7/18/2008 8:34:38 AM

Pensionet e ushtarakeve

Kur ka një vendim të Gjykatës së Lartë për pensionin e parakohshëm të ushtarakëve, gjykatave s’u mbetet tjetër veçse të konfirmojnë atë. Vendimi i GJ.Lartë për pensionin e parakohshëm të ushtarakëve të zbatohet.

Nga Kadri Muka

18 Korrik 2008 - Gjykatat e Rretheve Gjyqësore ndodhen sot përballë realitetesh të pakundërshtueshme. Realiteti i parë është ai se ato po përballen e do të përballen gjithnjë e më shumë me një numër më të madh kërkesë padish nga ushtarakët kundër Sigurimeve Shoqërore që rrokin trajtimin me pension të parakohshëm për vjetërsi shërbimi dhe atë pension suplementar pleqërie.

Realiteti i dytë është se ndodhen përballë disa vendimeve përfundimtare të formës së prerë të dhëna nga Gjykatat e Apelit për këto probleme dhe se për këto ka disa vendime përfundimtare të formës së prerë të Gjykatave të Apelit si dhe dy vendimeve të Gjykatës së Lartë, vendimit Nr.60, datë 18.01.2005 dhe vendimit Nr.14, datë 28.01.2005. Po ti referohemi Kodit të Procedurës Civile të Republikës së Shqipërisë, të dy këtyre realiteteve me dispozitat e tij u ka dhënë zgjidhje. Në nenin 162 thuhet: “Kur, për shkak të natyrës së marrëdhënieve juridike që janë në konflikt ose për shkak të një dispozite ligjore, efekti i vendimit, që do të jepet, shtrihet në të gjithë bashkëndërgjyqësit, veprimet procedurale që janë kryer prej disa bashkëndërgjyqësve kanë efekt edhe për bashkëndërgjyqësit e tjerë që nuk janë paraqitur në gjykatë ose që nuk kanë kryer ndonjë veprim në afatin e caktuar.”

Me këtë ky Kod e ka vendosur mirë pikën mbi “i”. Ai vendimit Nr.60, datë 18.01.2005 dhe vendimit Nr.14, datë 28.01.2005, i jep efekt veprimi për të gjithë bashkëgjyqësit, pra për të gjithë ushtarakët që kanë të njëjtin konflikt me Sigurimet Shoqërore. Për shkak të këtij detyrimi ligjor, Gjykatave nuk u mbetet tjetër veçse të respektojnë e zbatojnë vendimin e Gjykatës së Lartë. Këto vendime përmbledhtas thonë: Vendimi Nr.60 si një reagim ndaj rekursit të Drejtorisë Rajonale të Sigurimeve Shoqërore Kukës, kundër vendimit të Gjykatës së Shkallës së Parë Kukës, që detyronte këtë drejtori të caktonte masën e pensionit të parakohshëm për vjetërsi shërbimi për paditësin, duke bërë rregullimet e duhura sipas kushteve ”a” dhe ”b” të nenit 6 të ligjit Nr.8521, datë 30.07.1999 me përcaktimin se kufizimi për të mos kaluar pensionin maksimal të pleqërisë në shkallë vendi lidhet vetëm me pikën ”b” të këtij neni, nuk e pranon atë rekurs.

Në atë vendim thuhet: ”Kolegji Civil i Gjykatës së Lartë pasi dëgjoi relacionin përkatës dhe diskutoi çështjen në tërësi në dhomën e këshillimit, Vëren: Rekursi i paraqitur nga Drejtoria Rajonale e Sigurimeve Shoqërore Kukës, nuk përbënë shkaqe nga ato që parashikon neni 472 i Kodit të Procedurës Civile. Për këto arsye; Kolegji Civil i Gjykatës së
Lartë, në bazë të nenit 480 të Kodit të procedurës Civile, Vendosi: Mospranimin e rekursit të paraqitur nga Drejtoria rajonale e Sigurimeve Shoqërore Kukës.” Ky mospranim.

Lë në fuqi vendimin e Gjykatës së Shkallës së Parë dhe detyron Drejtorin Rajonale të Sigurimeve Shoqërore për caktimin e masës së pensionit sipas germës ”a” dhe ”b” të nenit 6 të ligjit Nr.8521, datë 30.07.1999. Me një fjalë detyron atë ti japë paditësit 50% të pagës referuese për 15 vjet dhe mbi këtë masë ti shtojë 2% të kësaj page për çdo vit tjetër mbi 15 vjetshin, por pa kaluar kjo shtesë masën e pensionit maksimal të pleqërisë në shkallë vendi.
Vendimi Nr.14, datë 28.01.2005 i Kolegjit Civil të Gjykatës së lartë, i cili është në përgjigje të rekursit tjetër të kësaj Drejtorie Rajonale të Sigurimeve Shoqërore, nëpërmjet të cilit i kërkon kësaj Gjykate pezullimin e vendimit përfundimtar të formës së prerë të Gjykatës së Shkallës së Parë Kukës dhe Gjykatës së Apelit Shkodër, refuzon këtë kërkesë.

”Kolegji Civil i Gjykatës së Lartë, -thuhet në atë vendim,- pasi dëgjoi relacionin përkatës dhe si analizoi çështjen në tërësi, vëren: Kërkesa e paraqitur nga Drejtoria Rajonale e Sigurimeve Shoqërore Kukës, për pezullimin e ekzekutimit të vendimit të formës së prerë Nr.55, datë 30.03.2004 të Gjykatës së Shkallës së Parë Kukës dhe vendimit Nr.173, datë 16.07.2004 të Gjykatës së Apelit Shkodër nuk është e bazuar në ligj e si e tillë nuk duhet të pranohet.

Për këto arsye, Kolegji Civil i Gjykatës së Lartë vendosi: Refuzimin e kërkesës së paraqitur nga Drejtoria Rajonale e Sigurimeve Shoqërore Kukës, për pezullimin e ekzekutimit të vendimit të formës së prerë Nr.55, datë 30.03.2004 të Gjykatës së Shkallës së Parë Kukës dhe vendimit Nr.173, datë 16.07.2004.”

Pra, Gjykata e Lartë me këtë vendim pas lënies në fuqi të vendimit që detyron këtë drejtori të llogarisë
pensionin sipas germës ”a” dhe ”b” te nenit 6 të ligjit Nr.8521, datë 30.07.1999, detyron atë për të llogaritur e paguar pensionin sipas këtyre germave të këtij neni të ligjit përkatës.

Pas këtyre dy vendimeve të Gjykatës së Lartë, në fakt trajtimi i ushtarakëve me pension të parakohshëm për vjetërsi shërbimi, duhej të ishte në respektim dhe zbatim të këtyre dy vendimeve. Por çuditërisht ISSH ka ngulur këmbë në vendosmërinë e saj për të mos zbatuar e shkelur me çdo kusht e mjet ligjin.

Këtë ka bërë edhe pse kufizimi ”por jo më shumë se pensioni maksimal i pleqërisë në shkallë vendi i germës ”b” të nenit 6 të ligjit Nr.8521, datë 30.07.1999, nuk ka është në fuqi që nga 14 maj 2004. Tashmë është rasti që Gjykatat ti thonë ”NDAL” këtij shkelësi permanent të ligjit dhe përdhosësh të Gjykatave, përfshi edhe Gjykatën e Lartë dhe vendimeve përfundimtare të formës së prerë të tyre.

Çdo vendim tjetër do të përbeje një precedent jo vetëm të shkeljes së Kodit të Procedurës Civile, por edhe për mosnjohje, mosrespektim dhe moszbatim të vendimit përfundimtar të formës së prerë të ndërmarrë nga organi më suprem i drejtësisë në Republikën e Shqipërisë, Gjykatën e Lartë.

Nuk besoj se gjyqtarët dhe gjykatat do të arrijnë deri në këtë marrëzi. Nëse ndodh kjo ndaj tyre del urgjente denoncimi për shkelje të trefishtë të ligjit dhe ndëshkimi pa ekuivok i tyre, si një domosdoshmëri për të rivendosur autoritetin e nëpërkëmbur të ligjit, të vendimit të organit më të lartë të drejtësisë dhe për të mos lejuar përdhosjen e nëpërkëmbjen e shtetit ligjor të së drejtës. Edhe nëse këtë nuk e bëjnë organet përkatëse të drejtësisë gjyqtarët dhe gjykatat të jenë të sigurta se atë kanë për ta bërë ushtarakët në institucionet vendore e ndërkombëtare.

Neni 162 përveç sa më sipër u jep efekt veprimeve procedurale të kryera nga bashkëgjyqësit edhe për gjithë bashkëgjyqësit e tjerë që nuk janë paraqitur në gjykatë ose që nuk kanë kryer ndonjë veprim në afatin e caktuar. Edhe me këtë gjithçka Kodi i procedurës Civile e ka vulosur. Ai nuk ka lënë e nuk krijon asnjë ekujvok nga ku mund të prenetohet apo të spekulohet. Asnjë shteg keqinterpretimi nuk ka lënë ai. Thjeshtë, shkurt e qartë ai, veprimet procedurale të kryera nga ushtarakët të cilët kanë fituar gjyqin në shkallën e parë, në Gjykatat e Apelit edhe aq më shumë në Gjykatën e Lartë i quan të vlefshme dhe të kryera edhe nga ushtarakët e tjerë që kanë të njëjtin objekt kërkesëpadie, por që nuk i janë drejtuar gjykatës apo nuk kanë operuar në kohë.

Për shkak të të gjitha këtyre të drejtave që jep, njeh dhe garanton Kodi i Procedurës Civile, është në nderin, detyrën dhe detyrimin e Gjykatave ti propozojnë Gjykatës së Lartë që të mbyll procesin e detyrimit të Sigurimeve Shoqërore, për të trajtuar ushtarakët me pension të parakohshëm për vjetërsi shërbimi dhe pension suplementar pleqërie në përputhshmëri të plotë me ligjin, në kohën e lindjes së të drejtës dhe me ndryshimet ligjore të mëpasme të cilat kanë sjellë pasoja pozitive dhe trajtim financiar më të mirë nga përcaktimet ligjore të mëparshme.



Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 31 here