Video

Albert Zholi
a_zholi@yahoo.com

25 Qershor 2008 - Jovan Mëhilli është drejtor i Këshillit Pedagogjik të shkollës për mësimin plotësues të gjuhës shqipe në Greqi. Ai ka disa vjet që së bashku me shumë mësues të tjerë ka mundur të hapë disa kurse të mësimit të gjuhës shqipe në Athinë. Kjo është një nismë vullnetare, ku mësuesit japin mësim falas dhe si ambiente shkolle kanë përshtatur bërë ambientet e shtëpive të tyre. Para disa ditësh ai erdhi nga Athina dhe u takua me titullarë të Ministrisë së Arsimit për ecurinë e bashkëpunimit Ministri- Këshill Pedagogjik për mësimin e gjuhës shqipe të fëmijëve të emigrantëve në Greqi.

Z. Jovan kur është formatuar Këshilli Pedagogjik i Shkollës për mësimin e gjuhës shqipe në Greqi?

Puna për mësimin plotësues të gjuhës shqipe në Greqi ka filluar në 7 mars të vitit 1998, me një grup mësuesish që unë pata nderin që ta drejtoj. Në ato momente, ne më shumë mësuam për një problem aktual që ekzistonte në Greqi, ku konkretisht më shumë se dy mijë fëmijë nuk shkonin në shkollat greke dhe për fat të keq një pjesë e tyre kishte marrë rrugën e gabuar të gënjyer nga individë të pandershëm, të cilët i kishin kthyer ata në vjedhësa dhe në lypësa dhe nëpërmjet një materiali zyrtar ne i ja kemi bërë menjëherë prezent Ambasadës Shqiptare në Athinë, Ministrisë së Jashtme dhe Ministrisë së Arsimit. Fakti është se pati një reagim dhe erdhi një dokument nëpërmjet Ministrisë së Jashtme, Ambasadës Shqiptare drejtuar në emrin tim, ku u thirra në atë kohë në Ambasadë dhe më është dorëzuar një material, ku kërkohej një bashkëpunim. Ky ishte edhe bashkëpunimi i parë me shtetin shqiptar. Në nëntor po të këtij viti 1998, unë jam ndodhur në Ministrinë e Arsimit në Tiranë për një takim pune me një grup pune, ku na shoqëronte edhe doktor profesor Shefik Osmani, me të cilin i bëmë prezent ministrit shqetësimet tona. Pata rastin që edhe më 9 nëntor të atij viti të ndodhesha me një dokument, ku e firmosën dy ministrat respektivisht për krahun tonë Ruka dhe për palën greke ministri i Arsimit i asaj kohe.

Ç’përmbante ky dokument?

Në një nga pikat e këtijë dokumenti flitet se do të përmbushet kërkesa e grupimit tonë mësimor në Greqi që Ministria e Arsimit e Greqisë do të bënte përpjekje dhe do të na krijonte mundësitë që ne t’i organizonim fëmijët tanë pranë shkollave greke për të mësuar gjuhën shqipe. Pala jonë (si mësues) mori përsipër sigurimin e kontigjentit të mësuesve, pregatitjen e tyre pedagogjike shkencore dhe Ministria e Arsimit u angazhua që të na plotësonte dhe me tekstet. Fatkeqësisht kjo pikë nuk u realizua dhe deri më sot nuk është realizuar. Ndërsa Ministria jonë e arsimit ka ecur shumë përpara. Janë realizuar shumë pika nga ato që kërkoi ministria. Sot në Shqipëri ka shumë shkolla greke. Ndërsa Ministria e Arsimit e Greqisë nuk ka asnjë angazhim për këtë problem. Këshilli Pedagogjik u krijua në Durrës, në seminarin e Korrikut të vitit 2007, është përshëndetur nga figura të nderuara të Ministrisë së Arsimit të Shqipërisë dhe Ministrisë dhe Teknologjisë së Kosovës, nga pedagogë dhe arsimdashës nga e gjithë diaspora shqiptare që ndodheshin në Durrës. Ne zakonisht i bëjmë mbledhjet të organizuara të Këshillit Pedagogjik dhe me shumë sukses në Mars ne mundëm që të realizojmë edhe seminarin e parë Pedagogjiko-Shkencor për të cilën e ndoqi me vëmendje nga fillimi dhe deri në fund edhe ambasada jonë.

-Aktualisht kush është problemi kryesor në Greqi për mësimdhënien ose organizimin e mësuesve për dhënien e mësimit në gjuhën shqipe?

-Ne në listat tona të evidentuara kemi mbi 136 mësues, të cilët janë me arsim të lartë për ciklin e ulët, të cilët kanë një stazh prej 3-4 vjetësh në arsim në Shqipëri. Zotërojnë shumë mirë edhe gjuhën greke, por edhe gjuhë të huaja. Ata kanë një nivel shkencor Pedagogjik–Psikologjik të admirueshëm. Ne e kemi kontigjentin e nxënësve. Janë mbi 68 mijë fëmijë që i përkasin atij cikli që në Greqi i thonë Dhimotiko, që do të thotë nga klasa e parë deri në të gjashtën. Ekziston gatishmëria e të dy palëve. Pra, përderisa ekziston mësuesi dhe ekziston edhe nxënësi për mendimin tim çdo gjë është e zgjidhur. Pengesa është fakti sepse ne na mungojnë dhe na mohojnë ambjentet dhe në shkollat greke ne jemi pa drejtori. Edhe në bashkitë e periferive që jemi paraqitur na kanë thënë se ne jemi gati t’u vemë në dispozicion shkollat, por mjafton vetëm një urdhëresë e Ministrisë së Arsimit. Këtë gjë ministria jonë nuk e ka zgjidhur dhe me sa shikoj nuk e ka dëshirën e mirë për ta zgjidhur. Ne kemi një shtrirje në të gjithë territorin grek gati tetë klasa i kemi në Athinë, 7-8 klasa i kemi në Selanik, 4 klasa i kemi në Volos, 3 klasa i kemi në Larisa, kemi në Kreta, por kemi edhe në ishujt në skajet më të largëta. Në qoftëse ne do t’i grumbullojmë këto të gjitha dhe të themi se kjo përbën një shkollë për mësimin e gjuhë shqipe. Afërsisht janë 40 klasa, ku jepen mësim nga mësues të specializuar dhe një numër mbi 700 fëmijë. Por ajo që na pengon ne e para është mungesa e ambientet (sepse mund të kishim edhe 200 klasa) dhe e dyta dhe që është më kryesorja, është se ne i kemi paraqitur kërkesat tona vazhdimisht që të kemi një qendër që do ta quajmë drejtori ose me një emërtim tjetër dhe nuk është e vështirë që qeveria jonë të sponsorizojë dhe të na e garantojë këtë në Athinë si edhe mësueset të kenë një shpërblim modest për punën e tyre që bëjnë. Unë di që Kryeministri është shprehur për një angazhim të tillë. Ne i kemi dërguar edhe një letër ministrit të Jashtëm, ministrit të Arsimit dhe Kryeministrit i është dërguar një material konkret, por faktikisht ne nuk kemi marrë asnjë përgjigje.

- A nuk mund të zhvillohet mësimi brenda shkollave publike greke në klasa të veçanta....?

-Ne kemi bërë një studim konkret. Në Greqi shkollat janë me numra, si shkolla 48, 58, etj., etj.. Ne kemi bërë evidentimin e fëmijëve shqiptarë dhe nuk ka shkollë në Greqi që ne të mos gjejmë një kontigjent nxënësish që të paktën të hapnim atje dy klasa mësimi me 25-30 fëmijë. Kjo është një garanci që ne mund të hyjmë në këto ambjente. Nëse do të bëhet e mundur, programi jonë është i tillë, ku do të hyjmë gjithmonë edhe jashtë orarit që fëmijët shqiptarë të kenë mbaruar mësimin në gjuhën greke. Ne mund të hyjmë të premten mbasdite, mund të hyjmë të shtunave paradite dhe të dielave paradite dhe shumë drejtorë shkollash janë treguar të gatshëm. Ata vetëm presin një zgjidhje një konsensus. Me sa kuptojmë ne, këto kanë qenë biseda ndërmjet dy ministrave, por asgjë nuk është bërë me shkrim. Nëse nuk realizohet kjo është e kotë dhe Këshilli Pedagogjik të shpërbëhet. Nuk mund të punohet gjithmonë në të njëjtat kushte.

-Po shoqatat e tjera shqiptare a ju kanë mbështetur në këtë nismë tuajën kaq fisnike?

-Unë vetë jam pjesëtar i një shoqate dhe njoh shumë derjtues shoqatash. Këto probleme janë programuar nga shoqatat dhe të gjithë shoqatat këtë e kanë pjesë të programit të tyre. Nga eksperienca dhjetëra vjeçare që ka diaspora këtë problem, nuk mund ta ndiqnin në veçanti çdo shoqatë sepse në drejtimin e shoqatës mund të jetë edhe një agronom, teknik apo elektricist, kështu ato nuk e njohin mirë arsimin sikundër unë nuk jam i aftë të merrem që të organizoj një ekip mjekësor ose ushtarak. Pikërisht ky problem ka dalë si rezultat i debateve dhe i diskutimit në shoqata dhe lindi nevoja që të organizohet një Këshill Petagogjik që ne nuk jemi si shoqatë, por jemi një organizatë shkencore dhe qëndrojmë në mes të dy ministrive të Arsimit të dy vendeve. Mbështetja e shoqatave është morale.

-Po përçarjet a ekzistojnë në këtë Këshill Pedagogjik?

-Përçarjet janë bërë normale, por ajo që është kryesore është fakti se ne si Këshill Pedagogjik kemi marrë përshëndetjen jo vetëm të shoqatave, por edhe të shumë grupimeve shoqërore që nuk bëjnë pjesë në shoqata, individëve, të moshuarve, gazetarëve. Kemi dhënë emisione në radio në gjuhën shqipe (radiot greke).

Si po e propogandoni punën dhe funksionimin e Këshillit Pedagogjik?

Për këtë janë hapur faqe të tëra në internet për shkëmbim përvoje. Ajo që na pengon është indiferentizmi i theksuar i institucioneve tona në Shqipëri. Kemi afërsisht mbi 100 mijë fëmijë, nxënës, gjimnazistë, paragjimnazistë studentë etj., që mësojnë në shkollat greke. Ne jemi qytetarë të shtetit shqiptar dhe sipas Kushtetutës shteti përgjigjet për shtetasit e vet. Nuk duam të na gënjejnë, por të na mbështesin. Problemi është serioz. Për këtë duhet të punojmë dhe të kujdesemi të gjithë. Eshtë përgjegjësi kombëtare humbja e gjihës shqipe tek fëmijët. Heshtja ndoshta do bëjë që një ditë ne të shpërndahemi. Prandaj po përpiqemi dhe jemi të vendosur që gjuha shqipe tek fëmijët e emigrantëve shqiptarë të mos humbasi.

-Ç’problem tjetër kanë emigrantët tanë në Greqi duke pasur parasysh që legalizimi ndikon edhe në shkollimin e fëmijëve?

-Javët e fundit ndihet një lëvizje për largimin e emigrantëve jo vetëm shqiptarë, por edhe të vendeve të tjera, por informacioni që kam unë mund të them që është edhe zyrtar se do të largohen ato emigrantë që nuk kanë mundur dot të legalizohen, ose që nuk kanë mundur dot të paraqesin dokumentet për t’u legalizuar. Me një fjalë ai që nuk i ka bërë këto do të largohet. Ne dëshirojmë që të mos ndodhë, por kjo edhe mund të ndodhi, ndërsa për pjesën tjetër që janë të ligjëruar që kanë marë lejen e qëndrimit ose që presin ta marrin lejen e qëndriomit nuk besoj se ato do të kenë probleme largimi. Por megjithatë kjo ka krijuar një farë tensioni, një mosbesim tek emigrantët shqiptarë duke filluar edhe nga unë se nesër çdo gjë mund të ndodhë, këto leje që kemi ne janë provizore, janë me një hark kohor shumë të shkurtër. Fakti që qeveria greke edhe ndryshimet e reja të projektligjit nuk i mori parasysh kërkesat tona, tregon se gjithmonë jemi të rrezikuar.

Në takimin që patët në Ministrinë e Arsimit çfarë diskutuat?

Për mënyrën e organizimit dhe funksionimit të mëtejshëm të Këshillit Pedagogjik. Unë u bëra prezent edhe njëherë shqetësimit tona. N.q.s nuk do të gjejmë përkrahjen, do detyrohemi të shpërndahemi dhe pastaj pasojat dihen. Një nga përgjigjet pozitive për bashkëpunim të mëtejshëm është dhe trajimi që do t’i bëhet 20 mësuesve të Këshillit tonë Pedagogjik në 20 Korrik në një Seminar specifik në Strugë. Pashë njëfarë impenjimi, ishallah na del për hajër. Problemi është shumë shqetësues.

Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email |

Stampo artikullin |

Artikulli është lexuar 57 here