Video

Nga Gjergj Vyshka

10 Maj 2008, AlbaniaSport.net - Trajneri i Dinamos, Ilir Daja, i ka kërkuar lojtarëve të tij në prag të ndeshjes me Besën në "Selman Stërmasi", që të ruajnë atë çka kanë ndërtuar deri më tani. "Jemi përsëri përpara një sfide shumë të vështirë, - deklaron Daja. - Besa ka zhvilluar një kampionat të mirë, është me meritë në vendin e tretë dhe, në këto javë të fundit, duke lënë mënjanë humbjen e javës së kaluar me Partizanin, ka patur rezultate pozitive."

Më tej, ai ka shtuar: "Duke e ditur që ata kërkojnë dhe Kupën Intertoto, atëherë ndeshja bëhet dhe më e vështirë. Por do ta marrim fitoren". Sipas Dajës, kjo ndeshje, të paktën në anën psikologjike, nuk është në shkallën e fortësisë së derbit të javës së kaluar me Tiranën. "Nëse javën e kaluar - tregon Daja - skuadra ishte e ngarkuar psikologjikisht, sepse kërkohej fitorja me çdo kusht, në këtë sfidë me kavajasit gjërat ndryshojnë."

"Nuk do të kemi përballë një kundërshtar që është i liruar, siç ishte Tirana, dhe luante pa motive, por një Besë të vendosur për të marrë rezultatin pozitiv, - ka vijuar kreu i pankinës blu. - Në këtë sens, si Dinamo, ashtu dhe Besa nisen nga i njëjti start, kur luajnë me objektiva; ne për të ruajtur kreun dhe kavajasit për të "çimentuar" vendin e tretë. Kemi 90 minuta në dispozicion, të cilat duhet t'i shfrytëzojmë me qetësi për të marrë fitoren".

Daja pranon që një gol i shpejtë i jep skuadrës dhe qetësinë për të administruar atë që do. "Sigurisht - thotë tekniku i bluve - një gol i shpejtë i jep qetësinë e duhur skuadrës, që të menaxhojë më mirë ndeshjen. Por gjithçka duhet marrë me qetësi". Daja është i vetëdijshëm që kavajasit kanë qenë një "kockë e vështirë" për dinamovitët, sidomos në kryeqytet. Por tekniku i bluve i jep kurajo vetes dhe skuadrës, duke përdorur shprehjen: "ndeshja, ndeshjes nuk i gjan".

"Asnjëherë ndeshjet nuk janë njësoi, madje ndodhin të tilla fenomene dhe brenda kampionatit. Dhe shembujt i kemi konkret, kur kemi barazuar me Besën në "Qemal Stafa", por kemi fituar me ta në Kavajë. Na ka mundur Flamurtari në Tiranë, por e mundëm në Vlorë dhe më pas thellësisht po në "Selman Stërmasi". Ndeshja ka vështirësi, por kjo nuk do të thotë që duhet të nisemi nga ajo çfarë ka ndodhur në sezonet e kaluara", ka nënvizuar Daja.

Pyetjes sonë se a mund të luajë Besa për të tjerë, tekniku i bluve i ka anashkaluar paksa në përgjigje. "Besa ka objektivat e veta - thekson tekniku i bluve - dhe nuk besoj se do të luajë për palë të dyta, apo të treta. Por asnjëherë nuk duhet besuar kjo që po them, sepse në futbollin shqiptar çfarë nuk ndodh. Megjithatë ne duhet ta fitojmë vetë".