8/3/2012 1:54:13 PM

Vlore. Plagosen kater persona

Shkaku 'konflikti i pronesise' dhe probleme te tjera

VLORE- Një konflikt pronësie në Vlorë u shoqërua me plagosjen e katër personave, ndërkohë që policia arriti të kapë 6 autorët e dyshuar, pas një ndjekje të gjatë me automjete dhe përplasje. Burime zyrtare të policisë bënë të ditur se "një konflikt pronësie mes dy personave, bashkëpunëtorë në një marrëdhënie biznesi, është shndërruar në një konflikt ku janë përfshirë dhe persona të tjerë, çka është finalizuar mbrëmjen e të enjtes me krismat e armëve, ku kanë mbetur të plagosur 4 vetë, por pa rrezik për jetën".

Burimet e mësipërme sqaruan se "mbrëmjen e vonë të të enjtes në sallën operative të Drejtorisë së Policisë së Qarkut, është marrë njoftim se në lagjen "Pavarësia" ka pasur një konflikt, i cili është shoqëruar me të shtëna armësh dhe plagosjen e katër personave".

Në vendngjarje kanë shkuar shërbimet e Drejtorisë së Policisë së Qarkut që janë vënë në ndjekje të autorëve, të cilët janë larguar me dy automjete në drejtim të Fierit.

Brenda një kohe të shkurtër janë identifikuar automjetet me të cilat u larguan të dyshuarit dhe u organizua një operacion i gjerë, ku u përfshinë 50 efektiva të policisë. Sipas policisë, në km e 6-të të autostradës Levan-Tepelenë u kap një prej automjeteve tip "Ford", model amerikan me 4 persona, ndërkohë që disa orë më vonë, pas ndjekjes së vazhdueshme dhe pas një përplasjeje me mjetet e uniformave blu, në të njëjtin aks rrugor, por dhjetra kilometra më në jug, në hyrje të qytetit të Tepelenës, u kap edhe automjeti tjetër tip BMW X6, me 2 shtetas të tjerë që ndodheshin brenda saj.

Nga strukturat e Drejtorisë së Policisë Vlorë është bërë neutralizimi i këtyre personave dhe shoqërimi i tyre për në mjediset e komisariatit. Policia bëri të ditur zyrtarisht se, nga hetimet intensive të kryera në lidhje me këtë ngjarje ka rezultuar se shtetasi Alban Xhillari, 42 vjeç, në bashkëpunim me shtetasit Edmond Berisha, 36 vjeç, Gentian Kola, 32 vjeç, Artan Kola, 38 vjeç, Ardian Rexhepi, 31 vjeç, banues në Tiranë dhe Panajot Zoto, 46 vjeç, banues në Vlorë, mbas një konflikti për motive pronësie me shtetasit Krenar Cena, 47 vjeç, Hiqmet Çobaj, 46 vjeç, banues në Vlorë, Përparim Molla, 40 vjeç e Qemal Dedja, 43 vjeç, banues në Tiranë, kanë plagosur këta të fundit me armë zjarri tip pistoletë.

Policia gjeti edhe një armë tip pistoletë, me të cilën dyshohet të jetë qëlluar nga të dyshuarit dhe që u sekuestrua në cilësinë e provës materiale. "Konflikti midis këtyre shtetasve ka ndodhur mbas disa mosmarrëveshjeve për shkaqe pronësie midis shtetasit Alban Xhillari dhe shtetasit Krenar Cena, të cilët kanë qënë ortakë në një biznes ndërtimi", saktësuan burimet zyrtare të policisë。

HermesNews-©2012

Dërgo me email | Stampo artikullin | Artikulli është lexuar 121 here