6/4/2007 9:18:58 AM

Pagjumësia, 5 të vdekur, 3 të plagosur në një aksident

Një aksident i rëndë ndodh në aksin Tiranë-Rrogozhinë, në fshatin Lekaj. Përplasen dy makina me targa të Vlorës dhe Elbasanit

4 Qershor 2007 - Pagjumësia e njërit nga drejtuësve të makinave, është
bërë shkas i një aksidenti me një bilanc tragjik viktimash. Pesë persona kanë humbur jetën, ndërsa tre të tjerë, janë lënduar në një aksident automoblistik, që ndodhi mëngjesin e sotëm, në autostradën Tiranë- Rrogozhinë në vendin e quajtur Lekaj, pranë Kavajës, ku dy makina njëra me targë të Elbasanit dhe tjetra me targë të Vlorës janë përplasur me njëra tjetrën.

Policia e Kavajës, tha se tre prej personave që humbën jetën ishin duke udhëtuar me makinën me targë të Vlorës, ndërsa dy të tjerët janë nga Elbasani, dhe po udhëtonin me makinë nga Tirana në drejtim të Elbasanit. Ndërkohë, tre personat që mbetën të lënduar nga ky aksident rrugor, dhe që ndodheshin në makinën me targa të Elbasanit, aktualisht janë dërguar për
mjekim në spitalin e Durrësit, jashtë rrezikut për jetën.

Nga të dhënat paraprake dhe veprimet e kryera në vendin e ngjarjes mendohet se shkak i këtij aksidenti të rëndë automobilistik të jetë bërë pagjumësia e drejtuesit të mjetit me targa të Elbasanit, i cili pasi ka humbur kontrollin e drejtimit të mjetit ka dalë nga rruga duke u përplasur me mjetin me targa të Vlorës.

Hermesnews

Dërgo me email | Stampo artikullin | Artikulli është lexuar 270 here