Video

Një sërë objektesh të kultit fetar ortodoks dhe musliman, të shpallura "Monument Kulture" në rrethin e Korçës janë restauruar apo ndodhen në proces në sajë të shtimit të fondeve nga buxheti i shtetit.

"Në dy vitet e fundit ka një interesim në rritje nga Ministria e Turizmit, Kulturës, Rinisë dhe Sporteve, e cila me fonde të dhëna nga buxheti i shtetit po mbështet restaurimin e një sërë objekteve të shpallura monument kulture në rajonin e Korcës", tha për ATSH drejtori i degës së Monumenteve të Kulturës në Korçë, Theodhor Theodhori.

Ai theksoi se pas akordimit të një fondi prej 6 milion lekë për për ngritjen e minaresë në xhaminë e Iljaz bej Mirahorit, është miratuar së fundi edhe një fond shtesë me po këtë vlerë që mundëson fillimin e punimeve për ndërtimin e minaresë së një prej monumenteve të kulturës më të rëndësishëm në Korçë.

Ndërkohë që po investohet edhe në objekte të tjera të kultit fetarë, që mbartin vlera të trashëgimisë kulturore dhe historike në rethin e Korçës. "Një fond shtesë prej 4 milion lekë është dhënë për të restauruar kishën e Shën Mëhillit në Vokopojë, ku do të ndërhyet për riparimin e catisë, rrethimin e jashtëm të saj, përforcimin e elementëve të harqeve të brendëshme etj", nënvizoi Theodhori.

Ai shtoi se në sajë të këtyre fondeve që ka dhënë qeveria në dy vitet e fundit thuajse po mbyllet cikli i restaurimit të objekteve të kultit fetar të shpallura "Monument Kulture" të kishave të Voskopojës dhe të Vithkuqit.

Gjatë këtij viti nga buxheti i shtetit janë dhënë rreth 30 milionë lekë për të ndërhyrë në mirëmbajtjen e monumenteve të kulturës në rajonin e Korcës , ndërkohë që një vit më parë janë dhënë 12 milionë lekë.
Objektet e kultit në Voskopojë e Vithkuq.

Voskopoja dhe Vithkuqi, si dy nga fshatrat me trashëgimi kluturore më të rëndësishme në rrethin e Korcës, ngritjen dhe lulëzimin e tyre e kanë patur në shekujt XVII-XVIII-të .

Voskopoja, e cila ndodhet rreth 13 kilometra larg Korçës, në periudhën e lulëzimit të saj ka patur 24 kisha, nga të cilat pas tre luftërave dhe shkatërrimeve që pësoi fshati vetëm 7 janë aktualisht . Ndër kishat që kanë mbetur në Voskopojë janë ato të Shën Kollit, Shën Athanasit, Shën Mëhillit, Shën Pjetrit etj.

Vithkuqi është një tjetër fshat i vjetër që ndodhet rreth 25 kilometra në jug perëndim të Korcës. Edhe ky fshat në shekullin e XVII-të ka qënë një nga qëndrat më të zhvilluara në rajon. Dallohet për trashëgiminë e tij kulturore dhe historike sidomoas për afresket e manastirit të Shën Pjetrit.

Aktualisht në këtë fshat ruhen 5 kisha të vjetra, të cilat si në Voskopojë i janë nënshtruar restaurimit. Një tjetër monument kulture, që sipas historianëve daton me krijimin e qytetit të Korcës rreth vitit 1484 është xhamia e Iljaz bej Mirahorit. Xhamia e rrallë në Ballkan për nga kupola e saj e veshur me plumb, në hyrje mban pikërisht emrin e Iljaz bej Mirahorit, si themeluesi i Korçës dhe kontribuesi për ngritjen e këtij objekti kulti që është shpallur "Monument kulture".

Kisha e Shën Ristozit, një tjetër monument kulture në fshatin Mborje të Korçës daton e ngritur në vitin 1389 dhe në të festohet 40 ditë pas festës së Pashkës festa për të cilin mban emrin edhe kisha.