Video

Nga Dhurata Hamzai

5 Shtator 2008 - Janë zbuluar gjatë periudhës së verës mjaft objekte arkeologjike dhe kështu Ministria e Kulturës, Rinisë dhe Sporteve e ka pasur më të lehtë që ta organizojë në 29 shtator në Ditën Kombëtare të Trashëgimisë Kulturore me aktivitet të kësaj natyre.

Ndërsa MTKRS ka vendosur të ketë në qendër të vëmendjes aktivitetin me temë “Arkeologjia nënujore, si potencial i zhvillimit të turizmit, në Shqipëri”. Madje do të ketë edhe një dokumentar për arritjet në këtë fushë, tha zëdhënësja. Madje që në ditën e trashëgimisë do të flitet vetëm me gjuhën e arkeologjisë dhe këtë e përforcon fakti që edhe në galerinë “Ibrahim Kodra” në MTKRS do të çelet një ekspozitë fotografike po me këtë temë-“Arkeologjia nënujore”, ku do të paraqiten edhe foto të tjera nga monumentet e kulturës.

Sipas zëdhënëses, aktivitetet do të ketë dhe në rrethe nga parqet arkeologjike të vendit si dhe nga Drejtoria Rajonale e Kulturës Kombëtare (DRKK) , të cilat ende nuk janë konfirmuar. Mësojmë se arkeologjia gjatë muajit shtator do të jetë temë e ditës, sepse mësojmë që edhe në qytetin antik të Apollonisë sapo është krijuar projekti për një ekspozitë të përhershme fotografike, e cila do të çelet të premten pasdite, si një iniciativë e Zyrës së Administrimit dhe Koordinimit të Parkut Arkeologjik Apolonia.

Ajo është konceptuar si një ekspozitë e përhershme, me vlera të veçanta dokumentare në shërbim të turizmit kulturor. Qyteti antik i Apolonisë, sipas të dhënave, është krijuar rreth shekullit VI.p.e.r. Ai shtrihet në kodrën midis fshatrave Pojan e Kryegjatë në perëndim të Fierit.

Në pjesën e sipërme të kodrës ruhen disa pjesë të murit mbrojtës të qytetit antik dhe të një tempulli arkaik kushtuar Artemisit, hyjneshës më të adhuruar të apolonatëve. Të periudhës së antikitetit janë dhe portiku i qendrës së qytetit, teatri, një çezmë monumentale. Javë intesive kërkimesh të nëndheshme arkeologjike do të jenë gjatë muajit shtator edhe ato të një ekspedite të përbashkët italo-shqiptare arkeologjike, e cila ka nisur së fundmi punimet në qytetin antik të Finiqit, një qytet që ndodhet rreth 15 km larg qytetit të Delvinës, në jug të vendit. Sipas drejtueses së projektit, prof. dr. Shpresa Gjongecaj, drejtoreshë e Institutit Arkeologjik të Qendrës së Studimeve Albanalogjike, "ekspedita e Finiqit do të përfundojë në 2 tetor, ndërkohë që priten zbulime të reja në teatrin dhe varrezat e qytetit. Në gërmimet e nisura marrin pjesë rreth 30 persona, mes të cilëve arkeologët shqiptarë dhe italianë, si dhe studentë dhe diplomantë, të cilët i po punojnë në zbulimin e teatrit të qytetit si dhe varrezave antike të tij. Shkurt, dita e trashëgimisë kulturore flet me gjuhën e zbulimeve arkeologjike.

Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.