Video

Albert Zholi
a_zholi@yahoo.com

28 Qershor 2008 - Z. Rama fill pas Brukselit ju do të shkoni në fqinjin tonë jugor, cili do të jetë qëllimi i vizitës tuaj në Greqi?

Edi Rama: Partia Socialiste do të marrë pjesë në takimin e Asamblesë së Internacionales Socialiste (në Greqi), si një anëtare me të drejta të plota, ku ne do të shprehim me forcë reformat që janë ndërmarrë në Shqipëri, me aleancat e spektrit të majtë. PS shkon në Internacionalen Socialiste, mbas një dialogu shumë të madh me të gjitha shtresat e vendit, me gjithë shqiptarët dhe ne do të shprehim në këtë takim, rëndësinë shumë të madhe që kanë aleancat jo vetëm mes partive të Internacionales, por edhe mes partive të majta në Shqipëri. PS në këtë takim, do të shprehë qëndrimin në reformat e fundit në Shqipëri, problematikën shumë të madhe që ka demokracia shqiptare. Ne vazhdojmë të përkrahim gjithmonë e me shumë forcë, mbështetjen që kanë deputetët socialistë në parlamentin Europian, për të mbështetur zhvillimin e vendit tonë, anëtarësimin e Shqipërisë në NATO, futjen e Shqipërisë në familjen e madhe Europiane (sidomos pas takimeve të fundit në Bruksel).

Ju në takimet e pardjeshme me përfaqësues të lartë të BE dhe KE u shprehët se qeveria shqiptare nuk përmbush objektivat dhe nuk arrin të plotësojë detyrat e shtëpisë evropiane…

Edi Rama: Po. Eshtë e vërtetë. Pa dyshim që qeveria shqiptare nuk ka arritur dot të përmbushë objektivat dhe të plotësojë detyrat e shtëpisë evropiane. Nga ana tjetër ne si opozitë jemi të kënaqur që shohim se imazhi që opozita përcjell (siç e thashë pardje), është një imazh i pëlqyeshëm. Opozita përcjell një punë të duartrokitur dhe të pëlqyeshme, e cila është një shpresë e qartë që konfirmohet në të gjitha takimet që kemi marrë në turin “Dialog me Shqipërinë”. Në këtë dialog, ka dalë në pah roli i opozitës si një forcë që udhëheq me përgjegjshmëri kur është puna për interesat kombëtare dhe që nuk bën vetëm pasqyrimin e deformimeve të qeverisë, por krijon dritaren, ku njerëzit të shohin të ardhmen, ndryshimin. Tashmë populli e ka të qartë se ndryshimi që ne do të sjellim do të jetë një ndryshim i prekshëm, real, që qytetarët do ta shijojnë në jetën e tyre të përditëshme.

Ju pas takimit të Samitit të Internacionales Socialiste, a e keni në axhendë ndonjë takim me emigrantët në Greqi?

Edi Rama: PS dhe lidershipi i saj kanë treguar se është një parti serioze, kjo e treguar në mënyrën më të sinqertë në dialogun me të gjithë shqiptarët (e theksoj këtë me të gjithë shqiptarët). PS synon për një aleancë shumë të madhe, aleancë mbi të majtën dhe të djathtën, me qytetarinë shqipatre, për të patur mundësinë, që ky vend të jetë shumë më ndryshe se ç’është. PS kërkon që me zgjedhjet e vitit 2009, t’i jap një shans më shumë Shqipërisë, për t’u pranuar në familjen europiane. PS kërkon që me zgjedhjet e 2009, ne të kemi një realitet, komplet të ndryshuar në Shqipëri, të kemi, shumë më tepër hapësira, të kemi mundësi zhvillimi. Dhe natyrisht, do të ishte mëse i mangët dialogu i nisur, n.q.s nuk do të shtrihet në pjesën më aktive të shoqërisë shqiptare, me njerëzit e punës dhe të sakrificës, me njerëzit, të cilët për çdo ditë po e rrisin pozitivisht imazhin e Shqipërisë kudo në botë, me njerëzit që ndihmojnë në mënyrën më të madhe ekonominë shqiptare. Dhe pjesa më e madhe e këtyre emigrantëve është në Greqi. Aty janë afërsisht 700 mijë emigrantë, nga të gjitha krahinat e vendit, të cilët mbajnë kontakte të përditshme me atdheun dhe ne e çmojmë shumë punën dhe ndihmën e tyre. Ne i mbështesim ata në çdo moment dhe duam të njohim më nga afër shqetësimet e tyre. Por, PS, tashmë do ta ketë pjesë të veçantë të programit të sajë punën që duhet të bëjë me emigrantët tanë në Greqi (por edhe kudo ndodhen), punën për t’i afruar ata, për të shkëmbyer eksperiencat me ta. Prandaj, PS nuk mund të linte jashtë dialogut të saj me Shqipërinë hallet dhe shqetësimet dhe bashkëbisedimin miqësor me ta… Për këtë arsye, ne do të ndodhemi në Athinë ditën e diel mbasdite ora 18:00 (simbas Athinës) në Sheshin “Karaiskaqi”, Qendra Muzikore “Petro Lluka”, ku do të zhvillojmë një takim me të gjithë, emigrantët, me të gjithë shtresat e emigrantëve, pa dallim. Pra, do të jetë takim mes shqiptarëve, për të qarë së bashku hallet, për të evidentuar problemet. Ne në Athinë kemi strukturat tona të partisë, të cilat do të ndihmojnë në këtë organizim, por e theksova, pavarësisht organizimit, nuk do të jetë një takim me anëtarët dhe simpatizantët e PS (me ata do të kemi takime të veçanta), por ajo që kërkojmë është, të marrim prej tyre mesazhin dhe kërkesat e tyre të drejtpërdrejta. PS, me ekpertët e saj dhe me ekspertë ndërkombëtarë, po përgatit platformën e saj për bashkëpunimin dhe mënyrën e votimit të emigrantëve në zgjedhjet elektorale të vitit 2009. PS do të kërkojë fitoren në zgjedhjet e ardhshme, natyrisht, duke kërkuar shumë mbështetjen e emigrantëve.

Si do të arrihet që emigrantët të votojnë në mënyrë masive vitin e ardhshëm, duke pasur parasysh se në 18 vjet ata kanë votuar në mënyrë simbolike, për të mos thënë të papërfillshme, kur në emigracion janë rrethh 750 mijë emigrantë në moshë votuese?

Edi Rama: Ne do të kërkojmë që mbështetja e emigrantëve të shprehet në të gjitha mënyrat dhe në të gjitha format. Natyrisht Kodi i ri Elektoral, do të përcaktojë dhe mënyrën e votimit të emigrantëve. Por megjithë këtë, ne besojmë se, forca e emigrantëve është shumë e madhe, mbështetja apo lidhja e kahershme e familjeve shqiptare me pjestarët e familjes (emigracionin) tregon se ata kanë një ndikim shumë të madh tek mendimi i emigrantëve, pasi njohin punën e tyre. Viti 2009, kërkon ndryshimin e Shqipërisë dhe nuk kemi ku gjejmë një forcë apo grupim shoqëror, që, mund të mbështesin më shumë këto ndryshime, se forca dhe mendimi i emigrantëve, pasi ata tashmë janë më të emancipuar, më të civilizuar, më të edukuar me punën dhe përgjegjësinë e votës. Prandaj, ne si forcë e ndryshimit, do të kërkojmë që kësaj fuqie, t’i bashkojmë, bashkëngjisim, sakrificat, mundimin dhe vullnetin e emigrantëve shqiptarë kudo që janë, veçanërisht atyre në Greqi.

Paraprakisht, ju njiheni me problemet e emigrantëve tanë në Greqi?

Edi Rama: Sigurisht që po. Ne kemi kohë që po punojmë dhe po plotësojmë programin dhe përgatisim platformën tonë në drejtim të punës me emigracionin. Kemi një staf të specializuar që njihet dhe mban lidhje të vazhdueshme me emigrantët, një strukturë brenda PS-së. Konkretisht, katër janë problemet e emigrantëve tanë në Greqi: Legalizimi i emigrantëve (konkretisht i atyre që kanë mangësi në dokumentacion dhe mendohet se do të deportohen), mësimi i gjuhës shqipe, njohja e punës si emigrant si vite pensioni (në këtë drejtim duhet të punojmë për më tej sa është bërë me qeverinë greke për një marrëveshje më efikase) dhe problemi i fundit, zvarritja e madhe e procesit të legalizimit me radhë pa fund dhe me shkresurina burokratike që jo vetëm kërkojnë kohë, shuma të mëdha, por edhe dokumentacion pa fund, që në kuadrin e të qënit emigrant, nuk mund të realizohen. Në sajë të këtyre evdidentimeve, stafi ynë po bën detajimet për të bashkëpunuar, për t’i bërë prezent qeverisë greke, që, duke i shqyrtuar të mund të merren në konsideratë disa prej kërkesave që janë më evidente dhe thelbësore për punën dhe jetën e përditëshme të emigrantëve tanë në Greqi. Por të jemi real, të vetëdijshëm. Të gjitha problemet nuk mund të zgjidhen në një ditë, me një kërkesë, me një marrëveshje. Këto janë probleme të evidentuara dhe kërkesat tona do të jenë sistematike, racionale, të kujdesshme dhe shumë korrekte. PS është koshiente se problemet e emigrantëve nuk mund të zgjidhen menjëherë. Ekzistojnë disa faktorë.

Mund të na përcillini disa prej tyre?

Edi Rama: Janë shumë faktorë. Së pari, sepse ende vetë BE-ja, nuk ka një politikë standarte të unifikuar për emigracionin. Secili vend ka procese legalizimi që nuk përputhen me vendet e tjera. Kjo varet nga zhvillimi ekonomik dhe nga pozicioni gjeografik i vendit që është emigrant importues. Në këtë këndvështrim edhe problemet janë të ndryshme në vende të ndryshme, ku ka emigrantë shqiptarë. Së dyti, vetë Greqia nuk ka një eksperiencë në fushën e importit të emigracionit. Greqia deri në vitin 1988, ka qenë një nga vendet emigrant eksportues. Bile, një vend që zinte ndër vendet e para në Europë për eksportimin e emigrantëve. Parë në këtë detaj, eksperienca e saj nuk ka qenë në nivele që të përballonte jo vetëm fluksin e madh, por edhe me legjislacion. Greqia u ndodh e papërgatitur në këtë fushë dhe zvarritjet në procesin e legalizimit kanë ardhur dhe për këtë arsye. Pavarësisht se ne duam dhe shohim anën tonë të problemit, atë të të drejtave të emigrantëve tanë, kjo situatë ka rënduar në procesin e legalizimit të emigrantëve. Shteti grek nuk ka pasur struktura të veçanta të specializuara në këtë drejtim, gjë që e kanë vuajtur emigrantët e pafajshëm. Kalimi nga një vend emigrant eksportues në një vend emigrantimportues, s’nxorri në pah mangësitë në legjislacion, por edhe në mënyrën e pasigurt të menaxhimit të menjëhershëm të një situate të tillë të panjohur. Vetë qeveritë greke 1990-2007, e kanë pranuar këtë fakt.

Ju mendoni se PS me programin e saj është më afër emigrantëve në Greqi?

Edi Rama: Jo vetëm me programin, por ne jemi dhe fizikisht. Herë pas here deputetë apo anëtarë të Kryesisë jo vetëm në vizita zyrtare, kanë realizuar dhe realizojnë takime me strukturat tona kudo në Greqi si Athinë, Selanik, Janinë etj…Por me gjithë këto, nuk dua të them se puna jonë ka qenë perfekte, sistematike, me rezultat të kënaqshme. Jo. Këto janë hapat e para, ku ne jemi të bindur se puna jonë, politika jonë në drejtim të emigarcionit është më e pranueshmja, më e sinqerta dhe ka për të gjetur shtratin e ngrohtë tek pjesa dërrmuese e emigrantëve. Ne i njohim më mirë se çdo parti tjetër shqtësimet e tyre, ne njohim forcën e tyre dhe çmojmë në mënyrë të veçantë ndihmën që ata i japin atdheut. Vetëm emigrantët e Greqisë sjellin çdo vit në atdhe rreth 500 milionë dollarë, ose afërsisht gjysmën e atyre që sjellin emigrantët nga gjithë bota. Por dihet se, emigrantët në Greqi përbëjnë 55% të emigrantëve tanë në 46 vende të botës ku janë vendosur. Ndaj këtyre njerëzve punëtorë, vëmendja duhet të jetë më e madhe, pasi ata të imponohen me punën e tyre me vlerat e tyre intelektuale. Shumë prej tyre i sheh në fromacionet orkestrale nga më të dëgjuarat në Greqi, të tjerë në skuadrat më të mira të futbollit, volejbollit, peshëngritjes. Ata po i japin jo vetëm ndihmë ekonomike, por edhe emër Shqipërisë në Greqi. Janë ambasadorët më të mirë të kulturës shqiptare. Duke i njohur, detyrimisht hidhen vetiu themelet e miqësisë dhe bashkëpunimit.

Pas Greqisë ky tur do të vazhdojë dhe më tej në Itali apo në vende të tjera, ku ka emigrantë shqiptarë?

Po, padyshim. PS e ka në një nga prioritetet e punës së saj, vendosjen e një lidhjeje të vazhdueshme me emigrantët shqiptarë kudo që ndodhen. Ashtu si në Greqi, ne kemi ndërtuar strukturat dhe degët e PS edhe në Itali, dhe në disa vende të tjera të Europës dhe po punojmë seriozisht që këto lidhje t’i forcojmë. Ne jemi koshientë se me ndihmën e emigrantëve, të cilët shikojnë shumë më tepër se si duhet të bëhet dhe se si duhet të jetë Shqipëria, pa dyshim do të jetë pjesë e dabatit dhe punës tonë, në programin e ri elektoral. Ne tashmë me lidhjet tona, dimë që në Itali janë rreth 324 mijë emigrantë shqiptarë, të cilët, për nga numri, janë të dytët në Itali pas marokenëve. (pa marrë tashmë në konsideratë rumunët që janë futur në BE). Ashtu si dhe në Greqi, ne jemi në korrent të problemeve të emigrantëve në Itali, të cilët, në ndryshim nga Greqia, kanë disa kushte lehtësuese përsa i përket legalizimit dhe bashkimit familjar. Konkretisht, dimë se Italia ka lehtësime përsa i përketë bashkimit familjar në kushtet e të qënit prind.. Gjithashtu, vitet e fundit vihet re se lëvizjet e emigrantëve të Italisë drejt atdheut janë shpeshtuar jo vetëm për asrye të marrjes së dokumentacionit, por edhe për faktin se një pjesë e mirë e emigrantëve tanë aty, janë integruar në jetën e shoqërisë italiane si dhe një numër i madh (në mos gabojë rreth 24 mijë emigrantë) kanë hapur dhe aktivitetet e tyre private, sipërmarje të vogla dhe të mesme. Kjo falë punë së tyre të palodhur, por dhe njohjes së tregut të punës, përshtatjes në këtë treg dhe shpirtit të iniciativës për të hyrë në rrugën e biznesit dhe pse në një vend të huaj.

Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email |

Stampo artikullin |

Artikulli është lexuar 83 here