Video

13 Janar 2010
info@hermesnews.org

HR/TRT - Ministria e Punës ka dorëzuar tashmë njërin prej dy kapitujve të Pyetësorit që Komisioni Europian i dorëzoi zyrtarisht Qeverisë shqiptare në 16 Dhjetor të vitit të kaluar.

''Kemi dorëzuar Kapitullin II-të, ndërsa dje ka përfunduar dhe puna e strukturave të Ministrisë për plotësimin e Kapitullit XIX dhe priten kontributet e institucioneve të tjera për ta dorëzuar atë brenda afatit”, informoi sot Kastriot Sulka, Zv/Ministër i Punës dhe Koordinatori i Grupit të Punës për Pyetësorin.

Ministria e Punës është institucion përgjegjës për Kapitullin II dhe XIX të pyetësorit, që përfshijnë “Lëvizjen e lirë të Punëtorëve” dhe “Politikat sociale dhe punësim“, me gjithsej 234 pyetje, duke përfshirë dhe pyetjet nga kapitujt e tjerë, ku Ministria e Punës është kontribuues. Në total strukturat e saj duhet t’u përgjigjen 313 pyetjeve, numër ky që e rendit këtë dikaster të dytin pas Ministrisë së Drejtësisë për nga volumi i pyetjeve që duhet t’u përgjigjet.

''Me këtë ritëm të plotësimit të pyetësorit, - vlerësoi Sulka, -Ministria e Punës do të jetë ndër institucionet e para që do ta përfundojë në kohë procesin''.

Në 16 Dhjetor të vitit të kaluar, Shqipëria mori në dorëzim pyetësorin e Komisionit Evropian, në kuadër të aplikimit për statusin e vendit kandidat. Ky dokument është praktika që Komisioni Europian dërgon për secilin vend, i cili ka bërë kërkesë për të aplikuar për statusin e kandidatit në Bashkimin Evropian.

Pyetësori erdhi një muaj (16 nëntor) pas vendimit të 27 vendeve të BE-së për ta marrë në shqyrtim kërkesën e Shqipërisë për statusin e vendit kandidat, dorëzuar më 28 prill të viti të kaluar. Objektivi i qeverisë shqiptare është që Pyetësori të plotësohet nga ekspertët shqiptarë brenda datës 31 mars të vitit 2010.