8/15/2012 10:40:18 AM

Durrës: Investim 159 milion Lekësh në port

Rruga ekzistuese do të zgjerohet dyfish deri në terminalin e trageteve, me një gjatësi prej 821 metra linear dhe në të mund të udhëtojnë gjashtë automjete njëkohësisht

DURRËS - Rruga hyrëse e automjeteve në portin e Durrësit do të ketë së shpejti një pamje krejtësisht të re, falë një investimi prej 159 milionë lekë, financuar nga Autoriteti Portual (APD).

"Rindërtimi i saj do të lehtësojë hyrjen dhe daljen e automjeteve nga porti më i madh i vendit, duke garantuar edhe parametra të lartë të sigurisë", tha Drejtori I APD, ing. Eduard Ndreu.

Drejtori Ndreu shtoi se, "në projekt është parashikuar edhe ndërtimi fillestar i një rruge të re që i drejton automjetet e interesuara drejt kalatës lindore, ndërsa siguron një shesh parkimi të përkohshëm për të gjithë automjetet që nuk kanë prenotuar më parë lundrimin me tragete".

Sipas të njëjtit burim, pika e kontrollit të automjeteve në pjesën jugore të portit do të rindërtohet sipas standardeve të reja rreth 130 metra larg vendit ekzistues, brenda territorit portual.

"Ne duam të krijojmë kushte normale për një projekt të ardhshëm që i lidh rrugët aktuale të mbikalimit në urën e Dajlanit me të gjitha rrugët hyrëse të portit, që vijnë nga jugu dhe pjesa qendrore e vendit", u shpreh drejtori i APD.

Një projekt shtesë do të sigurojë peshimin dinamik në lëvizje të të gjitha automjeteve të rënda që hyjnë dhe dalin nga porti. Punimet do të kryhen nga firma "Varaku", e cila fitoi edhe tenderin përkatës, ndërsa po kryhen procedurat e fundit për të siguruar zgjerimin normal të rrugës në anën e ish-depozitave të karburanteve. "Sipas kontratës punimet duhet të përfundojnë 6 muaj pas fillimit të tyre", përfundoi drejtori i APD-së, Eduard Ndreu.

HermesNews - © 2012

Dërgo me email | Stampo artikullin | Artikulli është lexuar 106 here