Video

Edison Myrteza
edikorca@yahoo.com

16 Korrik 2008 - Ministrja e jashtme greke, Dora Bakojanis, ka paralajmëruar Shkupin se kush mbjell erë, korr furtunë dhe ka akuzuar kryeministrin maqedonas, Nikolla Gruevski se në mënyrë të ndërgjeshme po prish themelet e negociatave për çështjen e emrit.

Ministrja ka reaguar ndaj letrës që Gruevski i ka dërguar homologut të tij grek, Kostas Karamanlis, ku i kërkon njohjen e pakicës maqedonase dhe kthimin e pasurive të bashkëkombasve të tij që sipas Gruevskit janë përzënë nga Greqia. Axhenda mediatike e aktualitetit grek ka shmangur për pak temën e nxehtë te skandaleve të fundit, dhe është përqëndruar në çështjen e Maqedonisë.

Thuajse gjithë gazetat e mëdha greke i kanë kushtuar vendin kryesor në faqen e parë komenteve rreth letrës që kryeministri maqedonas, Nikolla Gruevski i ka dërguar homologut të tij grek, Kostas Karamanlis, ku ndër të tjera i parashtron çështjen e, sipas Shkupit, maqedonasve të Egjeut që ai thotë se gjatë viteve të luftës civile u përzunë nga vendlindja e tyre, pra nga Greqia. Kjo çështje dominoi edhe bashkëbisedimin e zëdhënësit të qeverisë greke, Teodoros Rusopulos me gazetarët. Zëdhënësi ka lënë të kuptohet se qeveria greke nuk e ka dëshiruar publikimin e kësaj letre. “Ne nuk do ta publikonim letrën. Ne do t’i dërgonim përgjigjen tonë zotit Gruevski, tha zëdhënësi, duke shtuar se në praktikën diplomatike, përgjegjësinë e publikimit e merr dërguesi”.

Partia më e madhe opozitare, PASOK, kërkoi që letra e kryeministrit maqedonas të injorohet dhe përgjigjja t’i adresohet OKB-së. Por zëdhënësi i qeverisë tha se po të lihet pa përgjigje një provokim i tillë, e ka fjalën për letrën e zotit Gruevski, atëherë lihen pa përgjigje pyetje ndaj historisë, ndërsa shtoi se pala greke ka argumenta të fuqishme që të përgjigjet edhe për të tashmen edhe për të ardhmen. “Në negociata, gjithë ato elementë që mund të dhe duhet të përdoren nga pala greke, po përdoren dhe do të vazhdojnë të përdoren, një element i tillë është dhe kjo letër provokim”, tha zëdhënësi i qeverisë greke, Teodoros Rusopulos.

Më i ashpër ndërkaq ka qenë reagimi i ministres së jashtme, Dora Bakojanis. “Zoti Gruevski, ajo që përpiqet të bëjë është të prishë me ndërgjegje themelet e negociatave, negociata që po zhvillohen me kushte shumë konkrete. Mirëpo, nacionalizmi ekstrem, mbjell erë dhe korr furtunë”. Këtu theksojnë se letra e Gruevskit u dërgua ditën e premte, ndërsa në Nju Jork i dërguari i OKB-së për çështjen e emrit Methju Nimiç, po takohej me negociatorin maqedonas, Aleksandër Dimitrov. Kjo, sipas palës greke dëshmon se pala maqedonase dëshiron ta minojë procesin e negociatave.