6/29/2012 1:05:41 PM

Industria e veshjeve në Shqipëri

Konkurenca e veshjeve me marka të huaja, rëndon industrinë vendase

TIRANË - Industria shqiptare e veshjeve, e varur kryesisht nga puna me porosi nga sipërmarrës italianë, grekë dhe gjermanë përballet sot në vend me një treg në konsolidim të përvitshëm me rrjete njësish tregtare me emra të njohura firmash botërore.

Rrezikshmëri për industrinë shqiptare të veshjeve paraqet konsolidimi nga viti në vit i sektorit të shitjes me pakicë të veshjeve, pasi vërehet se tregu i brendshëm ka nisur të zotërohet nga marka të mëdha ndërkombëtare, të cilat kanë hapur dyqanet e tyre, kryesisht në Tiranë. Edhe kriza greke ka ndikuar në nivelet e prodhimit duke prekur industrinë shqiptare të veshjeve, ku dhjetra firma kryesisht të vogla janë mbyllur.

Një projekt i USAID-it synon rritjen e numrit të ndërmarrjeve të veshjeve që prodhojnë me cikël të mbyllur, ndërsa përvoja të tilla prej vitesh nuk mungojnë në Shqipëri.

Me markën "SAM", fabrika e parë shqiptare prej disa vitesh ka dalë në tregun e huaj përëndimor me prodhime veshjesh. Inxhinierja e tekstilit, Mimoza Vojka Emanuels me ndërmarrjen e saj që ka të njëjtin emër si të markës "SAM", nga 2008-ta prodhon veshje me cikël të mbyllur dhe deri tek tregu i njësive të shitjeve në perëndim.

SAM punon në prodhimin e veshjeve sportive me teknologjinë më të re në Europë, “printim dixhital”, që përfshin modelet, stampimin, prerjen, qepjen, paketimin, dërgimin me Cargo në destinacionin e kërkuar. "Në Shqipëri klientët tanë janë bërë të gjitha kompanitë e mëdha që promovojnë produktet e tyre të reja me veshjet e që mbajnë markën e SAM-it", thotë Mimoza Emanuels.

Pedagogia e modës dhe dizajnit në fakultetin e Inxhinierisë së Tekstilit, Vojsava Karagjozi ja ka dalë të prodhojë koleksionin e parë industrial të veshjeve me 40 modele pantallonash femra dhe meshkuj në markën personale “Mis Faris”, të cilat tregtohen në tregjet brenda dhe jashtë vendit.

Gjithçka ka ardhur pas 15 vite pune si stiliste e Alta Moda-s në qendrën “Vojsava Fashion House” ku prej 12 vitesh prezanton koleksionet me nga 16 modele të reja në vend dhe panaire ndërkombëtare. Veç shtëpisë së modës familja zotëron dhe fabrikën e veshjeve “KonfTirana” ku punohet për markën personale "Mis Faris".

Ja kanë dalë me biznesin e tyre familjar që të prodhojnë me cikël të mbyllur pas 15 vitesh punë dhe ndjekjen me pasion Alta Moda-n në panaire në Gjermani dhe Itali. Gjykon se ka shumë firma shqiptare që mund të dalin në tregjet e huaja me markën shqiptare të modës, pasi zotërojnë teknologji, cilësi prodhimi, përvojë pune me firma të mëdha dhe prodhojnë e shesin për tregun shqiptar me çmime më të ulta se veshjet e importit.

Në Berat, Alda Cuadari prodhon veshje intime me cikël të mbyllur, me markën e njohur franceze gati dyshekullore "Liabel" ndërsa ka çelur dyqanet e para në Tiranë, Berat, Fier e Korcë, me perspektivë për më tej edhe në tregun rajonal.

Për të, fasoni është vetëm një pjesë e zinxhirit të veshjeve, pasi çdokush që punon në këtë fushë duhet të synojë ciklin e mbyllur. Vetë Alda Cuadari është në punë e sipër për markën e vet shqiptare. "Synoj të gjej vetë tregun. Eshtë sfida ime, kam përvojë dhe janë të pakta firmat që prodhojnë në fushën time, jam e vetmja firmë 100 % shqiptare e veshjeve e kompletuar për prodhimin e veshjeve të brendshme", thotë ajo.

Teuta Qose la Francën për vendlindjen, Beratin, drejt biznesit të fasonit si administratore e firmës “Malotex” që prodhon konfeksione për hoteleri dhe spitalet për tregun francez. Punojnë për llogarit të firmës franceze “Gissus Gizele”, e njohur për fabrikat e shumta të prodhimi të veshjeve jo vetëm në Francë. Por "Malotex" sapo ka përfunduar dhe fabrikën e re moderne të dytë në Berat për të rritur prodhimin dhe këtë herë edhe për tregun vendas.

Prodhimet tekstile për vitin 2011 u llogaritën në 17.1% të totalit të eksporteve shqiptare. Ato paraqesin një rritje vjetore mesatare në vitet 2000-2008 prej 8%-10%, ku tregjet kryesore të eksporteve të veshjeve me fason janë me 78% Italia, me 16% Greqia dhe me 6% Gjermania, duke zënë 99.7% të totalit të eksporteve të veshjeve "Made in Albania".

HermesNews - © 2012

Dërgo me email | Stampo artikullin | Artikulli është lexuar 606 here