Video

Laureta Roshi
lauretaroshi@hotmail.com

18 Korrik 2008 - Kreu i Prezencës së OSBE-së në Shqipëri, Ambasadori Robert Bosch, nxiti sot ligjvënësit shqiptarë t’u japin kohën e mjaftueshme konsultimeve për legjislacionin lidhur me ish-bashkëpunëtorët e regjimit komunist, ndërsa theksoi rëndësinë që ka për vendin zgjidhja e kësaj çështjeje dhe përmbushja e detyrimeve ndërkombëtare.

“Prezenca e OSBE-së dëshiron të përsërisë edhe një herë qëndrimin e saj se i gjithë legjislacioni me rëndësi të veçantë për publikun, veçanërisht kur ka të ngjarë që të krijojë kundërshti, duhet të miratohet në mënyrë të atillë që të lejojë kohë të mjaftueshme për konsultim me ekspertë, grupe të interesit dhe publikun e gjerë. Veç kësaj, duhet të lihet hapësirë kohore për debate të gjalla në Kuvend”, deklaroi Ambasadori Bosch.

Ai vërejti se Shqipëria është angazhuar që t’i miratojë ligjet vetëm pasi t’u nënshtrohen procedurave publike të mjaftueshme. Gjithashtu, ai tërhoqi vëmendjen te nevoja për të siguruar që çdo ligj i miratuar t’u nënshtrohet mjeteve procedurale të një shteti demokratik, të bazuar në sundimin e ligjit.

Kuvendi ka planifikuar të votojë projektligjin për pastërtinë e figurave publike më 21 korrik, përpara ndërprerjes së punimeve për sezonin veror. Ne nje deklarate per shtyp, Ambasadori Bosch vërejti se prej shumë muajsh një sërë draftesh janë paraqitur në Kuvend pa i shtruar hollësitë e tyre në një debat serioz, qoftë në Parlament apo me publikun e gjerë, dhe se programi aktual i Kuvendit nuk duket se ofron kohën e nevojshme për një diskutim të tillë.

Ai, gjithashtu, shprehu shqetësimin se çështja nuk do të zgjidhej përfundimisht pa arritjen e një konsensusi të gjerë – dhe se rihapja e vazhdueshme e kësaj çështjeje do të ishte në dëm të zhvillimit të Shqipërisë. Prezenca e OSBE-së mbetet e gatshme të ndihmojë autoritetet shqiptare në këtë çështje, në përputhje me mandatin e saj, shtoi Ambasadori Bosch.