1/27/2012 6:54:20 PM

Tjetër pikë doganore në Veri

Kryeministrat e dy vendeve nënshkruajnë për pikën e kalimit kufitar “Cerem – Vranicë”

TROPOJË - Kërkesa e kahershme e banorëve të komunës së Margegajt për hapjen e një pike të kalimit kufitar me Malin e Zi, që mundëson lidhjen mes vëllezërve të një gjaku, së fundmi është bërë realitet.

Kjo është bërë realitet gjatë vizitës së kryeministrit Sali Berisha në Malin e Zi, gjatë së cilës u nënshkrua edhe marrëveshja për pikën e kalimit kufitar “Cerem – Vranicë” mes kryeministrit Sali Berisha dhe kryeministrit të Malit të Zi, Igor Luksic.

“Hapja e doganës do të ndikojë në rritjen e nivelit ekonomik jo vetëm për banorët e komunës sonë, por të të gjithë banorëve të rrethit të Tropojës”, thotë kryetari i komunës së Margegajt, Rexh Biberaj.

Hapja e kësaj pike doganore do të rrisë edhe numrin e turistëve që tashmë janë të pranishëm çdo ditë të vitit. Aq sa valbonasit janë bërë të njohur me mikpritjen e tyre jo vetëm për bashkatdhetarët e tyre, por edhe për vizitorët e shumtë të huaj nga të katër anët e botës.

Komuna e Margegajt shtrihet që nga rreth 300 metra mbi nivelin e detit deri në mbi 2000 metra mbi nivelin e detit. Në këtë komunë ndodhet Valbona, aq e njohur, por edhe Ceremi, fshati i vogël që ndodhet në kufirin shtetëror mes 3 shteteve Shqipërisë, Kosovës e Malit të Zi, fshati ku shqiptarët e ndarë përshëndesin njëri tjetrin çdo mëngjes në gjuhën e nënës edhe pse janë të ndarë me një vijë që ka emrin kufi shtetëror. //HermesNews - © 2012//

Ornela Kadaifçiu

Dërgo me email | Stampo artikullin | Artikulli është lexuar 36 here