11/4/2010 4:05:00 PM

Flet kreu PSV, Petro Koçi 'po i hapim rrugë të rinjve me alternativa.'

Në një intervistë eksluzive për Hermesnews, Koçi flet për alternativat e reja politike që ofron partia e tij, insistimin e opozitës për transparencën e zgjedhjeve të 28 Qershorit, vizat dhe konfliktin Meta-Prifti.

Nga Doriana Metollari
drejtor@hermesnews.org
4 Nentor 2010
HermesNews - ©2010

Çfare duhet te kuptojne sipatizantet e krahut tuaj politik, kur thoni se 'duhet nje brez i ri politikash'?

Po, kam thënë 'duhet një brez i ri politikash'. Për t'i dhënë hapësirë konceptit të rinovimit të vërtetë dhe jo atij propogandistik e tymnajës. Pra vendi nuk ka nevojë për thjesht rinim moshor të politikanëve, por të politikës që propozohet. Mesatarja moshore e politikanëve tanë është relativisht e re. Niveli i kulturës politike mbetet shumë i ulët. E vjetra armatoset me politikanë të rinj në moshë dhe mbijeton me dinakëri. Edhe sepse publiku e ngatërron rinovimin politik me rinovimin moshor. Brez të ri politikash do të konsideroja një tërësi projektesh politike ku bën pjesë shembja e sistemit aktual pushtetues. Ne kemi në fuqi një Kushtetutë sipas të cilës Kryetari i partisë që 'fiton' zgjedhjet rrëmben të gjitha pushtetet. Është më keq se Kushtetuta e 1974 ës. Pra vendi ka nevojë për shdrrime institucionale dhe jo për ndrrime prapanicash në karriket e pushtetit.Në këtë këndvështrim roli i opozitës ka nevojë të rishikohet rrënjësisht. Opozita duhet të shnderrihet në shpresë të popullit për demokraci me pushtete të balancuara institucionesh dhe të kontrollueshme nga vota popullore.

Keni ndonjë strategji për inserimin e kësaj fryme të re në politike?

Në rradhët e të rinjve ka plot idealistë demokraci dhe shtetdashës. Fatkeqësisht politika aktuale u hap dyert kryesisht karrieristëve të paskrupullt dhe servilë. Ka të rinj që më duken më të vjetër se Servet Pëllumbi në vizionin politik. Në PSV ne po i hapim rrugë të rinjve me alternativa. Mendimi ndryshe mbetët burim i opcionit alternativ. Nëse e mbyt mendimin ndryshe ke mbytur burimin e alternatvave dhe intelektualizmit politik.Forumi ynë i Socialistëve të Rinj mbetet institucion lirie.







Mendoni se vizat me Shqiperine do te hiqen ne dhjetor te ketij viti?

Besoj se duke filluar nga 15 Dhjetori statusi i qytetarit do barazohet me atë të politikanëve përsa i përket lëvizjes së lirë në vendet e BE. Kjo është një arritje e madhe e merituar ku kontributi gjithëpolitik duhet vlerësuar pa disbalanca. Edhe PSSH, e cila e ngriti në normalitet qytetar funksionimin e shtetit të rënë në greminë në 97 ën, ka merita të padiskutueshme. Sic ka merita edhe PD që përparoi disa standarte të aspektit teknik. I duhet ti jemi mirënjohës BE së dhe institucioneve të saj për përshpejtimin në vitet e fundit të politikave integruese ndaj vendeve të Ballkanit Perëndimor.

Supozojme se kjo nuk ndodh. Cili do te jete fajtor per kete? kush?

Nuk e besoj këtë opsion.

Cilat do te jene strategjite e partise suaj per permiresimin e klimes politike dhe sociale te vendit?

Ne nuk jemi në një pozitë të favorizuar për ta luajtur këtë rol me më shumë efekt. Por ne sdo rreshtim së propozuari në vazhdimësi politikën institucionale. Po përpiqemi të bëhemi më pragmatistë në raport me opinionin publik në mënyrë që alternativat tona të përthithen pa keqkuptime prej socialistëve. Ne jemi një opozitë institucionale socialiste dhe so të donim që edhe pjesa tjetër e opozitës të futej në hullinë e institucionalizmit. Vetëm institucionalizmi në veprimin e opozitës mund të rrëzojë pushtetin e personal të Berishës. Ndërkohë mënyra e veprimit duhet të shoqërohet me një projekt të kompletuar shndrrimesh kushtetuese dhe të sistemit sidomos zgjedhor që duhet tq garantojë opozita.Ne po përpiqemi të ndikojmë në zëvendësimine politikës karrike ndrruese të opozitës me atë të transformimeve institucionale. Pushteti i oligarkisë po shet për 5 lekë asetet e vendit në duar të papastra financiare. Po të ndërpritet dhe të shëndoshet ky proces atëherë ka shpresë edhe për progres në mirëqënien sociale të shumicës së shqiptarëve. Edhe në këtë drejtim opoziat mbetet e paqartë.

Deri kur eshte i justifikaur sipas jush insistimi per zbardhjen e zgjedhjeve te 28 qershorit nga socialistet?

Në rrafshin parimor nuk ka kufi. Transparenca zgjedhore apo sic e dua unë 'katarsisi' zgjedhor mbetet një mosarritje kokëfortë e sistemit tonë politik dhe e 'demokracisë' tonë. Në planin moral dhe ligjor PS duhet të kërkojë falje për garancitë që dha para zgjedhjeve. PSV e paralajmëroi opozitën lidhur me pasojat e Kodit dhe mjeshtërinë e Berishës në manipulimin zgjedhor ,por nuk pati reagim të përgjegjshëm. Ndërkohë unë mendoj se lufta e drejtë për transparencë zgjedhore nuk duhet të nxjerrë PS në jashtë institucioneve duke i lënë rrugë të lirë Berishës në vazhdimine privatizimit të shtetit. Opozita duhet ta luajë në parlament rolin e vet si pushtet kushtetues politik alternativ. Dalja e PS jashtë parlamentit forcon pozitën e berishës edhe në opinionin ndërkombëtar duke krijuar gabimisht bindje se ai vepron në drjtime institucionale dhe kushtetuese.

Si do ta quanit konfliktin meta-prifti, dhe cfare ndikimi mendoni se do te kene keto akuza ne opinion nderkombetar?

Konflikt që i nxorri shumë petë lakrorit aktual qeverisës. Në planin e brendshëm taktik mbetet një gabim i Metës. Unë besoj se opinioni ndëkombëtar ka informacion të bollshëm lidhur me moralin qeverisës në Shqipëri dhe ska patur nevojë për këtë katarsis nga inati mes Metës dhe Priftit. Mua më cudit fakti që opozita parlamentare e ka harruar përplasjen Meta Prifti. Ajo nuk po e shfrytëzon politikisht këtë ngjarje dhe kjo e kompromenton jo pak atë. Na ndiqni dhe në Twitter Lajmet e Hermesnews dhe në Facebook.



Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 431 here