6/21/2012 12:36:23 PM

Mund të dështojë statusi në Tetor ?

Intervistë me Gledis Gjipalin Drejtorin ekzekutiv i lëvizjes ruropiane në Shqipëri

TIRANË - Drejtori Ekzekutiv i Lëvizjes Europiane në Shqipëri (EMA), Gledis Gjipali u shpreh se, mos arritja e marrjes së statusit të vendit kandidat në Bashkimin Europian të Shqipërisë këtë vit, mund t’i kushtojë Shqipërisë edhe për vitin e ardhshëm, pasi 2013-a është vit zgjedhor dhe do të jetë e vështirë që të ndryshojë situata.

“Në rast se ne humbasim edhe këtë vit shansin për të marrë statusin e vendit kandidat është e vështirë, duke qenë 2013-a një vit zgjedhor, për të pasur mundësinë për ta marrë në 2013-ën, kur një qeveri e re, pavarësisht kush fiton, rikonfirmohet mazhoranca aktuale apo një mazhorancë tjetër, sigurisht që do ketë një ndryshim, do të ketë lëvizje në qeveri, do të ketë një kohë që Brukselit do t’i duhet për të vlerësuar ecurinë e kësaj qeverie dhe do të ketë shumë pak kohë në dispozicion për t’u vlerësuar për marrjen e statusit. Kështu që djegia e këtij viti mund të sjellë në një farë mënyre edhe djegjen për 2013-ën për të marrë statusin”, theksoi Gjipali.

Sipas tij, kur mbeten edhe pesë muaj deri në Progres-Raportin e 12 tetorit të Komisionit Europian, ecuria e Shqipërisë përsa i përket përmbushjes së 12 pikave kyçe që kërkohen nga KE ka pasur progres më të madh se vitet e shkuara, por edhe anë negative.

“Duke ditur që është edhe viti i tretë, që Shqipëria pret marrjen e një përgjigje pozitive nga KE për marrjen e statusit të vendit kandidat, duhet thënë se ndryshe nga vitet e tjera ka pasur një progres më të madh në arritjen e 12 rekomandimeve, veçanërisht në disa rekomandime kyçe, ku ka qenë e nevojshme konsensusi i palëve politike të përfaqësuara në parlament. Ato që kanë të bëjnë me reformën parlamentare, me reformën zgjedhore, me zgjedhjen e kryetarëve, apo anëtarëve të institucioneve të larta kushtetuese”, nënvizoi Gjipali.

Sipas tij, “kemi parë që sidomos gjatë fillim vitit 2012, ka pasur tryeza të përbashkëta dhe punë në komisionet parlamentare për të adresuar këto problematika. Gjë e cila nuk ka ndodhur për fat të keq gjatë 2 viteve të kaluara duke penalizuar Shqipërinë me 2 përgjigje negative njëra pas tjetrës”.

“Në këtë aspekt”, shton Gjipali “duhet thënë se ka pasur progres. Por ana tjetër e medaljes është që progresi matet me rezultate dhe për të pasur përmbushje të këtyre rekomandimeve, veçanërisht reforma zgjedhore dhe reforma parlamentare do të duhet të kemi një miratim me sukses të ndryshimeve ligjore apo dhe kushtetuese që mund të kërkohen në Kuvendin e Shqipërisë. Kjo ende nuk ka ndodhur, ende nuk janë përfunduar dhe për fat të keq duket që palët janë larg njëra-tjetrës për të rënë në konsensus”.

Sipas Drejtorit ekzekutiv të EMA-s, “ndonëse është avancuar në disa kritere teknike, sidomos për reformën zgjedhore, përsëri çështje të rëndësishme si riformatimi i KQZ-së apo mënyra e votimit, numrimit elektronik apo jo, kanë bërë që të ngeci reforma”.

“Komisioni është aktualisht me mandat të skaduar dhe do të duhet që shumë shpejt të rimandatohet, apo të krijohet një Komision i ri për të çuar në fund këtë reformë kaq të rëndësishme, jo vetëm për marrjen e statusit, por edhe për realizimin me sukses të zgjedhjeve të 2013-ës”, tha Gjipali.

Sipas tij, vonesa e punës me reformën zgjedhore, atë parlamentare, apo ligji mbi heqjen e imunitetit do të ndikojë në marrjen e statusit të vendit kandidat.

“Këto janë kriteret më të rëndësishme që duhen realizuar dhe mos realizimi i tyre në kohë sjell pasoja. Për fat të keq ka shumë pak kohë deri në fillim shtatori kur edhe bëhet përmbledhja finale e gjithë ecurisë së Shqipërisë nga tetori i vitit të kaluar deri në shtator të këtij viti. Pra janë edhe gati dy muaj në dispozicion dhe është shumë e vështirë që këto reforma të përmbyllen me sukses. Do të duhet një angazhim shumë i madh nga palët politike që nuk duket për momentin”, u shpreh Gjipali.

Sipas drejtorit të EMA-s, "në rast të dështimit të mos arritjes së një marrëveshjeje dhe një rezultati të përbashkët, që do të shprehet me votim në parlament dhe ligje të rëndësishme organike apo ndryshime kushtetuese, është pothuajse e pamundur që Shqipëria të marrë statusin e vendit kandidat për këtë vit”.

Ndërkohë përsa i përket disa prioriteteve, siç mund të jetë puna me minoritetet apo lufta ndaj korrupsionit apo krimit të organizuar, z. Gjipali theksoi se, “këto fusha janë fusha të tilla që progresi është i nevojshëm në vazhdimësi dhe nuk mund të flasim për një rezultat përfundimtar as sot, as pas një viti, as pas 5 vjetësh”.

“Reformat duhe të vazhdojnë, zbatimi i rregullit, i ligjeve dhe sidomos pasja e rasteve konkrete të çështjeve kundër korrupsionit, të dërguara në gjykatë dhe raste dënimi kundër krimit të organizuar apo dhe mbrojtja e të drejtave të njeriut”, tha Gjipali.

Sipas Gjipalit, “ka pasur një farë progresi, përsa i përket korrupsionit të vogël, por jo atij të profiliti të lartë, prandaj dhe është e lidhur me heqjen e imuniteteve, e cila do të lehtësojë këtë proces, apo atë të luftës kundër krimit të organizuar, ku ka pasur progres, por gjithashtu ka pasur dhe shembuj të qartë të pamundësisë së organeve shtetërore për të hetuar çështje të një rëndësie të veçantë apo që janë dhe publike, siç mund të jetë çështja e fshatit të Lazaratit që aktualisht diskutohet shumë nëpër media”.

“Prandaj”, shtoi ai, “edhe këtu ka anë pozitive, por ka edhe anë negative, të cilat do të vlerësohen drejt nga KE, ashtu si çdo vit. Sigurisht që edhe këtë vit do të kemi një vlerësim të tillë ku do të dalin në pah mangësitë por edhe progresi i bërë”.

Përsa i përket procesit të zgjedhjes së Presidentit, Gjipali shprehet se, “më shumë se vetë zgjedhja e Presidentit, pra procesi, ndikimi negativ do të jetë tek reformat e tjera. Pra tek humbja e besimit midis partive politike për të avancuar me reforma në procesin zgjedhor, në jetën parlamentare, apo sistemin e drejtësisë me heqjen e imuniteteve etj”.

“Ky është dëmi që i ka shkaktuar zgjedhja e Presidentit, sesa drejtpërdrejt zgjedhja e tij, e cila ishte Kushtetuese dhe njohur dhe pranuar nga të gjitha palët”, përfundon Drejtori Ekzekutiv i Lëvizjes Europiane në Shqipëri (EMA), Gledis Gjipali.

HermesNews - © 2012

Dërgo me email | Stampo artikullin | Artikulli është lexuar 152 here