12/19/2011 10:23:31 AM

Shqipëria marëveshje me San Marinon në fushën e shëndetsisë

Zyra e Shtypit e MSH njoftoi sot se në takim u konfirmua dhe një herë raporti i veçantë i miqësisë që lidh dy popujt, një miqësi e cila daton shekuj më parë

TIRANË - Shqipëria dhe Republika e San Marinos do të bashkëpunojnë në fushën e shëndetësisë, marrëveshja për konkretizimin e së cilës pritet të nënshkruhet së shpejti në Tiranë.

Ministri i Shëndetësisë, Petrit Vasili, zhvilloi ditet e fundit një vizitë pune në Republikën e San Marinos, gjatë së cilës është takuar me Sekretarin e Shtetit për Shëndetësinë, Claudio Podeski.

Zyra e Shtypit e MSH njoftoi sot se në takim u konfirmua dhe një herë raporti i veçantë i miqësisë që lidh dy popujt, një miqësi e cila daton shekuj më parë.

Të dy ministrat, pasi kanë analizuar sistemet shëndetësore të të dyja vendeve, kanë rënë dakord për të zhvilluar më tej një marrëveshje mirëkuptimi, e cila pritet të firmoset gjatë vizitës që Sekretari i Shtetit Podeski, pritet të zhvillojë në Shqipëri.

Një marrëveshje e tillë do të hapë mundësitë e një bashkëpunimi më të gjerë në fushën e shëndetësisë, trajnimin e profesionistëve dhe projekte të përbashkëta kërkimi në fusha të veçanta.

Gjatë vizitës së Podeskit në Tiranë, pritet të diskutohet dhe mundësia e njohjes së titujve dhe diplomave të mjekëve dhe infermierëve. Me detajet e një marrëveshje të tillë do të merret një komision bilateral pas miratimit të një akordi të tillë nga dy qeveritë përkatëse.

Në fund të vizitës nga të dy ministrat është parë e nevojëshme fikësimi i takimeve periodike në mbështjete të vullnetit të bashkëpunimit mes dy vendeve në fushën e shëndetësisë.

HermesNews - © 2011

Dërgo me email | Stampo artikullin | Artikulli është lexuar 47 here