1/8/2010 12:25:11 PM

Presidenti kroat, vizite nje ditore ne Republiken e Kosoves

Nderohet për përkrahjen e Kosovës

info@hermesnews.org
8 Janar 2010

PRISHTINE- Presidenti i Kroacisë, Stipe Mesic, ka mbërritur të premten në Prishtinë në kuadër të një vizite zyrtare njëditëshe. Ai do të nderohet nga autoritetet e kryeqyetit të Kosovës, me titullin Qytetar Nderi dhe nga presidenti me Medaljen e Pavarësisë.

Kroacia është ndër vendet e para të rajonit që e ka njohur pavarësinë e Kosovës dhe që e ka mbështetur atë në të gjtiha proceset e deritashme. Presidenti kroat do të pritet në Kosovë si një burrështetas i madh dhe do të nderohet për ndihmën që i ka dhënë asaj në periudha të ndryshme.

Mbështetje për Kosovën
Vizita e Mesic ishte paralajmëruar të zhvillohej në kuadër të një takimi të presidentëve të rajonit, por takimi u shty për shkak të mospërputhjes së axhendës së presidentëve të tjerë.

Kroacia është ndër vendet e para të ish-federatës Jugosllave që e ka njohur pavarësinë e Kosovës. Ajo po ashtu i ka dhënë mbështetjen e saj edhe në seancat dëgjimore për ligjshmërinë e pavarësisë në Gjykatën ndërkombëtare të Drejtësisë.

Presidenti kroat Stipe Mesic e ka mbështetur Kosovën edhe në periudhën e shkatërrimit të ish-Jugosllavisë, dhe ishte presidenti i fundit i Federatës së shpërbërë jugosllave. Vizita e tij bëhet vetëm një ditë pas qëndrimit në Kosovë të presidentit serb Boris Tadic, vendi i të cilit vazhdon ta kundërshtojë pavarësinë e saj.

Dërgo me email | Stampo artikullin | Artikulli është lexuar 305 here