Video

11 Prill 2007 – Teksa shkon drejt qytezës së Shëngjinit, në të majtë të rrugës, shikon disa makina të tonazheve të larta dhe fadroma që po hapin një shesh të madh, ndërsa në planin e pamjes së syrit të dalin edhe depozitat e shkrumbuara disa kohë më parë të kompanisë “Taçi Oil”.

Një vendim i Këshillit të Qarkut të Lezhës tashmë i ka dhënë lejen zyrtarisht për të ndërtuar edhe një shesh tjetër me cisterna nafte në mes të lagunës së Knallës firmës “Uldedaj”, ndërkohë që qeveria kishte firmosur vendimin për transferimin e të gjitha depozitave drejt Durrësit. Punonjësit që po merren me realizimin e sheshit të ri të depozitimit të naftës të thonë se po bëjnë një lulishte, ndërkohë që autoritet komunale dje kanë bërë inspektimin e zonës ku po kryhen punimet pas shqetësimit që kanë ngritur
banorët.

Ndërkohë, ambjentalistët lëshojnë alarmin. Njëri prej tyre, Xhemal Mato thotë se “realizimi i këtij objekti është në kundërshtim të plotë me të
gjitha ligjet”.

Sheshi. Morëm drejtimin nga hyrja e Shëngjnit drejt bregdetit të Kunës, por që larg shikoje gjurmët e një rruge që po merrte udhë drejt zemrës së Knallës. Pyesim disa persona që punonin për ndërtimin e një objekt dhe ata të thonë si nën zë se po bëhet një shesh për depozita karburantesh. Bëjmë disa hapa në drejtim të zonës ku nga larg shquhen mjete të tonazheve të rënda dhe fadroma; dhe kur afrohemi, na dalin dy persona të cilët të thonë se po kryheshin punime për ndërtimin e një lulishtjeje. Sipas tyre, “mjedisi është ndotur që
pas djegies së depozitave, dhe duhet që të merren masa për gjelbërimin dhe pastrimin e saj”. Ky shpjegim mjafton dhe ngjallet dyshimi….

Licensa . Para disa ditësh kishte mbërritur një ankesë nga dhjetëra banorë të lagunës së Knallës se një shesh ndërtimi po hapej për vendosjen e depozita të tjera të karburantit. “Sapo na erdhi letra, dërgova ekspertin për të bërë verifikimin”, - thotë kryekomunari i sapozgjedhur i Shëngjinit, Luigj Prelaj. Ai pohon se “sheshi për vendosjen e depozitave të karburanteve po ngrihej nga firma “Uldedaj”. Prelaj sqaron se i ka dërguar një shkresë përfaqësuesit të kompanisë,

Agustin Uldedaj dhe prej saj ka marrë të gjitha shpjegimet. Burime të rezervuara në Këshillin e Qarkut në Lezhë thonë se “kompania e karburanteve Uldedaj ka marrë lejen e posaçme për ndërtimin e këtij objekti. Sipas tyre, vendimi është dhënë me 16/11/2006 dhe ka numrin 27 dhe sheshi që po ndërton firma është me të gjithë dokumentacionin ligjor."

Reagimi . “Ndërtimi i këtyre depozitave është i kundraligjshëm”,- kështu shprehet ambjentalisti i njohur Xhemal Mato. Ai thotë se është shkelje flagrante ndërtimi i objekteve të tilla në zona lagunore. Sipas Matos, qeveria dhe Ministria e Mjedisit duhet të marrin masa menjëherë për ndalimin e këtij objekti, pasi prania e tyre do të ndikojë gjithnjë e më shumë në ndotjen e lagunës, një pasuri e rrallë, e cila po humbet vlerat çdo ditë.
Eksperti i njohur i çështjeve mjedisore e konsideron skandal vendimin e dhënë nga autoritetet vendore, duke parë edhe pasojat mjedisore që la djegia e cisternave në mesin e muajit dhjetor.

Kompania që ka marrë lejen për ndërtimin e sheshit të ri të depozitave po vazhdonte punën me vrull për realizimin sa më shpejt të këtij objekti. Me përfundimin e tij, Shëngjini do të ketër katër sheshe depozitash për
karburante: një në hyrje të qytetit, dy në mes të lagunës së Knallës dhe një në zemër të qytetit.

Turizmi apo…. Shpresat se 12 mijë banorët e Shëngjinit mund të jetojnë me turizëm po zveniten ditë përditë, megjithë
ambiciet dhe dëshirën e kryetarit të sapozgjedhur të komunës Lluigj Prelaj. “Kam ardhur me ambiciet për të bërë diçka që do të mbetet për zgjedhësit e mijë dhe gjithë komunën”, - thotë Prelaj, por duket se shumë gjëra varen edhe nga lart. Ai pohon se objektivi kryesor i tij është turizmi. “E kam nisur mandatin tim pikërisht në kohën kur jemi në prag të fillimit të sezonit turistik”, - thotë kryekomunari, i cili rendit si prioritete të afërta të tij, pastrimin e qytezës dhe zonës bregdetare, furnizimin me ujë të pijshëm, ndërtimin e shëtitores si dhe shumë gjëra të tjera. Prelaj tregon se vitin e kaluar Shëngjini dështoi në turizëm për një sërë arsyesh, por, ai duket se është optimist se këtë vit gjërat do të shkojnë ndryshe. “Të martën do të pastrojmë vijën bregdetare që frekuentohet nga pushuesit, ku kemi kërkuar ndihmën e shkollave, firmave private dhe komunitetit”, - tregon ai.

Po ashtu, për të patur mundësi sa më të mëdha kontakti, ai shprehet se së shpejti do të ketë edhe një ueb sajt me ofertat turistike të Shëngjinit. Ndër
objektivat që rendit kryetari Prelaj, janë edhe ndihma që mund ti jepet biznesit hotelier në qytet. Ai duket shumë optimist tani që do të kalojë edhe menaxhimi i taksave të biznesit të vogël. Shëngjini ka një vijë bregdetar më të gjatë se 25 kilometra dhe shquhet për resurset e rralla turistike, pasi gërshetohet pylli dhe deti njëkohësisht. Po ashtu, pjesë e pasurive të
tij është edhe laguna, e cila mban një florë dhe faunë të pasur, ndonëse rrezikohet dita ditës nga dora vrastare e njeriut.

Albert Gjoka

Dërgo me email |

Stampo artikullin |

Artikulli është lexuar 559 here