Video

Obama, SHBA të rrisin besimin

Kohëzgjatja: 0:0

Pare 3603 here

On line 1093 dite

video »

Rubrikat

Komunikata per shtyp & Njoftime

1/10/2012 4:40:06 PM

A të ndihmon aspirina me doza të volga ?

Aspirina tregon zvogëlim me 10 % të rrezikut të sëmundjes kardiovaskulare, por nuk çojnë në një rënie të dukshme të numrit të vdekjeve të shkaktuara nga një atak kardiovaskular ose nga një kancer

LONDËR - Rreziqet që paraqet marrja çdo ditë e një doze të vogël aspirine nga persona pa sëmundje kardiovaskulare janë më të mëdha se sa përfitimet për parandalimin e një ataku kardiak, tregon një studim i publikuar sot në revistën e specializuar "Archives of Internal Medecine".

Studimi i kryer nga shkencëtarë britanikë të Universitetit të Londrës shqyrtoi të dhënat e 100 000 pjesëmarrësve në nëntë prova klinike.

Rezultatet tregojnë një zvogëlim me 10 për qind të rrezikut të sëmundjes kardiovaskulare, por nuk çojnë në një rënie të dukshme të numrit të vdekjeve të shkaktuara nga një atak kardiovaskular ose nga një kancer.

Përkundrazi, marrja e rregullt e aspirinës në doza të vogla sjell një rrezik 30 për qind më të lartë të hemorragjive të brendshme që vënë në rrezik jetën e pacientit.

Studimi del në përfundimin se për pacientë me shëndet të mirë, pa patologji kardiake të zbuluara, marrja e aspirinës në doza të vogla sjell më tepër rrezik se sa të mira.

Marrja e aspirinës për një kohë të gjatë mund të sjellë hemorragji të tipit ulçer, por edhe gjakrrjedhje nga sytë.

"Efekti pozitiv i aspirinës për parandalimin e sëmundjeve kardiovaskulare për persona të prekur nga ataket ose AVC (accident vasculaire cérébral) është i padiskutueshëm", theksoi doktor Rao Sehasai, i Universitetit Saint George të Londrës, duke i nxitur këta pacientë për vazhdimin e kurës.

"Por, përfitimet për persona që nuk i kanë këto probleme janë shumë më të vogla nga sa mendohej dhe një trajtim me aspirinë mund të sjellë rrezik për dëme të mëdha si pasojë e gjakrrjedhjeve", shtoi ai.

Gjithashtu studimi nuk vërtetoi se aspirina mund të parandalojë vdekjen nga kanceri. Disa studime të mëparshme të publikuara në "The Lancet" kanë treguar efektet mbrojtëse të aspirinës kundër disa kancereve të zakonshëm si ai i zorrës së trashë, i prostatës dhe i mushkërive.