6/6/2012 7:32:24 PM

Hapet panairi 'Prishtina 2012'te

Kryetari i Odës Ekonomike të Kosovës, Safet Gërxhaliu tha në hapje se Panairi Ndërkombëtar i Prishtinës është një nga mundësitë më të mira për krijimin e kontakteve të drejtpërdrejta mes biznesit kosovar dhe tregut ndërkombëtar

PRISHTINË - Në kryeqytetin e Kosovës është hapur sot Panairi Ndërkombëtar “Prishtina 2012”, ku marrin pjesë 120 kompani vendore e ndërkombëtare, përfshirë Shqipërinë. Në panairin, që do të qëndrojë i hapur prej datës 6 deri në 9 qershor, marrin pjesë 60 kompani vendore dhe 60 kompani ndërkombëtare.

Kryetari i Odës Ekonomike të Kosovës, Safet Gërxhaliu tha në hapje se Panairi Ndërkombëtar i Prishtinës është një nga mundësitë më të mira për krijimin e kontakteve të drejtpërdrejta mes biznesit kosovar dhe tregut ndërkombëtar, për arritjen e marrëveshjeve te reja tregtare si dhe për gjetjen e gjuhës së përbashkët për projekte të përbashkëta.

Ai tha se ky panair tregon se Kosova mundet të bëjë hapa të rëndësishëm në këtë drejtim dhe se, për synim strategjik ka bashkërenditjen me ekonomitë e rajonit dhe konkurrimin e barabartë për lehtësirat dhe asistencën që i siguron statusi i kandidatit për Bashkimin Evropian.

“Oda Ekonomike synon ndërkombëtarizimin e ekonomisë së Kosovës në të njëjtën mënyrë si diplomacia e Kosovës punon për njohje te reja politike”, tha Gërxhaliu.

Ai vlerësoi se biznesi kosovar mund të marrë përsipër një pjesë jo pak të rëndësishme të betejës për njohjen e Kosovës, duke dëshmuar se këtu zhvillohet ekonomia moderne e tregut të lirë.

HermesNews - © 2012

Dërgo me email | Stampo artikullin | Artikulli është lexuar 153 here