7/13/2010 9:58:05 AM

Sa keq kur të shëmton zhveshja!

Mënyrën dhe stilin e sotëm të veshjes në vendin tonë, Europa e ka përjetuar disa dekada më parë dhe ky është nje fakt që tregon se sa mbrapa është shoqëria jonë në perceptimin e saj mbi Europën dhe kulturën europiane.

Isidor KOTI
13 Korrik 2010

TIRANË/ Si ka mundësi që femrat e sotme zhvishen me vetëdije të plotë kur i dinë shumë mirë pasojat morale dhe shëndetësore?

Stil, tendencë, ekstravagancë në maksimum, është moda e kohës, - mund të ishte njëra përgjigje. Nuk do ishte aq e çuditshme, (ashtu si ka ardhur koha tani!), që të të kujtonin edhe kohën kur jetojmë me shprehjen e përdorur si refren gati perfekt: “të ka mbetur sahati mbrapa”.

Mes pluhurit të qytetit, i cili natyrshëm vesh dhe rrobat e bukura shikon të rinj, por edhe mesogra që i kanë kaluar të 40-at, të veshura me mënyrat më të “mahnitshme”.

Me veshjen e sotme të krijohet ideja sikur femrat janë në garë se kush duhet t’i nxjerrë këmbët më në pah. Ekstravagancë pa limit, sensualitet, minifunde, dekolte të larmishme, pantallona të shkurtra, taka të larta.

Por njeriu është mirë të vishet në mënyrë të përshtatshme për atë kontekst që ai po shkon, kur bën pazar vishesh në një mënyrë, kur shkon në restorant vishesh në një mënyrë tjetër, kur shkon në det vishesh në tjetër formë, ose kur shkon për shëtitje ta zëmë në mal nuk vishesh me taka të larta.

Kam pasur fatin të udhëtoj në disa shtete të Europës dhe kam parë femra që nuk janë kaq të zhveshura. Madje te ne sheh edhe vajza me minifunde aq të shkurtër sa mund të shihen lehtësisht dhe të brendshmet.

Të mendosh që ke përpara gjimnaziste ose studene, jo prostituta. Arsyen e dinë të gjithë pse vishen kështu: sepse djemve u pëlqejnë veshje të tilla. Sidoqoftë u pëlqejnë për seks. Por nëse vjen fjala për të lidhur jetën me njërën nga ato, askush prej tyre nuk e sheh dot kaq të zhveshur. Jam i sigurt për këtë sepse kam shumë shok, të cilët kur bie fjala për lidhje serioze, i kërkojnë të fejuarës seriozitet duke filluar nga veshja.

Kjo prirje për veshje ekstravagante dhe provokuese motivohet nga një mungesë e theksuar vlerësimi i vlerave të brendshme. Jam plotësisht i bindur se te këta persona ka një paaftësi për të organizuar shkallën e vlerave të tyre personale. Ata nuk dinë të përcaktojnë rëndësinë e kodit etik vetjak, madje edhe nëse ekziston ai është i parëndësishëm.

Çdo veprim individual e quajnë moral dhe e njëjtësojnë me sjelljen e shumicës. Këtë veshje e gjen më lehtësisht tek femrat që vijnë nga vendet rurale ose nga periferitë drejt zonave të zhvilluara.

Ndrydhja e tyre e vazhdueshme në familjen e tyre konservatore, dëshirat dhe instiktet e shtypura akumulohen dhe shndërrohen në shfrenim kur përballen me emancipim dhe liri.

Tradicionalisht ne shqiptarët jemi mbajtur si popull fanatik dhe mbrojtës të flaktë të vlerave familjare, por duket se ky realitet është zbehur pas viteve 90′-të. Pasoja kryesore e kësaj “mode” dëshmoi një devijim nga vlerat e traditës shqiptare.

Fakti që rinia e sotme po orientohet drejt tendencave gjoja moderne, përbën një model negativ për brezat e ardhshëm. Të vjen keq që femrat që zgjedhin ekspozimin e trupit të tyre e përdorin këtë “gur shansi” si një mjet për realizimin e kënaqësive dhe përfitimit të të mirave materiale që iu kanë munguar, me qëllim tërheqjen e vëmendjes të meshkujve me xhepat plot.

Madje ky stil veshjeje plotëson edhe “kriterin” për marrjen në punë. Prandaj pjesa më e madhe e femrave “të zhveshura” krijojnë lidhje romantike me djem me automjete të shtrenjta, rroba të shtrenjta, që zotërojnë ndonjë biznes fitimprurës.

Ata janë personat që mund të garantojnë një jetë luksi, dhurata të shtrenjta, pushime të jashtëzakonshme dhe të ardhme të sigurtë për veten dhe fëmijët. Pa dashur të arrij në konkluzione paraprake, dashuria në çift po shndërrohet më shumë në dashuri materiale-pragmatike se sa në
dashuri zemre dhe ndjenjash.

Ne kemi një problem serioz, të kuptuarit e të veshurit bukur. Të vishesh bukur do të thotë të zgjedhësh diçka që shkon me fizikun tënd, karakterin, të dish të përshtatësh veshjen me ambjentin. Vlerat e njeriut burojnë së brendshmi dhe krijojnë personalitetin individual.

Mënyrën dhe stilin e sotëm të veshjes në vendin tonë, Europa e ka përjetuar disa dekada më parë dhe ky është nje fakt që tregon se sa mbrapa është shoqëria jonë në perceptimin e saj mbi Europën dhe kulturën europiane.

Europianëve nuk iu desh shumë kohë për të kuptuar se ky fenomen nuk të çonte veçse në rrugë të gabuar. Prandaj ata filluan të rimodelojnë mënyrën e jetesës, ku një pjesë të rëndësishme zuri dhe mënyra e veshjes, duke iu rikthyer përsëri vlerave themelore. Ata filluan të nxjerrin nga garderobat e tyre “petkat e pluhurosura te modestisë dhe thjeshtësisë dhe i riveshën ato”.

Mënyra e tyre e të veshurit po riorientohet tek thjeshtësia dhe prakticiteti i përditshëm. Sigurisht qe veshjet fine, me klas dhe pse jo sensuale nuk kanë se si të mungojnë, por ato përdoren vetëm për ambjente dhe raste të veçanta.

Edhe një fakt tjetër që e konstatova teksa po lundroja në internet. Ja çfarë shkruhej në rregulloren e brendshme të një prej ministrive tona: “Veshja dhe paraqitja e nëpunesit duhet të jetë serioze, për ta përfaqësuar sa më denjësisht administratën publike. Veshja e nëpunësve meshkuj, sidomos në takimet zyrtare duhet të jetë me kostum, këmishë e kravatë, ndërsa për nëpunëset femra veshja duhet të jetë serioze e jo ekstravagante. Nëpunësit dhe punonjësit e tjerë duhet të tregojnë kujdes për higjenën personale, modelin e flokëve, të mos e teprojnë me makiazhin dhe aksesorë të tjerë në mënyrë që të jenë në përshtatje me detyrën dhe funksionin e nëpunësit të lartë të shtetit”.

Kjo ishte pjesa më interesante, por e keqja më e madhe qëndron në pranimin e heshtur dhe indiferentizimin e shkeljes së hapur të rregullave të etikës që rrjedh nga institucionet më të larta shtetërore.

Në raste të panumërta nëpunëset e ministrive ose institucioneve të tjera paraqiten në punë në sytë e shefave të tyre me të njëjtat veshje provokuese, jashtë etikës.

Dëgjohet shpesh shprehja: “Gjithësecili e ndërton vet jetën si e mendon. Nuk duhet ndërhyrë në intimitete”. Dakord, por kur këto intimitete sjellin shqetësime të tjera në shoqëri, duhet parë mundësia e kufizimit të tyre, sepse cënohen dhe interesat e të tjerëve.

Vërtet secili ka jetën e vet, por kjo jetë ndikon dhe ndikohet nga jeta e atyre me të cilët bashkëjeton, që të lidhin interesa shpirtërore e morale, por dhe ekonomike e sociale. Shoqëria njerëzore dallon nga jeta e pyllit, pikërisht për disa norma dhe rregulla të cilat duhen zbatuar, në të kundërt del nga kontrolli. Kemi raste të panumërta kur tradhtitë bashkëshortore kanë marrë rrugët, divorcet janë shtuar, krimi në familje është rritur dukshëm.

Divorcet janë shumë më të shumta, - thotë dikush dhe të përmend Amerikën, e ndonjë vend tjetër. Vërtet ka vende të zhvilluara që kanë nivel të lartë të divorceve krahasuar me ne, por plagët sociale që krijohen në këto vende janë më pak të ndjeshme, sepse kanë nivel tjetër ekonomik. Nuk bëhet fjalë për të mbajtur të lidhur familjen me dhunë, por të shpëtojmë nga prishja e kësaj çerdheje, pikërisht atë që mund të ruhet.





Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 566 here