Video

4/10/2012 10:17:10 AM

Sekretet e guzhinës së Renatos, Chefit të Parë të Greqisë

Flet për Hermesnews, Renato Mekolli, guzhinieri më i mirë në Greqi. Këshillat e mia ? 'Hiqni dorë nga pjatat e mbushura plot e përplot. Dilni në restorante, provoni gjëra që si keni provuar dhe mësoni të hani akoma më mirë'

GREQI - Renato, të flasim pak për fillimet: Kush të frymëzoi për të gatuar ? Mamaja ? Dikush tjetër ? Si ndodhi ?

Nuk e di sesi më erdhi, por prindërit e mi më thonë gjithmonë se në moshën 5 vjeç kisha vënë në furrë një tavë me patate dhe kofsha pule kur ishim në shqipëri. Merre me mend si mund ta bënte një fëmijë dhe prisja që të piqej tava po furrën nuk e kisha ndezur. Kjo kjo ka qenë 'specialiteti' im i pare le te themi keshtu.

Më pas çfarë ndodhi ?

Kur erdhëm në Greqi në vitin 1996, fillova duke larë pjata në një restorant luksoz të Athinës, mua më pëlqente shumë të punoja dhe nuk ulesha as dhe 1 minutë. Ndihmonja kuzhinierët në restorant pastroja patate, bëja pune të ndryshme. Një ditë chefi i restorantit i cili ishte francez (Herve Pronzato, chefi që ka marrë më të shumë çmime këtu në Greqi si më i miri) më tha, 'ti Renato nuk je për të larë pjata, do të shkosh shumë lart. Do të të çoj në një shkollë private për chefa dhe do e mbarosh. Unë nuk doja se kishim probleme ekonomike si të gjithë emigrantët, po më vonë vajta mbarova shkollën dhe kështu filloj karriera ime si chef kuzhine.

Aktualisht ku punoni ?

Tani jam në restorantin Vassilenas

Cilët popuj hanë më mirë ?

Për mua grekët hanë mirë.

Më pak mirë ?

Po klasin e të gatuarit dhe finesën e kanë francezët, tani është futur shumë në garë dhe Spanja. Nuk besoj se ka popuj që hanë keq, kjo ka të bëjeë me kulturën e çdo vendi.

Thonë se dashuria kalon përmes stomakut. Ju nuk duhet të keni probleme besoj...

(hahahahahaha) po është e vërtetë dashuria kalon nga stomaku, nëse një mashkull gatuan jam i sigurt se femrave u pëlqen shumë. Por meshkujt duhet të mësojnë në rradhë të parë për veten e tyre.

Kur mendoni për dikë, gatuan më mirë se zakonisht apo i harron tavat në furrë ?

Gatuaj më mirë dhe vë gjithë fantazinë time që të dalë gjithçka perfekt.

Momenti më emocionues ka qenë..?

Ishte vjet në 14 /01/2011, kur erdhën nga The New York Times dhe hëngri kritiku më i rreptë për gatimin, Franko Bruni. Kur lexova më pas shkrimin e tij që "çdo gjë ishte e përkryer dhe që thoshte se në Athinë ndodhet një top chef i vërtet një star i kuzhines" u emocionova.

Dëgjon muzike kur gatuan, apo ju pëlqen 'simfonia' e zhurmave rreth e rrotull ?

Në shtëpi dua të dëgjoj kur gatuaj, muzikë të lehtë klasike, ndërsa në punë nuk dua muzikë se jam tërë orët në stres dhe mendoj gjithçka për gatimin dua të jem shumë i përqëndruar.

Keni ftesa për në Shqipëri ?

Kam patur her pas here, po nuk më ka pëlqyer ndonjë, sepse nuk do të bëja atë që doja në Shqipëri dhe kështu që nuk e kam menduar seriozisht, po do të doja që dhe Shqipëria të ecte shumë përpara me gatimin se është një art më vete.

Do të keni një restorant të gjithin për vete ?

Tani për tani jo.

A hamë mirë ne shqiptarët ?

Jo, nuk besoj se hamë mirë, se nuk e kemi kulturën e të ngrënit mirë, jemi shumë prapa, nuk mund të shkosh në një restorant luksoz në Tiranë në të cilin paguan 70 euro, që për Shqipërinë është një shumë e madhe e të kërkosh bërxollë me patate të skuqura dhe të me dalësh me kruajsen e dhembeve nga restoranti (i uritur). Ka dhe njerëz që dinë të hanë, po janë të pakët.

Cfarë do të thotë të dish të hash mirë ?

Të provosh gjithçka që të jep një chef për të ngrenë dhe të mësosh të hash ato që nuk haje.

Zakonisht guzhinierët janë të shëndosh. Ju hani gjithçka që ju vënë para ?

Nuk jam vetëm unë: në përgjithësi guzhinierët e rinj janë më të dobët, unë kujdesem shumë për veten. Nëse do që të mos shëndoshesh nuk shendoshesh, ha pak dhe sakt.

Single ?

Jo, kam partnere.

Tek femrat çfarë ju tërheq ?

Fytyra tregon gjithçka dhe s'diskutohet e gjithë pamja në përgjithësi si ecën si vishet, si flet.

Jeni nazeli, kur gatuajnë të tjerët ?

Po jam dhe jam shumë fare, ngaqë jam mësuar të gatuaj saktë kërkoj që të jenë gjërat ashtu siç i dua une. Po më pëlqen shumë gatimi i mamasë sime dhe i tezeve të mia.

Jeni i rreptë me ndihmësit tuaj në kuzhinë ?

Kërkoj maksimumin, e kërkoj maksimumin në radhë të parë për veten dhe më pas nëse një kritik gatimi do vijë dhe nuk i pëlqen diçka, që duhet t'i pëlqejë nuk do të ketë shkrim të mirë dhe rrezikoj shumë gjëra, ke të bësh me një restorant luksoz dhe kur drejton diçka duhet të japësh maksimumin dhe maksimumin e kërkoj nga vetja në fillim.

Çfarë bëni kur keni kohë të lirë ?

E kam shumë nevojë kohën e lirë, në dimër shkoj në teatër, kinema, palestër dhe më pëlqen të luaj bowling, në behar me pëlqen shumë plazhi, shkoj përditë se e kam afër shtëpisë, më pëlqen të luaj tennis, volley dhe not si dhe jeta e natës.

Shkrimtarë të preferuar ?

Paulo Coelho dhe Simon Mawer.

Cili është sekreti i suksesit tuaj ?

Shija dhe finesa këto janë armët e forta që kam.

E planifikon jetën ?

Më përpara po, tani jo. Sa herë kam bërë plane nuk janë realizuar, ia kam lënë në dorë Zotit, çfarë është për t'u bërë do të bëhet.

Harxhon shumë kohë, kur gatuan për vete ?

(hahahahaha) nuk gatuaj për veten time, nëse kam të ftuar po, se presin nga mua, dua apo s'dua.

Cili ka qenë komplimenti më i bukur që ju kanë bërë në kuzhinë ?

Shumë komplimente, po më i veçanti ishte kur erdhi një piktor dhe provoi gatimin tim, me tha, 'ti Renato je një Picaso, pjatat i pikturon nuk gatuan thjesht'.

A do t'i linit një mesazh lexuesve të HermesNews ?

Hiqni dorë nga pjatat e mbushura plot e përplot. Dilni në restorante, provoni gjëra që si keni provuar dhe mësoni të hani akoma më mirë jo me sasi po me cilësi, i përshëndes shumë të gjithëve së Shqipëria është vendi që më mbush sytë me lot gjithmonë. Suksese dhe ju në punën tuaj ! Ishte kënaqësi kjo bisedë.

* Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi