3/20/2010 8:00:36 PM

Shushunjat e nje doktori

Ky emërtim ka ardhur natyrshëm për Meti Bizhgën nisur edhe nga ajo cfarë ai reklamon përditë efektet kurative në trupin e njeriut.

Piro Nase
20 Mars 2010

Pak-kush e di se shushunjat janë të dobishme për zhdukjen e disa sëmundjeve kryesisht të atyre me karakter sipërfaqësor. Ai që sot i'a di kimetin këtyre gjallesave ujore dhe njëkohësisht 'mik' i tyre, është një djalë 30 vjecar nga Gjirokastra i cili njihet si 'doktori i shushunjave' në qytet.

Ky emërtim ka ardhur natyrshëm për Meti Bizhgën nisur edhe nga ajo cfarë ai reklamon përditë efektet kurative në trupin e njeriut. Vendi ku ai ka zgjedhur të sfidojë shkencën e mjekësisë me metoda praktike, ndodhet në qendër të Gjirokastrës përballë farmacive qëndrore të qytetit, një simbolikë kjo rastësore e zgjedhur nga Meti duke mohuar fort se pozicioni i zgjedhur nuk është për t'i bërë karshillëk ofruesve të barnave.

Dita për të fillon me pastrimin e shushunjave dhe ndërrimin e ujit të tyre pasi kjo është e detyrueshme thotë ai për jetëgjatësinë e tyre. Ujin shushunjat e duan nga burimi dhe për këtë Meti përshkon një herë në javë 30 km rrugë deri në Ujin e Ftohtë të Tepelenës, ku ngarkon bidonat që mbajnë lëngun e jetëgjatësisë së larvave kuruese humane.

Tre herë në ditë u ndërrohet uji 300 shushunjave që ka në përdorim Meti ku për të, ato janë pjesë e familjes. Një rraskapitje e vërtetë është pastrimi i tyre nga gjaku që ato thithin nga pacientët-shprehet Meti.

Gjaku i lig që shushunjat grumbullojnë, hiqet me ngadalë nga ato me qëllim që të mos dëmtohen pasi për nga vetë natyra, larvat kuruese janë mjaft të brishta. Kam bërë 2000 km rrugë për t'i siguruar ato në Gjermani dhe për mua janë mjaft të shtrenta njësoj si një pjestar i familjes sime-shprehet Meti i cili nuk e fsheh dhembshurinë për to ndërkohë që mjaft njerëz i konsiderojnë shushunjat të panevojshme madje herë-herë të frikshme nga nami që kanë.

Për ata që i?a dinë vlerën atyre, afrohen tek Meti dhe pa pyetur fare për cmimin që servirin për seancat kurative, lënë orën e takimit. Një seancë zgjat gati 15 minuta dhe gjatë kësaj kohe shushunja vendoset në vendin ku trupi i njeriut paraqet probleme si prsh. në kupën e gjurit të këmbës dhe shpatull në rastet e mbledhjes së ujit, në rrëzë të kofshës, në organet gjenitale femërore apo mashkullore, në mpirje të gishtave të duarve dhe të këmbëve, trompozë të kaluar etj.

Pagesat për séancë variojnë nga 1000-5000 lek kjo në varësi të sipërfaqes që zë zona e infektuar apo e sëmurë. Shushunjat sipas Metit, kurojnë edhe të sëmurë me spondiliatrozë, dhimbje pas koke, reumatizëm, migrenë, sinozit, sëmundje të ndryshme lëkure, ndalim të hemoragjive sipërfaqësore si dhe mjaft infeksione të tjera të karakterit lokal.

Një episod ku Meti është ndjerë krenar në punën e tij, ka qenë ajo e një dite gushti këtë vit, kur katër parlamentarë norvegjezë të gjendur me pushime në Sarandë, provuan efektet kuruese të shushunjës. Parlamentarët norvegjezë kishin probleme me kycet e duarve dhe spondiliatrozë në pjesën e qafës dhe shushunjat arritën t'ja zhduknin dhimbjet atyre kundrejt seancave 15 minutëshe. Për këtë Meti, u shndërrua në personazh në dy media të vendit skandinav dhe kjo falë sensibilitetit të treguar nga politikanët norvegjezë.

Dy gazetarë nga vendi i largët, e patën takuar Metin dhe intervistuar për këtë veprim i cili për norvegjezët ishte i pabesueshëm dhe e padëgjuar më parë që shushunjat sfidojnë barnat e prodhuara nga kompanitë më të mëdha farmaceutike. Me anglishten time të calë, munda që të përcillja efektet kuruese të shushunjave për gazetarët norvegjezë të cilët edhe ata të shtyrë nga kurioziteti, u shndërruan dashur pa dashur në pacientë-vazhdon më tej Meti.

Sipas tij shushunja kur vendoset në trupin e njeriut, ky i fundit ndjen një pickim njësoj si të një djegije me majë gjilpëre dhe më pas, ajo qëndron e ngulur në të deri në thithjen e gjakut të ligë i cili clirohet falë aftësisë thithëse të saj. Séanca mbaron kur shushunja fryhet nga gjaku dhe bie në tokë. Gjaku që tërhiqet nga ajo është në varësi të dëmit që ka shkaktuar infeksioni apo sëmundja e ditur-shprehet Meti për gazetën Hermesnews i cili pohon se në Gjermani kishte mjaft njerëz që pastronin gjakun dy herë në vit me anë të shushunjave dhe kjo për t'a është natyrale.

Jam rritur në fshat dhe të parët e mij, i kanë provuar efektet e shushunjave në shërimin e sëmundjeve të ndryshme dhe kjo më shtyu të merresha me këtë 'zanat' shprehet Meti. Në mungesë të shushunjave në lumë, burime të ndryshme dhe vende të ndenjura në Gjirokastër, para një viti falë edhe njohjes që krijova me një mjek gjerman nga Hamburgu dy vjet më parë në plazh në Sarandë, ai më ndihmoi të shkoja tek laboratori ku punon me rritjen e këtyre specieve dhe të merrja afërsisht 300 shushunja-thotë Meti kundrejt një sasie të konsiderueshme eurosh.

Në Gjermani metoda e shërimit të infeksioneve të ndryshme dhe sëmundjeve me përdorimin e shushunjave apo lëngjeve që ato kanë në trupin e tyre, është e kudondodhur-shprehet Meti i cili e përdor gjithmonë këtë fakt tek skeptikët që e pyesin për efektet që sjellin shushunjat tek pacientët. Tek Meti kanë provuar të shkojnë edhe vetë mjekët në Gjirokastër të cilët nuk u kanë bërë dot derman me njohuritë që kanë, sëmundjeve apo infeksioneve të fituara gjatë jetës dhe kjo kryhet në konspiracion të plotë pasi ndryshe tek ta askush nga pacientët që vuajnë nuk do t?u trokasë në derë.


Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 904 here