8/18/2012 10:13:41 AM

Sarandë: Sa fitoi bashkia nga taksa e shezlongëve këtë verë ?

Të ardhurat e siguruara nga vjelja e kësaj takse kane arritur në shifrën e 2.5 milionë lekëve

SARANDË - Vjelja e taksës së shezlongëve të plazheve është bërë një burim i mirë të ardhurash për bashkinë e Sarandës këtë verë. Burime nga kjo bashki bëjnë të ditur se janë 50 subjekte që ushtrojnë këtë aktivitet, duke marrë nga qeverisja vendore sipërfaqe të caktuara plazhesh në përdorim, por duke iu nënshtruar taksimit 50 lekë për çdo shezlong.

Timo Mërkuri, drejtor i tatim-taksave në bashki, tha se të ardhurat e siguruara nga vjelja e kësaj takse kane arritur në shifrën e 2.5 milionë lekëve. Sipas tij, kjo shumë është pesë herë më e lartë se ajo e regjistruar në të njëjtën periudhë të vitit të kaluar.

“Shumëfishimi i të ardhurave lokale vetëm nga ky zë, do të thotë se çdo detaj është evidentuar me saktësi dhe biznesi është ndërgjegjësuar se duhet të shlyejë edhe pjesën e detyrimit të vendosur nga pushteti vendor, krahas mundësisë së krijuar për të siguruar fitimet e veta nga ky aktivitet sezonal”, sqaron Mërkuri.

Ai thote se për të mos e renduar biznesin, shlyerja e këtij detyrimi është ndarë në dy këste dhe deri tani vetëm pesë subjekte janë pa paguar këstin e dytë. Risia e këtij sezoni në Sarandë është se edhe vetë bashkia operon me shezlongët e saj në plazhe, duke konkurruar me gjysmën e çmimit privatët.

HermesNews - © 2012

Dërgo me email | Stampo artikullin | Artikulli është lexuar 122 here