Video

10 Janar 2010
info@hermesnews.org

HN/TRT - Duke iu përgjigjur një kërkese të Qeverisë shqiptare, Komisioni Europian ka vënë në veprim Mekanizmin e Mbrojtjes Civile të Komunitetit, njoftuan burime të delegacionit te BE në Tiranë.

Një ekip prej shtatë ekspertësh nga Qendra e Monitorimit dhe Informimit të Mekanizmit të Mbrojtjes Civile të Bashkimit Europian është dërguar në Shqipëri në mënyrë që të ndihmojë Qeverinë Shqiptare në vlerësimin e nevojave për të kapërcyer situatën si dhe që të koordinojë ndihmat që do të vijnë, bënë të ditur burimet e mësipërme.

Në vijim të kërkesës së Qeverisë shqiptare, Qendra e Monitorimit dhe Informimit të Mekanizmit të Mbrojtjes Civile të Bashkimit Evropian (MIC), me qendër në Bruksel, ka solli një ekip të përbërë nga ekspertë nga Austria, Gjermania, Hollanda, Greqia dhe Sllovenia.

Sipas një marrëveshjeje me Zyrën e Kombeve të Bashkuara për Koordinimin e Çështjeve Humanitare, me këtë ekip është bashkuar si partner edhe një ekspert danez i Zyrës së Vlerësimit dhe Koordinimit të Fatkeqësive të Kombeve të Bashkuara. Ky ekip u takua edhe me Zv. ministrin e Punëve të Jashtme, Selim Belortaja dhe Zv.ministrin e Brendshëm, Ferdinand Poni.

Ekipi do të vizitojë sot zonën e prekur nga përmbyjet në mënyrë që të vlerësojë situatën në terren. Ekipi gjithashtu do ta ndihmojë Shqipërinë në pritjen e ndihmës së Shteteve Anëtare të Bashkimit Evropian. Qendra e Monitorimit dhe Informacionit (MIC) drejtohet nga Drejtoria e Përgjithshme e Mjedisit e Komisionit Evropian. Ajo është zemra që vë në funksionim Mekanizmin e Mbrojtjes Civile të Komunitetit.

Ajo shërben 24 orë në ditë dhe iu krijon vendeve mundësinë e shfrytëzimit të platformës së mbrojtjes civile të komunitetit. Çdo vend që përballet me fatkeqësi madhore – brenda apo jashtë Bashkimit Evropian-mund të bëjë një kërkesë për ndihmë nëpërmjet Qendrës së Monitorimit dhe Informacionit.

Gjatë periudhës së emergjencave Qendra e Monitorimit dhe Informacionit (MIC) luan tre role kryesore: shërben si një urë ndërlidhje për shkëmbimin e kërkesave dhe ofertave për ndihmë; jep informacion për gatishmërinë e mbrojtjes civile dhe u përgjigjet si shteteve pjesëmmarëse ashtu edhe publikut të gjërë dhe aktorëve të interesuar; mbështet koordinimin e ndihmës së dhënë nga Bashkimi Evropian.