5/30/2010 6:37:38 PM

Shpallen fituesit e edicionit të katërt të Çmimit AIITC

Rreth 90 studiues, artistë dhe personalitete të ndryshme konkurruan midis tyre për të fituar çmimin e madh për tre kategoritë, pikërisht për librin më të mirë në fushën e shkencës dhe të kulturës islame, për pikturën më të mirë dhe për krijimtarinë më të mirë për moshat e reja.

Instituti Shqiptar i Mendimit dhe i Qytetërimit Islam (AIITC) shpalli paraditen e së shtunës në një ceremoni festive të zhvilluar në Hotel "Rogner", fituesit e çmimeve “AIITC 2009”. Rreth 90 studiues, artistë dhe personalitete të ndryshme konkurruan midis tyre për të fituar çmimin e madh për tre kategoritë, pikërisht për librin më të mirë në fushën e shkencës dhe të kulturës islame, për pikturën më të mirë dhe për krijimtarinë më të mirë për moshat e reja.

Qëllimi kryesor i zhvillimit të këtij aktiviteti ishte stimulimi i krijuesve të talentuar në fushën e shkencës dhe artit në Shqipëri e në të gjitha trevat shqipfolëse. Vetë organizatori i këtij konkursi të përvitshëm dhe njëherësh drejtori i Institutit Shqiptar të Mendimit dhe të Qytetërimit Islam, Dr. Ramiz Zekaj, theksoi në fjalën e tij përshëndetëse se, “ Që prej katër vjetësh, Çmimi AIITC, i shpallur nga Instituti Shqiptar i Mendimit dhe i Qytetërimit Islam, ka nxitur dhe i ka dhënë vrull forcave krijuese në pasurimin e mëtejshëm të kulturës, artit dhe shkencës shqiptare.

Kultura islame vjen sot si dëshmi e gjenialitetit dhe shpirtit artistik të kombit tonë. Me gjithë madhështinë dhe bukurinë e saj, kjo është ngjizur fort në trupin e kulturës shqiptare dhe ka pikturuar jetën materiale e shpirtërore ndër shekuj të shqiptarëve. Veprat e kulturës dhe të artit islam shqiptar, arkitektura islame, piktura islame, letërsia islame, muzika etj., vërtetë kanë ndikime nga kultura dhe arti i vendeve të origjinës, por kanë edhe dallimet dhe origjinalitetin e tyre. Dhe pikërisht këtë origjinalitet vlerëson edhe juria profesioniste për fushat përkatëse të konkurrimit”.

I pranishëm në ceremoninë e çmimeve “AIITC 2009” ishte edhe këshilltari i Ministrisë së Kulturës, Turizmit, Rinisë dhe Sporteve, shkrimtari Bardhyl Londo, i cili vlerësoi me tone pozitive punën e vyer që po bën AIITC-ja për motivimin e krijuesve shqiptarë në përgjithësi dhe për krijuesit e traditës së kulturës islame në veçanti. Ai nënvizoi faksin se, “Është e tepërt të flas për peshën, rëndësinë, seriozitetin dhe kulturën që ka qytetërimi islam në botë. Dihen vlerat e tij kulturore, shkencore, dihet pesha e tij në të katër anët e botës, por dihet sidomos pesha që ai ka në Shqipëri dhe në trojet ku jetojnë shqiptarët”.

Aktiviteti vijoi me tej me fjalën e drejtuesve të jurisë, përkatësisht të Prof. dr Xhevat Lloshit për librin shkencor, Prof. dr. Ali Osekut për pikturën dhe Prof. dr. Arjan Kadiut për krijimtarinë e moshave të reja.
Me “Çmimin AIITC 2009” u vlerësuan artistët, të cilët gjatë një viti më parë botuan libra në fushën e shkencës dhe kulturës islame, si dhe krijuan peizazhe. Gjithashtu, u vlerësuan dhe artistë të rinj, të cilët u paraqitën në këtë konkurs me botime të veçanta në poezi dhe prozë me temë: "E bukura në shpirt dhe në jetë".

Si libri më i mirë i botuar në vitin 2009 në fushën e shkencës dhe kulturës islame u vlerësua Fjalori “Arabisht-Shqip” me 70.000 fjalë, i ish-diplomatit Sulejman Tomçini. Ndërkohë, në këtë kategori me çmime inkurajuese u vlerësuan dhe librat e autorëve Edvin Cami "Gëtja mes Perëndimit dhe Misticizmit Oriental" si dhe libri "Ti, vetvetja dhe çështjet e tua", i autorit Avni Tafili.

Peisazhi më i bukur në penelet e piktorëve shqiptarë, nga 7 artistë pjesëmarrës, u përzgjodh ai i piktorit Orion Shima. Në kategorinë e krijimtarisë letrare të moshave të reja u vlerësua me çmimin e parë Ivana Dervishi me poezi. Ndërkohë, në këtë kategori u dhanë edhe katër çmime inkurajuese të rinjve Artur Deda, Fatime Zenelhasani, Stela Keta dhe Dorina Behari.

Për fituesin e vendit të parë në kategorinë “Libri më i mirë i vitit në gjuhën shqipe, që trajton tema në fushën e shkencës, artit dhe kulturës islame” u akorduan 3000 $, për kategorinë e pikturës u dha shpërblimi prej 1500 $ dhe për krijimtarinë e moshave të reja në prozë dhe poezi u akorduan 500 $. Gjithashtu, secili nga fituesit u nderua me medalje argjendi dhe me dëshmi motivuese.

Instituti Shqiptar i Mendimit dhe i Qytetërimit Islam (AIITC) prej 14 vjetësh funksionon si institucion i pavarur dhe ka një veprimtare të gjerë të karakterit shoqëror, kulturor dhe shkencor dhe gama e tyre shtrihet tek të gjitha grupmoshat.

“Çmimi AIITC” do të vazhdojë udhën e tij të përvitshme për të vijuar traditën e motivimit të krijuesve shqiptarë, por edhe për të mbushur hendekun e mungesës së kritikës në Shqipëri në gjykimin dhe vlerësimin e veprave shkencore e kulturore.

HermesNews - ©2010

Dërgo me email | Stampo artikullin | Artikulli është lexuar 130 here