Video

9 Korrik 2008 - Një qendër e banuar që daton më shumë se 5 000 vjet përpara erës së re, më e vjetra e gjetur ndonjëherë në Paris, u zbulua në jug të kryeqytetit, pranë Senës, njoftoi sot Instituti Kombëtar i Kërkimeve Arkeologjike (Inrap).

Kjo qendër, që daton nga epoka e Mezolitit (9.000- 5.000 vjet përpara erës së re), ka qenë e banuar nga gjuetarët që kishin lenë në vend një numër të madh kokash shigjete prej sileksi 1-3 centimetra dhe objekte të tjera.

E vetmja qendër tjetër e njohur e Mezolitit në rajonin Ile-de-France ndodhet në Rueil-Malmaison, në perëndim të Parisit. Popullsia e asaj kohe ishte nomade dhe jetonte me gjuetinë e drerit, derrit të egër dhe të kaprollit. Sipas përgjegjëses së kërkimeve, Bénédicte Souffi, zona e studiuar (5.000 m2), që ndodhet në lagjen XV, është pushtuar disa herë radhazi.

Popullsia e Mezolitit ka jetuar pas zhdukjes së mamuthëve dhe drerëve, në një pejsazh më të moderuar, ku pylli zëvendësoi stepën akullnajore. Zona e gërmimeve në Paris është ruajtur veçanërisht mirë, sipas arkeologëve, sepse është e mbuluar nga llumi i Senës, e më pas nga trasetë prej dy metrash të lartë të ndërtuar në shekullin XVIII dhe XIX për të mbrojtur Parisin nga prurjet e lumit.