1/12/2011 6:55:52 PM

Lulzim Hamitaj, ja pse vendosa të filloja karrierën e avokatit në Itali

Flet një prej ekspertëve më të mirë legal në Itali, Avokat Lulzim Hamitaj. 'Çështjet me të cilat hasen shqiptarët në Itali, janë të shumta, sidomos ato të pronës, shumë të përhapura, kontraktuale, shkeljen e të drejtave në punë, apo çëshje të tjera penale e civile'. Sot, Studio Legale Hamitaj eshte kthyer ne nje pike referimi për shumë investitorët italian në Shqipëri, shqiptarë me banim në Itali dhe të huaj

12 Janar 2011
info@hermesnews.org

ROME/ ITALI (HermesNews) Vullnet, djersë dhe energji e përqëndruar në realizimin e një objektivi të vetëm: mbarimi i studimeve për drejtësi në La Sapienza të Romës. Dhe ia doli mbanë. Puna pa kompromise dhe betejat e përditshme ligjore për të mbrojtur të drejtën, bënë që sot Hamitaj të jetë një prej avokatëve më të suksesshëm në Itali. Mbron shqiptarë dhe të huaj. Studioja e tij legale ndodhet në Romë dhe është specializuar në shumë fusha të së drejtës penale dhe civile, brenda dhe jashtë Italisë. Në një bisedë për HermesNews, ai flet për fillimet e tij, ardhjen në Itali, punën për të fituar të drejtën e studimit. Më pas kthimin në Shqipëri dhe vendimin për të mos pranuar asnjë kompromis që nuk do t’i shërbente rritjes së tij profesionale. Kjo zgjedhje do ta çonte atë në fillimin e një karriere në një vend ku sot po sheh sesi avokati shqiptar po ngjit shkallët e suksesit një nga një duke fituar besimin e klientëve dhe respektin e kolegëve. Betejat e përditshme ligjore, për klientët shqiptar kanë të bëjnë me, përplasjet e ligjeve italo-shqiptare sidomos për çështjen e pronës ku ai ka një eksperiencë të gjerë apo çështjet kontraktuale, ndërsa për të huajt, merret në pjesën më të madhe me probleme që prekin direkt interesat e investitorëve italiane jashtë vendit në Shqipëri dhe më gjerë. Sot, Studio Legale Hamitaj, është kthyer në një pikë referimi për shumëkend. Të tjerat i shpjegon ai vetë në një intervistë dhënë për HermesNews:


Cilat ishin fillimet tuaja në Itali?

Kam ardhur në Itali në Mars të vitit 1991, pak pas përfundimit të shkollës së mesme në Shqipëri. Edhe pse, që në fillim, dëshira dhe plani im ishin të filloja studimet e larta në fakultetin e juridikut, në fazën e parë (thuajse dyvjeçare). Kështu si çdo fillim nuk ishte aspak i lehtë, pasi m'u desh të përballoja çështjen e gjuhës dhe atë të shpenzimeve të ardhshme. Gjeta punë si kamarier (në Romë dhe në Rimini) dhe me kalimin e kohës arrita të kurseja diçka. Në të njëjtën kohë fillova frenkuentimin një shkolle për mësuar gjuhën italiane dhe një kurs të përgjithshëm mbi të drejtat e njeriut në përgjithësi dhe mbi legjislacionin italian në veçanti. Pas kësaj në vitin shkollor 93-94 fillova studimet e larta në Universitetin e Romës, 'La Sapienza', në Fakultetin e Drejtësisë, ku u diplomova në vitin 1999. Prej këtu filloi të realizohej ëndrra ime për të studiuar e punuar për drejtësi.

Në momentin që përfundova studimet, dy ishin rrugët e të ardhmes profesionale që unë mund të ndiqja: kthimi në Shqipëri dhe aktivizimi profesional atje, ose kompletimi i kapacitetit profesional këtu në Itali.

Pikën e parë e mënjanova pas disa kontaktesh dhe takimesh që më bënë të kuptoja që një aktivizim i imi profesional në Shqipëri, si në aparatin burokratiko-ligjor shtetëror apo në profesion privat në fushën e drejtësisë, nuk do të jepte frutet e dëshiruara, nën këndvështrimin ideal, (dhe jo financiar), për të cilët unë kisha sakrifikuar në vitet e studimeve dhe nuk isha i gatshëm të bija në kompromis me askënd.

Them këtë, pasi ambjenti, zakonet dhe rrethanat e atjeshme nuk linin fushë veprimi për zhvillimin e një pune të pavarur, në bazë të së cilës një profesionist do të mund të masë aftesitë e veta (vetëm) nëpërmjet nivelit të suksesit të tij profesional, pa cënuar idealet, ndershmërinë dhe ndërgjegjen e tij dhe jo në saj të faktorëve të panjohur, ose jo shumë trasparent, që mund të ndikonin pjesërisht ose dhe mund të peshonin me shumë se profesionaliteti në suksesin ose në dështimin e mundshëm.

Pra, këta faktorë jo trasparent, (të dytë por dhe më decisivë se të parët aftesitë profesionale), në mënyrë të pashmangshme do të kishin ndikuar në zhvillimin e aktivitet si dhe do të kishin fallsifikuar kandarin - njesinë matëse - (termometrin ose metrin) në momentin që unë do të kryeja matjen e aftësive të mia profesionale dhe do të vlerësoja frutet e punës time.

Kuptohet qe ky ndikim mund te vinte ne dy rruge, me rritjen e suksesit dhe fitimeve ekonomike të konsiderueshme, tej aftësive efektive në atë moment, nëpërmjet levizjeve jo strikte me drejtësinë, por të mundshme në saje të kompromiseve të ndryshëm ose, me krijimin dhe shumëfishimin e vështirësive të përditshme, në zhvillimin e aktivitetit profesional, nëpërmjet vendosjes së shkopinjve në mes të rrotave. Kjo e fundit e dija se do të bëhej e mundur në momentin e refuzimit të kompromiseve.

dhe ju zgjodhët të dytën..

Po, prandaj përkushtimi im profesional u përqendrua në Itali. Kjo zgjedhje u bë, veç faktit që Roma ka qënë djepi i drejtësisë së lashtë ndërkombëtare - pra vendi më i përshtatshëm për të ushqyer ëndrrat e drejtësisë dhe për të dhënë kontributin personal në këtë fushë, dhe në sajë të afërsisë gjeografike me Shqipërinë dhe mundësisë teknike për të punuar edhe atje në një të ardhme, njëkohësisht me ecjen përpara me zhvillimin e aktivitetit në Itali, (në rast se kushtet e tjera do t'a sygjeronin/lejonin).

Pse vendosët të zgjidhnit rrugën e avokatit?

Zgjedhjen e profesionit 'Avokat' e kam bërë pa asnjë dyshim, sidomos pas stazhit dyvjeçar që më dha mundësinë ta njihja atë nga afër. Jam i mendimit që profesioni që ushtroj të jep shumë kënaqësi sidomos nën këndvështrimin e ndjenjave njerëzore, morale, ideale dhe humanitare.

Veç pavarësisë totale dhe larmisë së çështjeve profesionale, ky profesion të jep mundësinë të mbrosh të dobtin dhe të ndeshesh me të fortin, të përplasesh me këdo, person fizik apo istitucion - sado i lartë qoftë ai - për të nxjerrë në shesh të drejtën kujtdo.

Nuk mendoj që kjo është pak dhe pse e di që jo të gjithë kanë të njëjtat mendime. Shumë mund të përqëndrohen vetëm tek faktori ekonomik dhe mund të vlerësojnë ose të zgjedhin një profesion në funksion, pikërisht, të fitimeve financiare që ai të sjell. Ata do të kishin zgjedhur rrugën e Shqipërisë po të ishin ndodhur në pozicionin tim në vitet '90.

Shumë persona më kanë thene që kam bërë gabim që nuk jam sistemuar -në të gjitha drejtimet - në Shqipëri, duke qënë një nga të parët shqiptarë që kam mbaruar studimet e larta në drejtësi, në vendet perëndimore.

Gjithsesi, unë jam i bindur që vlen më shumë të ushtrosh një profesion që të pëlqen, në pavarësi - me përgjegjsitë dhe kënaqësitë që kjo e fundit të sjell, duke përballuar vështirësitë, duke bërë sakrifica, duke investuar për të ardhmen. Nuk kam dashur te shuaj etjen e menjehershme për para, duke i realizuar ato nëpërmjet kompromiseve, të cilat të japin gjëndje ekonomike të menjëhershme, por, të heqin prespektivën profesionale, pastërtinë e ndërgjegjes dhe të drejtën për të qenë krenar dhe kokëlartë.

Cilat janë çështjet që mbuloni?

Për shumë vite kam punuar në bashkëpunim me shumë studio legale në Romë, të cilat zhvillonin aktivitete si në të drejtat civile dhe në çështjet penale. Pasi arrita eksperiencën e duhur, prej disa vitesh kam hapur studion time në Romë, ku aktualisht mbuloj të gjitha çështjet penale dhe bashkëpuntorët e mi merren me çështjet civile. Kuptohet që duke iu drejtuar studios time, përgjegjsinë e mbarëvajtjes së çështjeve dhe për ato civile, e kam unë, edhe pse aktiviteti i tyre konkretisht mund të zhvillohet pjesërisht ose terësisht nga një bashkëpunëtor/koleg i imi.

Me cilat probleme haseni më tepër sot në Itali e që përfshijnë shqiptarët?

Fillimisht do të thoja që numri i klientëve të mi shqiptar nuk është shumë i madh në përpjestim me numrin e përgjithshëm të klienteve, pasi ata përbëjnë minorancën. Sidoqoftë, veç çështjeve penale, shumë çështje të klientëve shqiptar kanë të bëjnë kryesisht me shkeljen e të drejtave të punës, dokumentave dhe çështjeve kontratuale.

Aktualisht shumë shqiptarë, të ardhur në Itali hasen me problemet e pronave të lëna në Shqipëri. Ka patur raste të tilla me të cilat jeni marrë?

Po, biles të shumtë, por në këto raste bëhet fjalë më shumë për konsulta legale dhe prokura për të aktivizuar dikë tjetër në vend të tyre. Këto i kam marrë përsipër unë. Kam marrë pjesë në gjyqe që janë bërë në Shqipëri, për rastet përkatëse. Por problemi i pronave është një ndër më të përhapurit aktualisht, së bashku me problemet kontraktuale, apo çëshjet penale.

Cilat janë disa prej shërbimeve të tjera që ofron studioja juaj?

Në lidhje me çështjet e pronave?

Në përgjithësi..

Konsulencë dhe për bërjen e prokurës nëpërmjet bashkëpunimit me noterin kompetent, legalizimin në Gjykatën italiane të Prokurës. Në përgjithësi, konsulencën e parë e bëjmë falas; ofrojmë asistencë legale për të gjitha çështjet penale dhe civile.

Ju punoni dhe në shtete të tjera të Italisë, si Spanjë psh. Cilat janë veçoritë e punës suaj atje?

Prej disa vitesh, duke filluar nga 2006-ta, kam mbrojtur dipllomën për drejtësi edhe në Spanjë. Atje zhvilloj aktivitete juridike të përqëndruara sidomos në konsulencë dhe assistencë për firmat italiane që kanë investuar atje dhe anasjelltas. Përsa u përket fushave të tjera ato mund t'i mbuloj në bashkëpunim me kolegë që ndodhen atje, në veçanti në Barcelonë, Madrid dhe Valenzia, në Alicante dhe në Girona.

Njihni mirë ligjet e huaja, në këtë rast ato të shtetit italian, dhe ato shqiptare. Ka patur ndonjë rast ku është parë një përplasje?

Po. Psh në lidhje me njohjen e të drejtave të pronës. Eshte mjaft e komplikuar. Në rastin konkret nuk u njoh si e vlefshme, për të justifikuar investime të sigurta, dhënia e një license e lëshuar nga shteti, për ndërtimin mullinjve me erë - për prodhimin e energjisë elektrike - palë eoliche, në një tokë mbi të cilën kishte pretendime nga ish pronarët e e mëparshëm, por dhe për sasinë e dënimeve të parashikuara, nga kodet penale reciproke, për krime të ndryshme etj. Na ndiqni dhe në Twitter Lajmet e Hermesnews dhe në Facebook.



Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 847 here