5/6/2010 9:53:19 AM

Krimi i kollareve të bardha

Kjo histori i ngjan deri diku firmave piramidale të viteve 90’-të dhe premtimeve politike të 20 viteve të fundit, të cilat kanë korrur suksesin e pranueshmërisë, brenda mjerimit që është ndërkallur rishtaz.

nga Isidor KOTI


TIRANE - “Mirëdita, unë jam Miss Sarah Thomas, nga Abixhan Bregut të Fildishtë, dua të kërkesës për ndihmën tuaj në planet e mia për investimet në bazën tuaj, kam dëshirë për të investuar në prodhim dhe menaxhimin e pasurive të patundshme në bazë tuaj, kjo është sepse unë e trashëguar një shumë të rëndësishme nga vonë babai im Thmas shefi Steve,i cili ishte helmuar nga bashkëpunëtorët e tij të biznesit në një nga outings e tyre për të discuse për biznesin”.

Kështu nis e-maili i çuditshëm që më erdhi pasditen e kësaj fillimjave. Kjo ishte letra e parë me një gjuhë shqipe të çalë, ndryshe nga ato të tjerat me anglishte perfekte (me siguri e përkthyer në shqip nga fjalorët e google), pas një serie letrash që prej kohësh më postoheshin pothuajse çdo ditë. Historia vijonte më tej: “Para vdekjes së babait tim, ai më dha gjithë dokumentacionin e nevojshëm ligjor në lidhje me depozitimin e fondit në bankë, se ai ka ruajtur shuma totale prej (7,5 $) Shtatë milionë 500000 Shtetet e Bashkuara dollarë vetëm, në një nga bankë këtu në Bregun e Fildishtë, këto para u është depozituar për sigurinë e mia sociale dhe për investime të frytshëm ndërkombëtar, sugjerimet dhe idetë e juaj do të konsiderohet shumë. Tani leje mua për të kërkuar këto disa pyetje:

1. Mund të më ndihmoni sinqerisht nga zemra e juaj?
2. Mund të plotësisht besim ju?
3. Çfarë përqindje e totalit të parave do të jetë appreciateable për ju?

Ju lutem, e konsiderojnë këtë dhe të kthehemi te mua sa më shpejt të jetë e mundur. Immedaitely Unë konfirmoj gatishmërinë tuaj, unë do t'ju dërgoj foton time dhe të ju jap më shumë hollësi për veten dhe të bankës, ku babai im në fund të depozituar fondi, në mënyrë që ju mund të arrijnë të bankës dhe të konfirmojë ekzistencën e fondit, si dhe, për shkak se duke parë që është besimtar. Unë jam duke pritur për përgjigjen tuaj të menjëhershme”

Këtu përfundonte letra, e marrë fjalë për fjalë nga interneti. Lexohet haptaz se si krimi i kollareve të bardha ka një komunikim perfekt për të arritur të të marrë shumën e parave të dëshiruara nga persona të ndryshëm dhe të panjohur. Edhe në raste të tjera këta mashtrues që dërgojnë e-mail pohojnë se një i afërmi i tyre i ka lënë një trashëgimi, por ata nuk mund ta hedhin në emrin e tyre dhe u duhet një llogari tjetër bankare. Një formë tjetër është edhe llotaria, përmes së cilës të ofrohen shifra milardëshe dhe para së t’i marrësh ato të kërkohet një komision prej 500 dollarësh. Pasi të kthehet përgjigje nga e-maili që iu dërgon, të merr në bisedë, të kërkon numrin e llogarisë dhe të dhënat e tjera, një përqindje e pasurisë që do marrin do kalojë në llogaritë e viktimës që je ti.

Kjo histori të bën të reflektosh më shumë sesa një analizë e përciptë e ngjarjes ose e thelluar e fenomenit që po depërton ndjeshëm edhe në Shqipëri. I ngjan deri diku firmave piramidale të viteve 90’-të dhe premtimeve politike të 20 viteve të fundit, të cilat kanë korrur suksesin e pranueshmërisë, brenda mjerimit që është ndërkallur rishtaz. Jo vetëm kaq, por kuadri i kësaj historie është edhe më i gjerë në paralelizmin figurativ kur mendon se çdo shërbim publik tek ne shqiptarët është një mashtrim i hapur dhe tepër i rëndomtë që sjell vetëm dëshpërim qytetar.

Kudo që të shkosh të kërkohet një “komision” që të kushton jo pak herë sa qimet e kokës. Madje nuk bëhen as në mënyrë latente, gjithçka ndodh hapur, në dritë të diellit. Dhe si për t’i vazhduar historitë, që në të shumtën e rasteve janë më të këndshme, një ekspert po udhëtonte në Jug të Shqipërisë dhe ndalon pranë një bariu që po kulloste delet. - Nëse unë e gjej sa dele ke në lëndinë a ma fal një qengj? Bariu pranoi krejt i bindur se i panjohuri nuk kishte si ta dinte sa dele kishte tufa e tij. Eksperti nxiton në makinë, hap laptopin, lidhet me internet, google earth, zmadhon zonën dhe numëron delet dhe i thotë numrin e saktë bariut. Bariu shtang. Por kundërpërgjigjet:
-Nëse unë e gjej se çfarë pune bën, a ma kthen qingjin? Pas marrjes së pohimit me kokë, bariu i thotë:
- Ti je ekspert!!
- Si e gjete?!!!
- E para, erdhe i paftuar. E dyta më the diçka që unë e dija dhe e treta... më bëre të paguaj për këtë.

A nuk ndodh e njëjta gjë edhe në çdo fushë të jetës shqiptare, kur “ekspertët” të rrëmbejnë edhe bukën e gojës dhe të predikojnë shpresë për mirëqënie! Pushteti i popullit është një togfjalësh i shpërdoruar pikërisht nga këta “hacker-sa” dhe “ekspertë”, të cilët me diplomat e tyre të dyshimta dhe kollaret e padenja nuk e justifikojnë demokracinë më shumë sesa vetveten. Ata do të ishin askushi nëse nuk do të lejoheshin që në fillim. Por tani kanë pushtet dhe ky pushtet i ka kthyer rëndom në skllavopronarë të shekullit XXI. Ata komandojnë dhe vjedhin jetën tonë çdo ditë e çdo orë, që nga majat e kullave institucionale, e deri në kohën fiktive që na marrin në televizion, duke bërë rolin e shenjtorëve përballë të rraskapiturve.

Mashtruesit publikë iu ngjajnë gjithashtu hackersave të internetit, sepse ata arrijnë që të marrin identitetin dhe pinet e kartave të kreditit tonë jetik, duke krijuar faqen e një banke fiktive, që kërkon të thithi besimin tonë për t’i votuar. Ata bëjnë faqe identike me atë origjinale dhe kur populli fut pinin dhe identitetin e tij, ato merren automatikisht nga hacker-i i pushtetshëm që ka krijuar këtë faqe të rreme. Më pas, klientit elektorat, teksa fut të dhënat, i kthehet një përgjigje negative, duke i thënë se kjo faqe nuk punon për momentin, por duhet të futet më vonë. E gjithë kjo çoroditje ndodh nga mungesa e transparencës e për rrjedhojë publiku mbetet pa pushtet. Kjo është maja e ajsbergut e një të vërtete, ndërsa tek të vërteta lipset të arrijmë përmes betejave.

HermesNews - ©2010

Dërgo me email | Stampo artikullin | Artikulli është lexuar 321 here