1/8/2010 12:29:18 PM

Diskutohet ideja e dergiit te gjyqtareve te Kosoves ne zonen e Mitrovices

EULEX shqyrton mundësinë e dërgimit të gjyqtarëve kosovarë në veri

info@hermesnews.org
8 Janar 2010

PRISHTINE- EULEX-i po shqyrton mundësinë e dërgimit sa më shpejt të prokurorëve dhe gjyqtarëve kosovarë në gjykatat në veri. Zëdhënësja Kristina Herodes nuk saktësoi nëse EULEX-i po zhvillon bisedime me Beogradin, pas emërimit të gjyqtarëve dhe prokurorëve serbë nga ana e Këshillit të lartë gjyqësor të Serbisë. Por tha se po trajtojnë me kujdes këtë çështje. Analistë në Kosovë thonë se Serbia synon shtrirjen e ndikimit në Kosovë përmes strukturave paralele edhe në gjyqësor.

Ende nuk dihet nëse do të fillojë një proces i shpërbërjes së strukturave paralele serbe në veri dhe në pjesë tjera të Kosovës. EULEX-i ka biseduar me zyrtarë të qeverisë së Serbisë me qëllim të funksionalizimit të plotë të gjykatave të Kosovës në veri të Mitrovicës. Por, zëdhënësja e këtij misioni Kristina Herodes thotë se EULEX-i po e trajton kujdesshëm këtë çështje.

“Po punojmë në këtë çështje. Nuk ka afat të caktuar se kur do të mund të gjejmë një zgjidhje, por po punojmë në këtë çështje. Ne duhet të punojmë hap pas hapi dhe qëllimi i ynë, qëllim i EULEX-it është që të dërgojmë në gjykata në veri prokurorë e gjyqtarë të Kosovës, pra si shqiptarë ashtu edhe serbë t’i dërgojmë atje. Nuk ka bisedime në këto momente. Nuk mund të ju jap më shumë hollësi në këtë moment. Por siç ju thashë do të punojmë hap pas hapi për këtë çështje”,tha Herodes.

Për bisedimet me Serbinë, EULEX-i e ka njoftuar edhe ministren e drejtësisë Nekibe Kelmendi, e cila ka thënë se nuk është pajtuar që të bisedohet me Serbinë.

Ndërkohë në gjykatat në veri veprojnë vetëm me tre gjyqtarë dhe tre prokurorë të EULEX-it, që prej shkurtit të 2008. Tash për tash gjyqtarët shqiptarë të Mitrovicës të zhvendosur në Vushtrri trajtojnë vetëm lëndë emergjente, thotë kryetari i gjyqit të qarkut të Mitrovicës, Kapllan Baruti. “Ne nuk jemi duke funksionuar vetëm si një organ emergjente”, tha Baruti.

Funksionimi i strukturave paralele në veri ka shkaktuar dëme të mëdha në sistemin e gjyqësorit në përgjithësi ne Kosovë. Analisti Ilir Deda thotë se vetëm me një përkushtim serioz të qeverisë së Kosovës dhe të EULEX-it do të mund të fillojë shuarja e këtyre strukturave.

Këshilli i lartë gjyqësor i Serbisë ka emëruar gjyqtarë dhe prokurorë serbë edhe për komunat e reja me shumicë serbe, si ajo e Ranillukut dhe Graqanicës. Lideri i Lëvizjes Vetëvendosje” Albin Kurti thotë se është qëllim i Serbisë të kontrollojë Kosovën duke instaluar strukturat paralele në Kosovë. Kurti fajëson qeverinë e Kosovës dhe EULEXin për të cilin thotë se bëjnë sehir. “Është e pa tolerueshme se si qeveria ka lejuar një gjë të tillë”, tha Kurti.

EULEX-i ka thënë se nuk i njeh strukturat paralele serbe. Ndërsa presidenti Fatmir Sejdiu ka kërkuar shuarjen e menjëhershme të këtyre strukturave. Ai ka thënë se do të prezantojë personalisht edhe në strukturat më të larta në Bruksel qëndrimin e shtetit të Kosovës ndaj strukturave paralele serbe.

Dërgo me email | Stampo artikullin | Artikulli është lexuar 326 here