Video

Albert Zholi
a_zholi@yahoo.com

25 Qershor 2008 - Jeni kryetar komune i një zone të rëndësishme turistike siç është Ksamili që keni fituar besimin e zgjedhësve për të dytin mandat radhazi?! Si e keni justifikuar kete besim?

Besimi që më kanë dhënë bashkëqytetarët e mi, që më rizgjodhën për herë të dytë Kryetar i komunës Ksamil ja dedikoj përkushtimit tim për t’i shërbyer qytetit dhe qytetarëvë, mirëkuptimit qytetar të ksamiljotëve. Në bashkëpunim me njëri-tjetrin jemi prezent në ndryshimet e prekshme, jetike, të domosdoshme dhe të pandalshme edhe pse të vështira.

Sa ka ndikuar mosha e re si intelektual me vizion dhe profesioni si inxhinier ndërtimi në besimin që ju është dhënë dhe në arritjet e shënuara?

Mosha dhe profesioni, natyrisht që kanë ndikuar në mënyrë pozitive. Kam mbaruar studimet në Fakultetin e Inxhinierisë së Ndërtimit Tiranë, kam një përvojë si projektues në subjektet private në Tiranë dhe për disa vite rresht kam punuar si përgjegjës i Zyrës së Urbanistikës në Ksamil. Në vitet 2001-2003 kam drejtuar studio private projektimi. Kjo përvojë më dha sigurinë dhe vizionin e nevojshëm për një zonë turistike, për të cilën nevojë e dorës së parë është hartimi i planit të përgjithshëm rregullues. Me ekipin e specialistëve të komunës kam synuar drejt një zhvillimi të ekuilibruar dhe një turizmi të padëmshëm. Kështu do të përmendja paraprirjen me projekte konkrete për probleme të mëdha të infrastrukturës. Përpara planifikimit urban dhe ndërtimeve po synohet të bëhen studime për ndikimin që ato do të kenë në mjedisin vendas. Të gjitha këto bënë që Ksamili sot të mos vuajë problemin e ujit të pijshëm, të ketë qendrën dhe akset kryesore rrugore të ndriçuara, një pjesë të mirë të segmenteve rrugore të asfaltuara, dhe shtimin e sipërfaqeve të gjelbëruara.

Jo rrallë kemi dëgjuar që Ksamili të përmendet për ndërtimet pa leje?!

Është e vërtetë që informaliteti në fushën e ndërtimeve është problem kryesor. Por, unë mendoj se problemi nuk zgjidhet thjesht duke i evidentuar ndërtimet pa leje. Problemi është kompleks. Ndryshimet demokratike të pas 90-ës, mungesa e legjislacionit të plotë dhe kompetencave të pushtetit vendor në fushën e planifikimit urban, moshartimi i planeve urbanistike në kohë, moszgjidhja e problemit të pronësisë, etj., janë probleme madhore, moszgjidhja e të cilave ka çuar në një situatë të pakontrolluar. Sigurisht që ne kemi bërë dhe vazhdojmë të bëjmë përpjekje maksimale për të ruajtur vlerat e kësaj zone turistike. Për këtë, kemi hartuar planin e përgjithshëm rregullues të Ksamilit, I cili është miratuar me vendim nr.4 datë 18.12.2004 të KRRTRSH-së. Është ndër njësitë e rralla vendore që ka një plan rregullues të miratuar. Në bregdetin e Ksamilit (100 m larg nga vija e ujit) nuk ka asnje ndërtim pa leje, me konstruksione betoni apo murature. Ndërtimet nuk i kalojnë lartësinë mbi 3 kate, dhe kemi një skemë rrugore plotësisht të zbatueshme, të pa zëna me ndërtim, janë ruajtur hapësirat e nevojshme për territore të gjelbërta, territore sportive, objekte social-kulturore, administrative, etj. Hapja e këtyre hapësirave publike është bërë duke goditur një numër objektesh në ndërtim e sipër, me vendim të KRRT-së së Komunës, në bashkëpunim me Policinë Ndërtimore dhe Policinë e Rendit. Aktualisht, janë bllokuar mjetet e gërmimit dhe makineritë e transportit të inerteve, për të bërë të mundur ruajtjen e hapësirave të mbrojtura dhe mosdëmtimin e vijës bregdetare.

Diçka rreth sezonit turistik 2008 në komunën tuaj?!

Sivjet Ksamili, mrekullia e bregdetit shqiptar i pret dhe akomodon pushuesit e vet në kushte shumë më të përmirësuara, për sa i përket infrastrukturës, si ndriçimi, gjelbërimi, zgjerimi i plazheve publike, pastërtia në ambiente publike dhe plazhe, ujë të bollshëm, ambiente shërbimi për gjatë gjithë vijës bregdetare duke përfshirë këtu disko, pub-e, dhe në shërbim të pushuesve është Qendra e Artit “DEA” më e mira qendër kulturore në të gjithë bregdetin e Shqipërisë, si për profesionalizmin me të cilin ajo drejtohet nga bashkëshortët Limoz dhe Adriana Dizdari, ashtu dhe për ambientet me të gjitha komoditetet bashkëkohore që ofron kjo qendër. Mbi të gjitha pushuesit në Ksamil do të gjejnë qetësinë dhe mikpritjen e ksamiljotëve.

Turizmi familjar fton “Si në shtëpinë tuaj”

Më tepër se kudo në Ksamil është i zhvilluar turizmi familjar. Vërejmë se tendenca e pushuesve nuk është për hotele me shumë yje, por ata frekuentojnë turizmin familjar, shtëpitë me kopshte të gjelbëruara, me pastërtinë, përkujdesjen dhe mikpritjen tradicionale. Për te nxitur mjediset e gjelbra, kemi bërë traditë çdo vit në çeljen e sezonit turistik zhvillojmë konkursin “Shtëpia me kopshtin më të bukur”.

Brenda territorit të komunës suaj ndodhet dhe Butrinti magjik....

Komuna Ksamil ka një pozicion gjeografik mjaft favorizues i shtrirë midis Qytetit Antik të Butrintit dhe qytetit të bukur të Sarandës. Në fakt Parku Kombëtar i Butrintit ndodhet brenda territorit të komunës Ksamil. Sfida qëndron në kombinimin e zhvillimit me ruajtjen të paprekur për brezat e ardhshëm të bukurisë dhe shpirtit të Butrintit, të këtij vendi që rrallë gjendet gjetkë në Mesdhe. Kam synuar t’i bëj të njohur komunitetit vlerën e madhe të parkut kombëtar të Butrintit si burim identitetit kulturor dhe krenarie kombëtare, i një bukurie të rrallë natyrore, një qendër e një rëndësie të veçantë historike dhe arkeologjike. Në këtë mënyrë qytetarët po ndërgjegjësohen, çdo ditë e më tepër, për fatin që janë banorë të kësaj zone turistike, e cila u jep mundësi punësimi dhe të ardhurash. Gjithashtu bashkëpunimi me drejtuesit e Parkut ka qenë dobiprurës.

Diçka për planet e së ardhmes?!

Me iniciativën e komunës dhe mbështjetjen e biznesit ka përfunduar hapja e trasesë së shëtitores përgjatë bregdetit, në një gjatësi 2.7 km. Po bëjmë të gjitha përpjekjet dhe besojmë shumë tek Kryeministri i vendit se kësaj nisme qeveria do t’i përgjigjet me financimin e plote të projektit të shëtitores, e cila është prioritet dhe domosdoshmëri për Ksamilin, pushuesit dhe mbrojtjen e gjithë vijës bregdetare nga abuzimet e mundshme.

Krahas shëtitores së sipërpërmendur, në vazhdim është ujësjellësi i Ksamilit, rrjeti i brendshëm, i cili do të sigurojë ujin e pijshëm 24 orë. Ndriçimi i rrjetit rrugor të brendhsëm është tjetër prioritet i yni, ashtu siç është prioritet rikonstruksioni i rrugëve kryesore, shtimi i sipërfaqeve të gjelbra dhe si project madhor do të jetë rrjeti i kanalizimit dhe përpunimit të ujrave të zeza, zbatimi i këij projekti sigurisht kërkon financime të konsiderueshme.

Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email |

Stampo artikullin |

Artikulli është lexuar 73 here