3/23/2010 11:16:18 AM

Të gjithë jemi fajtorë!

Politikanët kanë faj se nuk unifikohen për interesat madhore, qytetarët sepse bëjnë rolin e spektatorit ose militantit në këtë betejë, media që në vend të bëhet 'qeni roje'.

Isidor Koti/ Radiostinët, Drejtor
isidorkoti@hotmail.com

TIRANË - Pas gjithë asaj potere politike të ditëve të fundit, çdo shqiptar e kuptoi që në fund të gjithë kësaj historie mbeti kupa bosh. As kompromisit nuk iu gjet dermani, as kutia e Pandorës – Ruzhdie nuk u hap dhe asnjë shpresë për tu shtrënguar duart e për t’i treguar syve të kujdesshëm të ndërkombëtarëve se ne dimë t’i vendosim interesat kombëtare mbi ato klanore. Ky ishte një mësim i mirë, më saktë akoma një autogol që jo vetëm klasa politike, por edhe opinioni publik shqiptar e pësoi në portën e vet.

Dhe kush e ka fajin? Realisht faji në kësi rastesh na përket të gjithëve, ndonëse e kemi të vështirë ta pranojmë. Politikanët kanë faj se nuk unifikohen për interesat madhore, qytetarët sepse bëjnë rolin e spektatorit ose militantit në këtë betejë, media që në vend të bëhet “qeni roje”, kafshon njërën palë dhe përkëdhel tjetrën.

Të gjithë e kemi futur gishtin në lëndën e hidhur që mban ky qyp i moçëm, duke e kuptuar tashmë se e vetmja gjë që ka ndryshuar në konceptin e të jetuarit politikisht, nuk është rroftë Enveri, por rroftë Berisha, rroftë Rama…i paçim sa malet! Edhe në dollitë e gëzimeve dhe hidhërime bisedojmë për ta, për sukseset dhe dështimet e tyre, për ditët plot tension të Parlamentit, për efektet e këtij “Big Brother-i” ku banorët zihen e dashurohen me njëri-tjetrin në sytë e një publiku që i duartroket, sakrifikon gjumin për ta dhe në fillimin e ditës tjetër bëhet pishman pse i dha kaq shumë rëndësi dhe kohë kupës që mbeti bosh.

Është vërtetë fatkeqësi të shikosh në finishin e gjithë këtij vrapimi marramendës dhe pasionant hiçin në tigan, sepse kishim dëshiruar diçka tjetër. Por tek e fundit, vetë e gatuam këtë çorbë të madhe dhe do hamë nga një copë të gjithë, që të mbyllim gojën njëherë e mirë, para së të ndërrojmë “hard-diskun” e kokës sonë. Kjo koka jonë është infektuar keqaz dhe gjasat për të ndryshuar pa një dorë të fortë “specialisti”, zor se do ta shërojnë sistemin tonë të vlerave, të cilat janë përçudnuar nga viruset që i kanë mbytur ato si merimanga gjahun e vet. Rrjeta politike është më e rrezikshme se merimanga, sepse ka në dorë gjithçka, madje edhe sistemin e kontrollit. Ne kemi bërë kompromis që në fillim me këtë sistem dhe ja rezultatet, po pësojmë nga mëkatet që kemi bërë që në fillim, me votën tonë, me kërshërinë tonë për të mbështetur njërën palë ose tjetrën dhe me sakrificën prej Miti Sizifi, duke pritur pafundësisht ndryshimin jo vetëm si një parrullë elektorale.

Po, të gjithë jemi fajtorë. Sepse ne kemi prodhuar një mentalitet të tillë qeverisjeje, politike klienteliste, opozite kokëforte, mungese bashkëpunimi në çdofarë situate, mediat që kanë privatizuar politikat editoriale, gjithçka ndodh kundër vetes, madje edhe kur bien kambanat e alarmit për të ardhur në vete. Kjo reflektohet qartazi edhe te qytetarët, të cilët praktikisht janë dakord me europianizimin, por në thelb praktikojnë të tjera parime, duke ndjekur një rrugë pa krye që është injektuar me shumë finesë nga liderët e tyre “shpirtërorë” që i ndjekin çdo ditë në luftën e ashpër për pushtet, duke brohoritur për ta, ndonëse tryezën mund ta kenë të vakët dhe listën
e borxheve të gjatë.

Të gjithë jemi fajtorë e më kot justifikohemi dhe bëjmë indiferentin, duke u marrë gjoja me hallet tona. Pikërisht atë që duhet ta kishim bërë gjithmonë, po e bëjmë tani kur nuk vlen. Dhe strukemi në shtëpitë tona të varfra, konsumojmë duhanet e shtrenjta dhe shijojmë humbjen.Sa optimistë jemi edhe kur humbasim në fushën tonë! Mbase për këtë na duan edhe të huajt, të cilët na e kanë gjetur dozën, duke na dhënë ca këshilla dhe duke na kujtuar gjithmonë përmes raporteve të tyre refrenin: “shikoni veten në pasqyrë”.

HermesNews - ©2010

Dërgo me email | Stampo artikullin | Artikulli është lexuar 475 here