2/26/2010 5:13:38 PM

Besjan Pesha/ Ne, politikanët 'ndryshe', po planifikojmë rrugën drejt Europës

'Të rinjtë që sot kanë mandatet e deputetëve brenda opozitës sot duhet të fillojnë të mendojnë si njerëz të lirë. S'do kishte kontribut më të madh nga ana e tyre për këtë vend se sa futja në parlament dhe zhvillimi I debatit brenda tempullit të demokracisë.'

Nga Isidor Koti
isidorkoti@hotmail.com
Doktorant në Filozofinë e Komunikimit

TIRANE - Besjan Pesha e nisi thjesht dhe pa bujë karrierën e tij publike, por shpejt u bë i famshëm në lëvizjet qytetare ku prodhoi shumë risi dhe fitoi respektin si përfaqësues i zërit qytetar. Ai tashmë drejton një sektor të rëndësishëm në Ministrinë e Kulturës, duke patur shansin e madh të vënies në jetë të disa prej projekteve të tij. Në një intervistë ekskluzive për Hermesnews.org, ne e kemi pyetur Besjanin për angazhimin e tij politik dhe qytetar.






Jeni pjesë aktive e politikës shqiptare dhe bëni pjesë në formacionin e ri të saj. Ju duket një mision i vështirë, kur dihet që katakombet e politikës janë të thella dhe kërkojnë ofrojnë shumë sfida?

E kam nisur angazhimin tim publik fillimisht si një aktivist I shoqërisë civile. Kam qënë themelues e drejtues I Lëvizjes Mjaft për 4 vjet rrjesht e më pas anëtar e një nga drejtuesit e LSI. Ajo që më ka shtyrë të angazhohem dhe të derdh energjitë dhe idetë e mia në jetën publike nuk ka qenë as etja klasike për pushtet e as nevoja tradicionale për protagonizëm. Ka qenë dhe mbetet dëshira e mirë për të dhënë një kontribut në ndryshimin e realitetit në vendin tim e për shtyrjen përpara të atyre proceseve të cilat do të na mundësojnë të gjithëve të jetojmë më mirë. E kam konsideruar veten dhe vazhdoj ta konsideroj një kontribues të lirë, gjithnjë në shërbim të idealeve të mia, një luftëtar të mirë të kauzave të drejta.

A është e lehtë??? Sigurisht që jo! Fatkeqësisht jetojmë në një vend ku mentaliteti është ende I errësuar nga hijet e komunizmit 45 vjecar, ku bijtë dhe bijat së bashku me baballarët tentojnë me cdo kusht e cdo kosto që të mbajnë të njëjtat pozicione dhe privilegje të trashëguara e ku fytyrat e reja me ideal e energji shpesh në vend që të konsiderohen si pozitivë trajtohen si armiqë e luftohen me shumë forma dhe mënyra. Por sekreti I suksesit të një të riu në politikën e sotme shqiptare nuk është dhe nuk duhet të jetë e shkuara e tij por mbi të gjitha vizioni I tij për të ardhmen. Unë e kam një vizion shumë të qartë mbi të ardhmen e Shqipërisë, herë ngadalë e herë shpejt, në diell apo në shi, kam për të ecur me këmbëngulje drejt këtij vizioni deri sa ta shoh të realizuar. Sic thotë një shprehje e vjetër, ëndrrat shpesh mund të jenë sfiduese, por në fund të fundit sfidat janë ato që I japin kuptim jetës.

Të gjithë presin nga brezi i ri të sjellë një erë të re në qeverisje. Sa hapësirë kanë sot le të themi mendimet e reja dhe mendimet ndryshe që vijnë nga të rinjtë?

Për mendimin tim ka dy lloje të rinjsh në politikë. Është një palë, fatmirësisht në pakicë, e cila thjesht mbush hapësirën e pjesmarrjes të të rinjve në të dhe një palë tjetër që realisht kërkon të fusë dhe zbatojë ide të reja dhe të hedhë energji mbi mekanizmin e madh qeveritar.
Unë prej 3 muajsh tashmë kryej detyrën e Drejtorit të përgjithshëm të Kulturës në Ministrinë e Kulturës dhe prej tre muajsh kam filluar të hedh në letër dhe në terren disa ide të reja dhe konkrete mbi zhvillimin e kulturës në vend. Kemi filluar të implementojmë një program që mbështet artistët e rinj nëpërmjet një fondi të vecantë të akorduar nga Ministria ku do ti japim mundësinë qindra të rinjve që të aplikojnë talentet e tyre në skenat më prestigjoze të vendit dhe me shpresë nesër edhe në ato ndërkombëtare. Jemi duke ideuar disa projekte të reja që kanë të bëjnë me modernizimin e skenave shqiptare si edhe rritjen e impaktit që kultura ka tek shoqëria jonë. Po bëjmë disa ndërhyrje në ligjet e vjetra me qëllim përafrimin e legjislacionit shqiptar ndaj atij europian dhe hapjen e mundësive për të gjithë ata që kanë talent për tu futur në tregun e madh dhe të vështirë të artit. Dhe sigurisht ajo që kam vënë re deri më sot është një frymë pozitive nga ana e drejtuesve kryesorë të qeverisë për ti përqafuar këto ide të reja dhe për të nxitur konkretizimin e tyre. Patjetër që ka debat, patjetër që ka edhe përplasje por ajo që ka rëndësi për mua është fakti që janë duke fituar argumentat më të mirë, e për sa kohë që lufta bëhet mbi parime dhe argumenta gjërat do të shkojnë mirë. Fatkeqësisht këtë frymë nuk e shoh aspak të implementuar brenda rradhëve të opozitës shqiptare, ku të rinjtë e atjeshëm janë bërë më të vjetër se të vjetërit. Kthimi në papagall kopjac është gjëja më e shëmtura që mund ti ndodhi një të riu, e shumë prej fytyrave të reja të opozitës kanë filluar të pajisen me sqepa.

Pse mungon dialogu ndërmjet politikanëve “të vjetër” dhe nuk ka zgjidhje mes palëve dhe çfarë kontributi mund të japin politikanët e rinj në këtë krizë?

Unë nuk do të thoja që mungon dialogu, dialog ka edhe me shumicë bile. Ajo që sot mungon në Shqipëri janë argumentat. Sot kemi përballë dy kampe, kampin qeverisës edhe atë opozitar. Le të dëgjojmë se cfarë thotë qeveria: Ajo thotë që zgjedhjet u certifikuan në rradhë të parë nga të gjithë komisionerët pjesmarrës në to, që do të thotë edhe të mazhorancës edhe të opozitës. Thotë gjithashtu që zgjedhjet u çertifikuan edhe nga KQZ. Më pas certifikimi erdhi nga OSBE dhe gjithë faktori ndërkombëtar e së fundmi edhe nga gjykatat në vend të cilat dhanë verdiktin mbi ankimimet e palëve.
Opozita, ose për të qenë korrekt z.Rama, thotë: Unë nuk I humba zgjedhjet sepse mua mu vodhën votat. Unë dua që të happen kutitë edhe pse gjykatat janë shprehur ndryshe. Unë do ta bojkotoj parlamentin deri sa kërkesat e mia të zbatohet.

Këtu kemi një problem shumë të madh. Nga njëra anë kemi një maxhorancë e cila ofron argumenta të bazuara në ligj dhe në kushtetutë e nga ana tjetër një opozitë e cila flet me gjuhën e pasionit personal të një individi I cili për fatin e tij të keq nuk realizoi dot ëndrrën e të qënurit kryeministër. Sigurisht në këtë pikë shumë pak ka për të debatuar. Sepse nëse z.Rama do të vazhdojë të këmbëngulë sjellja e tij është tipike e një terroristi. Terroristi ngaqë nuk arrin dot të realizojë qëllimet e veta brenda kuadrit ligjor të një shteti etj, vendos të marri peng apo të ushtrojë dhunë mbi individë të pafajshëm për të detyruar atë shtet që ti plotësojë kërkesat. Sot zoti Rama po tenton të marrë peng integrimin e Shqipërisë, liberalizimin e vizave, punësimin e shqiptarëve si edhe zhvillimin e vendit. Unë them që kjo qeveri nuk duhet të negociojë më terroristë, por duhet të vazhdojë në mënyrë strikte të zbatojë ligjin dhe të respektojë shtetin e së drejtës.

E të rinjtë që sot kanë mandatet e deputetëve brenda opozitës sot duhet të fillojnë të mendojnë si njerëz të lirë. S'do kishte kontribut më të madh nga ana e tyre për këtë vend se sa futja në parlament dhe zhvillimi I debatit brenda tempullit të demokracisë. Dhe unë besoj ende tek të rinjtë e opozitës dhe besoj se ata do tja japin shuplakën që meriton z.Rama, duke I kujtuar se të qenurit në politikë nënkupton pikësëpari shërbimin ndaj të mirës së përbashkët e më pas asaj përsonale.

Një çështje që diskutohet sot është liberalizimi i vizave dhe hyrja e Shqipërisë në BE. Si e shihni prespektivën?

Këtë vit Shqipëria merr statusin e vendit kandidat për anëtar të BE dhe unë besoj se viti 2013 do të jetë edhe viti I anëtarësimit tonë final në Bashkësinë Europiane. Unë tashmë kam planifikuar së bashku me miqtë e mi një udhëtim në kryeqytetet e Europës. I sugjeroj të gjithëve që të planifikojnë udhëtimet me trena sepse është mënyra me e mirë dhe më e lirë si edhe të krijon mundësi për të parë më shumë. Por ndoshta edhe me makinat personale nuk do të ishte ide e keqe për këdo që e ka këtë mundësi. Them se kjo do të jetë shqetësimi I të rinjve shqiptarë mbas korrikut, makinë apo tren…vizat do të jenë një histori e trishtë e të kaluarës dhe tranzicionit.



Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 739 here