1/23/2010 12:38:23 PM

Liria duhet mbrojtur

Dikush nuk duhet të harrojë, që shembulli i parë që duhet të japin shqiptarët për t'u pranuar në familjen e madhe europiane, është e ashtuquajtura, stili evropian i jetës; ky stil jete nuk e do presionin që i bëhet lirisë, atë liri që qytetarët e shohin shpesh jashtë kufijve, por që shtrydhet sapo dikush kërkon të ndryshojë diçka brenda kufijve të vendit të tij.

Nga Doriana Metollari
23 Janar 2010
drejtor@hermesnews.org

TIRANE / Pa hyrë në meritat e palëve, pa gjykuar se cili prej gazetave apo gazetarëve ka, apo jo të drejtë, dua të prek një ekuilibër shumë delikat. Lirinë e fjalës, e mendimit, të shtypit, internetit apo kudo qoftë.

Në Shqipëri u mbyll një gazetë. Nuk më intereson se e kujt është, në Shqipëri u mbyll një organ shtypi që publikoi artikuj pikantë, apo shumë pikante. Një gazetë që nxori në treg, skandale dhe fakte që prekën jetën e niveleve të larta të politikës shqiptare.

Ky është fakt. Ashtu siç është fakt që gazetari, Baze shpesh herë ka qenë në qendër të grindjeve, rrahjeve, fyerjeve qe i janë bërë nga shumë emra të njohur të biznesit, politikës dhe të gazetarisë shqiptare.

Baze, është gazetari që i drejtë apo jo në artikujt e tij, mbetet një person i lirë që punon në tregun e medias shqiptare dhe mbyllja e këtij zëri, përkthehet ne një presion që po i bëhet mendjes, shpirtit dhe dëshirave të njerëzve për t'u shprehur.

Liria me te vërtetë e ka një kufi, por ajo nuk mund te shtrydhet ashtu siç po behet ne Shqipëri aktualisht. Pse nuk luajmë sipas rregullave te një shoqërie civile? Perse nuk jemi te afte t'i zgjidhim problemet, si qytetare pa i treguar muskujt qofte ne kuptimin figurativ, ose jo te fjalës, njeri-tjetrit?

Pa dashur ndoshta, qeveria sot është ne anën e kundërt të kësaj lirie dhe nuk po tregon pjekuri demokratike. Dikush duhet t'ia kujtojë, që shembulli i parë që duhet të japin shqiptarët për t'u pranuar në familjen e madhe europiane, është e ashtuquajtura, stili evropian i jetës; ky stil jete nuk e do presionin që i bëhet lirisë, atë liri që qytetarët e shohin shpesh jashtë kufijve, por që shtrydhet sapo dikush kërkon të ndryshojë diçka brenda kufijve të vendit të tij.

HermesNews - ©2009

Dërgo me email | Stampo artikullin | Artikulli është lexuar 648 here