6/22/2012 6:30:14 PM

Fratari: të hiqet tarifa doganore prej 33% e importit të çimentos

Konfindustria Shqiptare i bën apel institucioneve të Kosovës për heqjen e tarifës doganore prej 33 % për importin e çimentos

TIRANË - Konfindustria Shqiptare i ka kërkuar të Premten, institucioneve kosovare të heqin tarifën doganore prej 33 % për importin e çimentos, masë e cila po dëmton rëndë biznesin shqiptar dhe sektorin e ndërtimit në Kosovë, që ka hyrë në një stad të ri zhvillimi.

Përmes një deklarate për shtyp, kreu i Konfindustrias Shqiptare, Ing. Hajredin Fratari, ka reaguar duke e quajtur arbitrare dhe të pa vend, tarifën e vendosur nga qeveria kosovare, për importin e çimentos nga Shqipëria.

"Në një kohë kur Kosova dhe Shqipëria njehsuan abetaren e përbashkët, politikat e zhvillimit ekonomik duhet të shohin mundësitë e reduktimit të barrierave doganore dhe lehtësimit të kushteve për të zhvilluar biznesin mes dy vendeve, që synon unifikimin në një treg të përbashkët shqiptar", thotë Fratari, duke nënvizuar faktin se nuk janë taksat katalizatorët e konkurrencës së lirë.

Sipas tij, kjo masë e taksimit të çimentos, e ndërmarrë nga qeveria kosovare më datë 11 qershor, po penalizon biznesin shqiptar në këtë sektor, i cili zë 40% të tregut të çimentos në vendin fqinj.

Ndërkohë që prodhimi i çimentos në Kosovë nuk mund të mbulojë të gjitha nevojat e vendit. Shqipëria eksporton rreth 3 mijë ton në ditë çimento drejt Kosovës, duke mbuluar 40% të tregut. Pjesa tjetër mbulohet nga prodhimi vendas me 40 % dhe afro 20 % importohet nga Maqedonia.

Fabrikat shqiptare të çimentos kanë eksportuar gjatë vitit të kaluar një sasi në shifra monetare prej rreth €12 mln, ndërsa gjatë muajve të parë të këtij viti para se të vendosej tarifa penalizuese, rreth €10 mln.

Duket se nisma e ndërmarrë nga qeveria kosovare bëhet pikërisht për të penguar produktet shqiptare, që sipas pritshmërive pritej të dyfishonin importin drejt vendit fqinj.

Lidhur me këtë vendim të fundit të qeverisë kosovare kanë reaguar dhe Dhoma e Tregtisë dhe Industrisë Tiranë, BiznesAlbania dhe Konfindustria Shqiptare, duke i kërkuar institucioneve përkatëse të hiqet tarifa doganore për çimenton e vendosur pak ditë me parë nga Ministria e Tregtisë dhe Industrisë së Kosovës.

Në kuadër të kësaj kërkese, kreu i Dhomës së Tregtisë dhe Industrisë Tiranë, Nikolin Jaka ka zhvilluar takime në Prishtinë, me drejtues të lartë të Odës Ekonomike të Kosovës, përfaqësues të biznesit apo me parlamentarë të Kosovës, ku ka kërkuar edhe një herë me forcë që të mos aplikohet tarifa doganore e vendosur në masën 35 % nga ministria e Kosovës.

Sakaq, deputeti Gjokë Uldedaj, ish-drejtues i Dhomës së Tregtisë, aktualisht deputet i PD-së dhe biznesmen, kanë shfrytëzuar takimin me kolegët kosovarë në Komisionin Parlamentar të Ekonomisë, duke i shprehur shqetësimin rreth taksës së vendosur.

"Kjo taksë penalizon biznesin, ku 65 për qind e tregut të këtij produkti e zë prodhimi shqiptar", i është drejtuar Uldedaj kolegëve nga Kosova. Nga ana e tij, Safet Gërxhaliu, kryetar i Odës Ekonomike të Kosovës, është shprehur se "avancimi ekonomik duhet të jetë prioritet i prioriteteve dhe të mbrohen interesat e të gjithëve dhe jo në mënyrë selektive. Një vendim i tillë për OEK-un karakterizohet me një mungesë të dialogimit paraprak, vendim i pranuar "ad hoc".

HermesNews - © 2012

Dërgo me email | Stampo artikullin | Artikulli është lexuar 146 here