Video

info@hermesnews.org

26 Qershor 2008- Institucionet e Kosovës kanë përshëndetur arritjen e një marrëveshje ndërmjet demokratëve dhe socialistëve në Serbi për formimin e qeverisë së re atje, megjithëse nuk presin një ndryshim të madh në qasjen e Beogradit zyrtar ndaj çështjes së Kosovës. Zëvendëskryeministri i Kosovës, Ramë Manaj tha për BBC-në se çdo kombinim qeveritar që do të demonstrojë frymën proevropiane do të jetë në radhë të parë në dobi të vet Serbisë si dhe stabilitetit në rajon. Ai tha se qeveria e Kosovës e sheh me optimizëm formimin e qeverisë së re të Serbisë.

"Ndonëse nuk mund të them se presim efekte të drejtpërdrejta të relaksimit të marrëdhënieve, një kabinet qeveritar i cili do të demonstrojë në punën e tij frymën evropiane dhe orientimin për integrime evropiane, vlerësojmë se në mënyrë indirekte do të ketë efekte edhe në relaksimin e marrëdhënieve ndërmjet Serbisë dhe Kosovës", tha Manaj. Ndryshe mendon nënkryetari i Aleancës për Ardhmërinë e Kosovës në opozitë, Ahmet Isufi. Ai vlerëson se koalicioni ndërmjet Partisë Demokratike të presidentit Tadiç dhe Partisë Socialiste të ish presidentit, Slobodan Millosheviç është një aleancë e brishtë, pasi sipas z.Isufi këto dy parti nuk kanë asgjë të përbashkët. Ai thotë se Partia Socialiste nuk është reformuar as pas vdekjes së Millosheviç dhe ka të njëjtën qasje ndaj Kosovës. "Beogradi do të ndryshojë qasjen vetëm në sipërfaqe, por në thelb ajo do të jetë një politikë që ka vazhduar të jetë e tillë, e pareformuar dhe me mekanizma që janë anti-Kosovë, sepse tërë kohën është investuar që në Kosovë të ketë struktura paralele të ndihmuara nga qeveria e Beogradit dhe poashtu kemi të bëjmë me një qasje negative ndaj Kosovës", u shpreh Isufi.

Një përfaqësues i serbëve të Kosovës, Oliver Ivanoviç, që është poashtu zyrtar i Partisë Demokratike të presidentit Tadiç, thotë se qeveria e re në Serbi do ta ofrojë më shumë Beogradin me Brukselin. "Sa i përket Kosovës, është e sigurtë se kjo qeveri do të ketë një qasje pragmatike dhe unë insistoj në atë se duhet të merremi me statusin e njerëzve, sepse statusi i Kosovës nuk zgjidhet këtu, por në Nju Jork dhe në Bruksel. Prandaj kjo qeveri duhet të ketë një retorikë të tillë që mundëson vendosjen e marrëdhënieve më të mira me misionin ndërkombëtar në Kosovë, me UNMIK-u e kjo nënkupton kushte më të mira të jetës për serbët që kanë mbetur të jetojnë këtu", tha .Ivanoviç.

Rivendosja e dialogut Prishtinë-Beograd
Formimi i qeverisë së re në Beograd vlerësohet si i rëndësishëm në Prishtinë edhe për shkak të rivendosjes së dialogut ndërmjet Kosovës dhe Serbisë. Sekretari i Përgjithshëm i OKB-së, Ban Ki Mon ka propozuar që Prishtina dhe Beogradi të rifillojnë bisedimet në gjashtë fusha: në polici, drejtësi, dogana, menaxhim të vijës administrative, në ruajtjen e trashëgimisë fetare dhe në fushën e transportit dhe telekomunikacionit. Rolin udhëheqës në bisedimet e pritshme ndërmjet palës kosovare dhe asaj serbe pritet ta ketë UNMIK-u. Shefi i Misionit të Kombeve të Bashkuara në Kosovë, Lamberto Zannier ka deklaruar se sapo të formohet qeveria e re, do të vendos kontaktet me Beogradin, me qëllim të shikimit të mundësive për rifillimin e dialogut ndërmjet palës serbe dhe asaj kosovare.

"Unë po ndjek zhvillimet në Beograd dhe po pres formimin e qeverisë së re, pastaj menjëherë do të bëj kërkesë për hapjen e bisedimeve.
Do të shkoj në Beograd dhe do të shoh cili është interesi i tyre për këtë dialog, do të bisedoj me autoritetet serbe se si dëshirojnë t'i strukturojnë bisedimet. Do të shohim a ka kushte për të pasur takime të përbashkëta apo të zhvillojmë diplomaci fluturuese", tha Zannier. Kreu i UNMIK-ut ka thënë se roli i tij në bisedimet e pritshme ndërmjet Prishtinës dhe Beogradit do të jetë lehtësimi i tyre. "Nuk e shoh veten si ndërmjetësues, nuk e shoh veten duke propozuar ide apo iniciativa, unë dua të jem lehtësues dhe kjo është diçka që ua kam thënë qartë autoriteteve të Kosovës", deklaroi ai. Qeveria e Kosovës ende nuk ka një qëndrim rreth rifillimit të mundshëm të dialogut ndërmjet Prishtinës dhe Beogradit.

Zëvendëskryeministri Ramë Manaj tha se qeveria është duke analizuar nëse duhet të bisedohet me Beogradin për fushat të cilat i ka propozuar sekretari i përgjithshëm i OKB-së, Ban Ki Mon. Ai la të hapur mundësinë e bisedimeve për çështje teknike, por përjashtoi rihapjen e negociatave për çështjen e statusit. "Ajo çka nuk mund të bisedohet me Serbinë, por jo vetëm me te, çështjet rreth statusit. Statusi i Kosovës tashmë është definuar, është shpallur pavarësia, është njohur nga 43 vende, procesi i njohjes vazhdon dhe çështja e statusit është e padiskutueshme. Ne jemi të interesuar që me Serbinë të kultivojmë marrëdhënie të mira si me të gjitha vendet e rajonit dhe çështjet me interes reciprok edhe mund të shtrohen dhe diskutohen", tha zv/kryeministri Ramë Manaj.

Përfaqësues të opozitës ndërkaq e vlerësojnë të parakohshme idenë e Kombeve të Bashkuara për rivendosjen e dialogut ndërmjet Prishtinës dhe Beogradit. Nënkryetari i Aleancës për Ardhmërinë e Kosovës, Ahmet Isufi thotë se me Serbinë mund të bisedohet vetëm pasi ajo ta njohë pavarësinë e Kosovës. "Ne besojmë se Serbia ka obligim që të njohë realitetin e krijuar në Kosovë, të heqë dorë nga sistemi paralel që dëshiron ta krijojë me serbët e Kosovës përmes mbajtjes së zgjedhjeve jolegjitime, prandaj një dialog i tillë është herët të paramendohet. Duhet së pari, të dyja shtetet të kenë qasje më positive ndaj njëra tjetrës për të pasur mundësi që të kenë një dialog rreth Kosovës. Serbia nuk po tregon shenja të ndryshimit të pozicionit të saj dhe tani dialogu është shumë larg", tha z.Isufi.

Dialogu. jo në nivelin politik
Rivendosja e dialogut ndërmjet Prishtinës dhe Beogradit do të jetë një punë e vështirë. Kjo për shkak se Serbia refuzon ta pranojë palën kosovare në bisedime si delegacion të një shteti të pavarur dhe sovran. Politikani Serb, Oliver Ivanoviç thotë se bisedimet në nivelin e lartë politik, tani për tani, janë të pamundura. "Mendoj se vendosja e raporteve ndërmjet Prishtinës dhe Beogradit nuk është e mundur, së paku jo në nivelin e lartë politik, Serbia nuk e ka njohur dhe nuk do ta njohë pavarësinë e Kosovës. Rrjedhimisht ndonjë trup teknik mund të bisedojë, por organet më të larta shtetërore të Serbisë nuk do të përpiqen të kontakojnë me përfaqësuesit e Serbisë", thotë z.Ivanoviç dhe shton: "Dialogu është i nevojshëm gjithmonë por është me rëndësi që askush të mos nxjerrë përfundime politike. Kosova nuk mund të përfaqësohet në këto bisedime si shtet i pavarur. Nëse kemi një përfaqësim të institucioneve të përkohshme vetqeverisëse të Kosovës nën autoritetin e UNMIK-ut, mendoj se kjo do të paraqiste problem shumë më të vogël", shprehet politikani Serb, Oliver Ivanoviç.

Delegacionet e Prishtinës dhe të Beogradit janë takuar shumë herë gjatë procesit për zgjidhjen e statusit të Kosovës, por kanë dështuar të gjejnë një zgjidhje kompromisi, për shkak të qëndrimeve skajshmërisht të kundërta. Analistët thonë se është vështirë të besohet që Prishtina dhe Beogradi të mund të zhvillojnë bisedime që do të prodhonin ndonjë rezultat, përderisa Serbia nuk njeh realitetin e krijuar në Kosovë dhe vazhdon të forcojë strukturat e saj paralele. Në fundjavë udhëheqësit serbë kanë paralajmëruar formimin e një Kuvendi Serb të Kosovës, në të cilin do të marrin pjesë 45 përfaqësues të dalë nga zgjedhjet e fundit të Serbisë.

Dërgo me email |

Stampo artikullin |

Artikulli është lexuar 64 here