6/14/2012 8:17:13 PM

Vriten gjyshi dhe mbesa

Burime zyrtare pranë policisë së Shkodrës bëjnë të ditur se viktimat janë, Marie Çuku, 17 vjeç dhe Kol Çuku, të dy banues në fshatin Kir

SHKODËR - Dy persona, që rezultojnë të jenë një vajzë 17 vjeçare dhe gjyshi i saj, 70 vjeç, kanë humbur jetën sot në fshatin Kir të komunës Pult të Dukagjinit në rrethin e Shkodrës, pasi u qëlluan nga persona akoma të paidentifikuar me armë zjarri automatike. Burime zyrtare pranë policisë së Shkodrës bëjnë të ditur se viktimat janë, Marie Çuku, 17 vjeç dhe Kol Çuku, të dy banues në fshatin Kir.

Nga sa mësohet, viktimat në momentin e qëllimit me armë zjarri kanë qenë duke punuar në arë, pranë territorit të shtëpisë së tyre. Plumbat kanë qenë fatale për vajzën 17 vjeçare, e cila ka ndërruar jetë në vend, ndërkohë që gjyshi i saj, edhe pse ka marrë ndihmën e shpejtë duke e transportuar me helikopter drejt spitalit, ka humbur jetën gjatë udhëtimit.

Policia nuk bën të ditur autorët e këtij krimi, por ndërkohë konfirmon se ata janë identifikuar dhe shpallur në kërkim. Edhe pse në rrugë zyrtare nuk bëhen të ditura shkaqet e kësaj vrasje, nga banorë të zonës pretendohet të jetë një gjakmarrje, nisur nga një ngjarje e kësaj natyre e ndodhur përpara dy vitesh, ku pati humbur jetën një 60 vjeçar, fqinjë me dy viktimat e sotme.

HermesNews - © 2012

Dërgo me email | Stampo artikullin | Artikulli është lexuar 109 here