10/10/2008 2:20:46 PM

Thaçi: Vendimi i Maqedonisë dhe Malit të zi forcon paqen dhe stabilitetin në rajon

Institucionet kanë mirëpritur vendimin e qeverive dy vendeve fqinjë, Malit të Zi dhe Maqedonisë për njohjen e shtetit të Kosovës

info@hermesnews.org
10 Tetor 2008

Prishtine- Institucionet kanë mirëpritur vendimin e qeverive dy vendeve fqinjë, Malit të Zi dhe Maqedonisë për njohjen e shtetit të Kosovës. Ne emër të institucioneve, qeveritë e këtyre dy vendeve i falënderoi sot kryeministri Hashim Thaçi. Ai vlerësoi se njohja e Kosovës nga Podgorica dhe Shkupi do të ndikojë në përshpejtimin e njohjeve të tjera për Kosovën.

Njohja e Kosovës nga dy vendet fqinjë, Mali i Zi dhe Maqedonia, është shumë e rëndësishme për stabilitetin dhe për perspektivën e përgjithshme të rajonit. Në emër të institucioneve të Kosovës, kryeministri Hashim Thaçi, falënderoi qeveritë e këtyre dy vendeve. Ai theksoi se vendimi i Maqedonisë dhe Malit të Zi për njohjen e Kosovës nuk është drejtuar kundër askujt, duke aluduar në pakënaqësitë dhe reagimet e Serbisë. Kryeministri i cilësoi të përgjegjshme vendimet e Podgoricës dhe Shkupit.

“Vendimet i Malit të Zi dhe Maqedonisë për Kosovën shtet e forcon edhe më tepër paqën dhe stabilitetin dhe bashkëpunimin rajonal. Ky vendim lehtëson dhe përshpejton integrimin e vendeve tona në BE dhe në NATO”, ka thënë kryeministri Thaçi. Si përgjigje, Thaçi premtoi se Kosova do të ndërtojë raporte shumë të mira me vendet e fqinjë, duke mos e përjashtuar as Serbinë. “Kosova si shtet punon dhe është e gatshme të ketë raporte të bashkëpunimi edhe të Kosovës dhe të Serbisë, si dy vendeve të pavarura për interesat e dy vendeve tona dhe dy popujve tanë”, theksoi Thaçi.

Kryeministri vlerësoi se vendimet e Podgoricës dhe Shkupit ndikojnë edhe në ndryshimin e qasjes së vendeve që ende hezitojnë ta njohin Kosovën, duke u shprehur i bindur se procesi i njohjeve do të vazhdojë. Kryeministri hodhi poshtë mundësinë që çështja e demarkacionit të mund të pengojë bashkëpunimin mes dy vendeve. “Çështja e demarkacionit ka shkuar në mënyrë të suksesshme në takimin që kanë pasur komisioni ynë me atë të Maqedonisë, me mbështetjen ndërkombëtare...Ndërsa ndonjë veprim i improvizuar nuk do të mund të ndikojë në raportet e shkëlqyeshme në mes autoriteteve tona dhe vendeve fqinjë”, ka vlerësuar Thaçi.

Mali i zi dhe Maqedonia e njohën Kosovës, vetëm një ditë pasi Asambleja e Përgjithshme e Kombeve të Bashkuara miratoi propozimin e Serbisë, që Gjykata ndërkombëtare e Drejtësisë të japë një vlerësim për ligjshmërinë e pavarësisë së Kosovës. Qeveritë e këtyre dy vendeve i kanë arsyetuar vendimet e tyre për njohjen e Kosovës, dhe i kanë bazuar në përpjekjet për mbrojtjen e interesave kombëtare dhe në synimet për përshpejtimin e proceseve integruese në Bashkimin Evropian.

Dërgo me email | Stampo artikullin | Artikulli është lexuar 21 here