3/9/2010 10:10:12 AM

Gjirokastër/ Bllokohen gjashtë kamionë me pleh organik

Burimet zyrtare policore, bëjnë të ditur për gazetën 'Hermesnews' se nga viti në vit jo vetëm në Lazarat, por edhe në të gjithë territorin e Qarkut të Gjirokastrës, është rritur forca goditëse ndaj kultivimit të bimëve narkotike.

Piro Nase
9 Mars 2010

GJIROKASTËR - Lazaratasit u bllokohen që në embrion mundësitë për kultivimin e hashashit. Aksioni i fundit i Policisë së Gjirokastrës, flet për gjashtë kamionë të bllokuar me pleh organik me destinacion zonën e sipërme të fshatit.

Plehu organik i cili nuk arriti të depërtohej në zonën e brendshme të fshatit të famshëm për mbjelljen e hashashit, stimulon rritjen graduale të lëndës narkotike për një periudhë 6 mujore.

Transportuesit e plehut organik, nuk kanë bërë rezistencë në momentin e bllokimit të automjeteve-pohojnë burimet policore por thjesht janë mjaftuar me justifikimin se ishin thjesht transportues dhe asgjë më tepër.

Aksioni i fundit i ndërmarrë nga policia rajonale, është kryer duke patur si bazë zbatimin e planveprimit të ardhur nga Drejtoria e Përgjithshme e Policisë së Shtetit, si dhe porosive të lëna nga ministri i brendshëm Lulzim Basha për marrjen e të gjitha masave për parandalimin e kultivimit të bimëve narkotike në të gjithë territorin e Republikës së Shqipërisë-shprehet për "Hermesnews" zëdhënësi i Policisë Rajonale Gentijan Mullai.

Sipas këtij të fundit, Drejtoria e Policisë së Qarkut Gjirokastër, ka hartuar një plan masash mes të cilave sensibilizuese, operacionale dhe ndëshkuese. Kreu i Policisë së Gjirokastrës Emri Vata, premton vijimin e operacioneve me zero tolerancë për goditjen e arterieve të trafikut të drogës, ku vetëm gjatë muajve të para të këtij viti, sipas tij uniformat blu kanë sekuestruar rreth 1 ton marijuanë kultivuar në Lazarat.







Sipas Vatës, në kuadër të masave parandaluese, Drejtoria e Policisë së Qarkut Gjirokastër, ka zhvilluar tre takime me Këshillin Komunal dhe kryeplakun e Lazaratit me qëllim marrjen e përgjegjësive sipas ligjit dhe gjetjen e formave për t?a minimizuar dhe eleminuar këtë fenomen.

Vetë kreu i kësaj komune Dasho Aliko, ka treguar vullnet dhe bashkëpunim për të goditur këtë fenomen duke e minimizuar deri në eleminim e plotë.

Drejtori i Policisë së Gjirokastrës Emri Vata, është shprehur gjatë kontakteve me të zgjedhurit e Lazaratit, se ky fenomen është një sëmundje që patjetër kërkon ndërhyrje dhe operim që të kalojë dhe për të arritur këtë qëllim, Policia e Gjirokastrës sipas Vatës, do të vendosë në eficensë të gjitha metodat dhe mënyrat që lejon ligji për të parandaluar dhe luftuar këtë fenomen, pavarësisht nga vështirësitë operacionale.

Në vitin 2008 në kohën kur në krye të Policisë Rajonale ishte Hysni Burgaj aktualisht kreu i Policisë së Shtetit, vetëm në Lazarat nga operacionet që i drejtonte vetë zoti Burgaj, u shkatërruan rreth 30 mijë rrënjë kanabis.

Ndërsa një vit më vonë u konstatua një ulje e ndjeshme gati në masën 70% të kultivimit të bimëve në Lazarat dhe në mbarë qarkun. Parashikohet që për disa ditë Policia e Qarkut, në bashkëpunim me Këshillin Komunal të Lazaratit dhe kryepleqësinë, të ndërmarrin veprime të tjera për të bërë të mundur parandalimin e kultivimit të kësaj bime, duke filluar goditjen e fenomenit që në embrion.

Krahas kësaj, Policia e Gjirokastrës, i ka kushtuar një vëmendje të vecantë edhe goditjes së trafikut të lëndëve narkotike në akset rrugore dhe kufirin e gjelbër në kufi me Greqinë.




Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 235 here