e marzheve të tregtimit të barnave me shumicë dhe me pakicë, duke aplikuar përkatësisht marzhet 12% për tregtimin me shumicë dhe 29% për tregëtimin me pakicë (nga 18% dhe 33%). Gjithashtu, për barna të caktuara “të shtrenjta“, me vlerë financiare të konsiderueshme, u aplikuan marzhe të diferencuara në tre nivele ( 8%-15% ;10%-20% ;12%-24% ), sipas vlerës mesatare për recetë me këto barna.