Video

Nga Fatime Kulli

28 Gusht 2008 - "Qentë le të lehin, karvani të ecë përpara", kjo thënie e liderit të shtetit monist (50 vjeçar), Enver Hoxha, besoj se u kujtohet mirë të gjithë bashkëmoshatarëve të mi, pse jo, edhe brezit para meje, madje edhe atyre që vazhdojnë të udhëheqin këtë vend.

Ndoshta ky është një lejmotiv për të qeverisur me dorë "të fortë", ashtu sikurse vazhdon të drejtojë kreu i qeverisë zoti Sali Berisha. Ai s'pyet as për akuzat që bëjnë ndaj punës së qeverisë së tij, Ai s'pyet, as kur krijohen tragjedi të mëdha me humbje jetësh, (siç ishte ngjarja e Gërdecit me 26 të vdekur dhe 203 të plagosur), katrahurë kjo, që ndodhi për faj të institucioneve shtetërore dhe ministrit të qeverisë së tij, sërish Kryeministri ndjehet krenar për qeverisjen dhe ministrat e tij.

Kujtoj këtu, deklarimin e kryeministrit Berisha: "Fatmir Mediu është një nga ministrat më të suksesshëm" . Kjo është shumë e vërtetë, ndaj ndodhi edhe tragjedia, që quhet "suksesi" më i madh i qeverisë Berisha. Edhe pse brenda kampit blu, thuhet se lideri i PD, njëkohësisht Kryeministri i vendit, tashmë e ka ezauruar tragjedinë e Gërdecit, pasi ajo "përfundoi" me zhurmën në media dhe gojën e mbyllur njëherë e përgjithmonë të viktimave, dhe fjalën e fundit do ta japë drejtësia, ashtu siç e dha për liderin e dhjetorit Azem Hajdari, dhe të tjera viktima që thuhet në media, se janë zhdukur nga njerëz të shtetit.

Por, Kryeministri Berisha, kur dëgjon ndonjë "fishekzjarrë" në media, apo ndonjë akuzë nga opozita, fut TRINITRINË në gojë, qetësohet dhe pastaj deklaron sukseset e qeverisë së tij.

Dhe sërish, na kujtohet shprehja e Enver Hoxhës: "Qentë le të lehin, karvani të ecë përpara", që i shkon për shtat të moralit politik Berishës, i cili s'ndjenë asnjë rrezik për qeverisjen e tij, edhe pse mbi kurrizin e qeverisë peshon një mal me akuza për korrupsion, ai as do t'ia di se çfarë akuzash bëhen, çfarë kritikash bëhen ndaj keqqeverisjes, ndaj abuzimeve dhe vjedhjeve të hapura që bëhen nga administrata qeverisëse, që nga punonjësit më të thjeshtë e deri tek ministrat e suksesshëm të Berishës.

Këtë po e konkretizojë me fjalën e Berishës më 02.08.2008, gjatë turit "Shqipëria në Nato" në Selenicë të Vlorës.

"Qeveria që unë kryesoj ka investimet më të larta në Europë për infrastrukturën. Kjo qeveri të dashur vëllezër dhe motra, investon sot në infrastrukturë në rrugë kanalizime ujësjellësa autostrada shkolla 32 % të buxhetit, investon sot 9 % të Prodhimit të Brendshëm Bruto, investon vetëm këtë vit 1.2 miliardë dollarë. Cilat janë investimet publike të qeverive të tjera. Më e shumta e ka 5.5 % të Prodhimit të Brendshëm Brutosepse të tjerët kanë infrastrukturën kanë trashëguar infrastrukturën kanë trashëguar një zhvillim krejt tjerët, Por ana pozitive e kësaj është se se me shpejtësi të madhe ne do të kemi një rrjet rrugor modern ndër më të rinjtë dhe më të zhvilluarit, rrjet rrugor që do të qarkojë në të katër anët vendin. Ne po ndërtojmë autostrada më katër korsi nga Morina në Vlorë, po ndërtojmë superstrada në Peshkopi Korçë Gjirokastër dhe në drejtime të tjera, por po ndërtojmë rrugë të standardeve më të mira kudo në çdo komunë, në çdo qytezë dhe unë ju garantoj ju se rrugët e Shqipërisë shumë më shpejt nga ç'mund të mendohet do të jenë të asfaltuar sipas standardeve më të mira europiane. Ndaj le të vazhdojmë së bashku këtë përpjekje për zhvillimin dhe modernizimin e vendit. Qeveria në vitin 2008, pavarësisht uljes së taksave për qytetarët shqiptarë, ia doli të mbledhë një buxhet prej 4.2 miliardë dollarë, ia dolëm që vendi të ketë një buxhet publik miliarder dhe këto i kthejmë në rroga në pensione në rrugë në shkolla në kanalizime, në vepra që përmirësojnë jetën tuaj. Për një moment ju ftoj ju të kujtoni se çfarë u ndërtuan gjatë 8 viteve që shkuan. Çfarë investimesh u bënë gjatë 8 viteve që shkuan. Edhe segmenti i hyrjes kur nisesh nga Vlora e këtej i ndërtuar në vitin 2004-2005 ishte rikthyer siç ka qenë. Kjo është e vërteta. Po pse? Sepse ato para shpërdoroheshin , shkonin në xhepat e kontrabandistëve, evazorëve. Mbrëmë po dëgjojë një statistikë eeuropiane, në Shqipëri thoshte që varfëria është pakësuar me 30 %. Kjo nuk do të thotë se në Shqipëri s`ka të varfër por do të thotë se Shqipëria po zhvillohet me ritme të shpejta dhe qytetarët e saj përfundimisht po ndahen nga varfëria"

Ky, me të vërtetë është "suksesi" më i madh i qeverisë, pasi çdo sukses i çdo qeverie, matet tek shporta e qytetarit, që po ta peshosh shportën e të papunit, të pensionistit, e merr era, se s'qëndron dot në peshoren farmaceutike.

Gjithashtu, me dt.09.07.2008 në mbledhjen e KPS-së, Berisha deklaron: "2008-ta është viti i kthesës më të madhe në historinë financiare buxhetore të Shqipërisë. Shqipëria ka një inflacion plotësisht të kontrollueshëm të importuar dhe të diktuar"
Gjithashtu, Kryeministri Sali Berisha, gjatë një analize shtatë mujore të qeverisë së tij, (e cila u dha në një speciale të Televizionit Shqiptar) me titullin "7 muajt që ndryshuan Shqipërinë", na bëri të ngazëllehemi për rezultatet "e larta" të qeverisjes Berisha.

Para pak kohësh kemi dëgjuar po nga goja e kryeministrit tonë, se 86 milionë euro u deklaruan si fitim nga firmat që ndërtojnë rrugën Durrës-Kukës. Hajde përralla, hajde.

Dhe përrallat edhe kësaj radhe kanë një emër konkret dhe ky është, "shpëtimtari" i vetëm i vendit tonë që drejton qeverinë, dhe që na bëri të besojmë se çfarëdo "xhevahiri" që nxjerr nga Kryeministri ynë i nderuar, ne e besojmë dhe e falënderojmë, se me të "vërtetë" na "ndryshoi" varfërinë.

Por shqiptarët e ndjejnë, se pas diellit të verës, ka rrebesh, se së shpejti do t'ia "lidhin barkun" me spango, do të ndezin kandilat, do të kërkojnë të hapin puse për të mbushur një kovë ujë. Ata që s'e ndjejnë janë vetëm të verbrit që nuk duan të shohin dhe të shurdhrit, që nuk duan të dëgjojnë, se në Shqipëri po troket kriza ekonomike, se të varfrit do kërkojnë gjyzlykët e Fuat Çelës, për të parë dhe gjetur "gjilpërën" magjike të "suksesit" të qeverisjes në "mullarin" e premtimeve përrallore dhe shifrave marramendëse të "sukseseve" që deklaron kreu i qeverisë.

Por, këtë s'mund ta bëjnë, ata që janë një grusht militantësh, besnikë të konflikteve të interesit, që i shërbejnë me devotshmëri segmenteve të pushtetit, fare pranë majës së piramidës qeverisëse, të cilët, as duan t'ia dinë se ka njerëz që vuajnë qoftë edhe për bukën e ditës. Kur çdo ditë tek ne, familjet shqiptare vuajnë fuqinë blerëse në shportën e tyre, që është gjithnjë e në rënie.

Dhe fuqia blerëse në vend vazhdon të bjerë çdo ditë, shkak për këtë është bërë shtrenjtimi i energjisë dhe disa produkteve ushqimore të cilat po ndjehen jo vetëm në xhepat e pensionistëve, por në shumicën e familjeve shqiptare që përballen çdo ditë me rritjen e çmimeve të produkteve ushqimore. Edhe pse rritja më e fundit e pensioneve, apo e pagave u trompetua si sukses i qeverisë, ajo nuk arrin të përmirësojë dot gjendjen e mjeruar të ekonomisë familjare.

Kryeministri shqiptar, vazhdon me sukseset e tij: "Qentë le të lehin, karvani të ecë përpara!". Në një kohë kur, "mbi 200 mijë familje të pensionistëve që jetojnë të vetëm, në qytet, rritja më e fundit nuk ofron më shumë se 1700 lekë në muaj apo 55 lekë në ditë".

Këto janë shifra të bëra publike në media, ndërsa në deklarata të bëra nga burime zyrtare të qeverisë thuhet se, "çmimet në treg janë më të lira se një vit më parë". Kur në realitet, janë shtrenjtuar shumë zëra të nevoja ditore e mujore për të jetuar, dhe kjo ndihet më shumë tek një pjesë e madhe e popullsisë, që janë të papunë dhe pensionistët.

"Qentë le të lehin, karvani të ecë përpara!", dhe jetesa mizerabël

Rritja prej 35 % në të tri vitet bashkë është vetëm për pensionistët në qytet që marrin pension minimal, sepse për 37 mijë pensionistë të tjerë në qytet që marrin pensione të pjesshëm, të ardhurat mujore nuk kalojnë akoma 10 mijë lekë në muaj. Qeveria e kryeministrit nuk i llogarit kurrë minimumin jetik të kësaj shtrese, se nuk e lënë ta shohin "sukseset". Sipas burimeve të bëra publike në media, mësojmë se, janë 48 mijë pensionistë në fshat, apo më shumë se 1/3 e tyre, me pensione të pjesshme që akoma kanë të ardhura mujore më pak se 5 mijë lek.

Shtrenjtimi i ndjeshëm i jetesës tregon se edhe rritja e pensioneve në korrik 2008, nuk mjafton as për të kompensuar koston e disa elementeve bazë të jetesës së një familje pensionistësh. Por, kryeministri vazhdon t'i quaj suksese, se rregullon ca rrugë, pret ca shirita, që janë më të gjatë se vetë rrugët e shtruara, edhe pse jeta e pensionistëve, të realitetit të jetesës së familjeve shqiptare, dhe nuk mund të kuptojë gjendjen rrëqethëse të pensionistëve shqiptarë, të ish ushtarakëve, të ish të persekutuarve. Kryeministri Berisha nuk mund ta kuptojë se si jetojnë pensionistët shqiptar në fshat e në qytet me një pension qesharak prej (600-1000 lekë), që nuk i dalin as për të blerë barnat e ditës. Kundrejt kësaj situate dramatike, burimet zyrtare vijojnë të deklarojnë, se, "ushqimet kushtojnë më lirë, meqë shalqini e pjepri kushtokan më lirë se në dhjetor 2007".

Bush: Ekonomia amerikane është në "periudhë pasigurie". Kujtojmë, se me datën 29.1.2008, Presidenti i SHBA-ës, George Bush iu drejtua publikisht, popullit amerikan, duke u shprehur, se "Ekonomia amerikane është në "periudhë pasigurie".

Bush i drejtoi një apel anëtarëve të Kongresit: "Ne kemi shumë çështje për të zgjidhur dhe populli amerikan pret që ne t`i zgjidhím."Bush bëri disa herë apel për rritjen e bashkëpunimit mbipartiak të demokratëve dhe republikanëve, mungesa e të cilës ka bërë në të kaluarën që ligjet e reja të mos aprovohen.

Këtë rast po e marr si model të presidentit amerikan Bush, që kërkoi bashkëpunim me politikanët e vendit më të lirë e demokratik në botë.

E ndërsa Kryeministri shqiptar, jo vetëm që ka vënë veton e tij, por do të kontrollojë gjithçka dhe mbi çdo institucion, t'i emërojë dhe t'i ç'emërojë vetë. Dhe këtë e bën me kënaqësi, duke na deklaruar "suksese", vetëm "suksese", edhe pse ndërkombëtarët, disa herë i kanë tërhequr veshin për korrupsionin galopant që është instaluar në administratën qeverisëse. Po ku pyet Berisha, për "letrat higjienike", për akuzat që i drejtohen qeverisë së tij, ai vazhdon të punojë: "Qentë le të lehin, karvani të ecë përpara!"

Këto pra, janë dy qëndrime ekstreme, të deklarimit të kryetarit të shtetit më demokratik në botë të SHBA-së, George Bush, dhe me deklaratat përrallore të kryetarit të qeverisë të shtetit demokratik në Shqipëri, Sali Berisha. Kështu na dalka që shteti ynë është shumë më i përparuar ekonomikisht se edhe Amerika.

Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email |

Stampo artikullin |

Artikulli është lexuar 69 here