12/12/2009 4:17:07 PM

Peshëngritësi i talentuar Erkand Qerimaj, kampion Europe

Kur ishte vetëm 14 vjeç dhe peshonte 49 kg, por plot muskuj, Erkand Qerimaj u shpall kampion i Europës në Kampionatin Europian të zhvilluar në Nicë të Francës.

12 Dhjetor 2009
info@hermesnews.org

HN/TRT - Kur ishte vetëm 14 vjeç dhe peshonte 49 kg, por plot muskuj, Erkand Qerimaj u shpall kampion i Europës në Kampionatin Europian të zhvilluar në Nicë të Francës.

Ishte gushti i vitit 2002. Atëherë një billboard i madh me imazhin e shkodranit të vogël, në majën e podiumit me flamurin shqiptar hedhur pas krahëve, u vendos në bulevardin “Dëshmorët e Kombit” tek ura pranë Hotel “Dajti”, duke fituar admirimin e të gjithëve, por dhe duke dhënë sinjalin se një kampion tjetër i madh i shtangës po i vinte Shqipërisë.

Sot, 21 vjeçari Qerimaj, student në vitin e katër për Drejtësi në Universitetin “Marin Barleti” është dhe peshëngritësi shqiptar që ka koleksionuar më shumë medalje në aktivitetet ndërkombëtare: në kampionate europiane e botërore.

“Janë 26 të tilla dhe ndihem me të vërtetë krenar për gjithçka kam arritur. Është fryt i një punë të jashtëzakonshme dhe tepër të lodhshme. Të punosh me hekurat kërkon sakrifica të mëdha fizike dhe angazhim të madh”, flet me emocion Qerimaj.

Kampioni i shumëfishtë ka nisur tepër i vogël të provojë “shijen e ftohtë” të boshtit të shtangës qysh në moshën 10 vjeç. “Në fakt, Shkodra ka pasur shumë peshëngritës të mirë dhe kam pasur idhujt e mi. Kur ishim të vegjël, në palestër kishim një peshëngritës shumë të mirë, Renato Sylkjan. Por dhe Hasim Belinova e Faruk Kalleshi kanë pasur rezultate shumë të larta për kohën e tyre”.

Qerimaj është shtangisti i vetëm shqiptar që mban mbi shpinë dy rekorde botërore për të rinj: medalja e parë e artë e marrë në Austri, në maj të vitit 2002, ku garoi në peshën 50 kg në “Fulda International Meeting”, duke ngritur 175 kg nëdygarësh dhe tre muaj më pas, në Kampionatin Europian U-16 të zhvilluar në Francë, gusht 2002, Qerimaj u shpall kampion i Europës, duke ngritur 75 kg në shtytje, 102.5 kg në shkëputje, 177.5 kg në total.

“Ishte një ndjenjë tepër e veçantë, se isha vetëm 14 vjeç. U shpalla kampion Europe dhe po ngrija flamurin shqiptar. Një moment që nuk do ta harroj kurrë”, shprehet Qerimaj.

Pas një viti, në gusht 2003, në Dortmund (Gjermani) për Kampionatin Europian U-17, ai fiton 3 medalje të arta në kategorinë deri në 56 kg. Seriali i medaljeve vazhdon në Norvegji, për Europianin U-17, ku fiton 3 medalje bronzi. Në 2005-n, në Sofia të Bullgarisë, po për U-17, fiton 3 medalje argjendi dhe po atë vit, në Trençin të Sllovakisë për Kampionatin Europian për të Rinj zuri vendin e dytë, duke marrë 2 medalje argjendi.

2006-a është sërish vit suksesi për shkodranin 18 vjeçar: vendi i dytë në Kampionatin Botëror për të Rinj të zhvilluar në Pekin, dhe i shoqëruar me 1 medalje të artë në shkëputje e 1 medalje argjendi në dygarësh.

Në vitin 2007 përsëritet e njëjta “skenë”, por kësaj radhe në Çeki: vendi i dytë në Kampionatin Botëror për të Rinj, dhe i shoqëruar me 1 medalje të artë në shkëputje (kampion bote, 175 kg në shtytje) e 1 medalje argjendi në dygarësh.

2008-a ofron një tjetër medalje argjendi për Qerimaj në Kali të Kolumbisë, po për Kampionatin Botëror për të Rinj: 185 kg në shtytje në kategorinë e peshës 77 kg. “Edhe pse isha i mësuar tashmë me medalje, gjithmonë i kam përjetuar me një ndjenjë të veçantë gëzimi dhe krenaria medaljet, pasi në të vërtetë ato janë synimet e çdo sportisti”, thotë Qerimaj, dy herë nënkampion i botës për të rinj, në vitin 2006 dhe në vitit 2007

Në fakt, rezultati më i mirë i Erkand Qerimaj, si peshë të ngritur (jo si renditje) në dy-garësh është 345 kg, i arritur pikërisht në Kampionatin Europian për të rritur, zhvilluar vjet në Lignano (Itali) pavarësisht se nuk fitoi medalje, pasi u rendit i katërti, por duke pasur kundërshtarë të mëdhenj: dy rusë (vendi i parë, 362 kg dhe i tretë, 355 kg) e një armen (vendi i dytë, 361 kg).

Në Lojërat Olimpike “Pekin 2008” Qerimaj garoi në peshën deri në 77 kg, duke u renditur i 13-ti në planet duke ngritur në dygarësh 341 kg. Peshëngritësi i ri thotë se nuk ka një model të veçantë. “Sporti ynë ka traditë në peshëngritje dhe kjo vlen jo pak për sportistët, pasi kanë përpara tyre shembuj dhe arritje. Faktikisht nuk kam model. Më pëlqen karakteri dhe të gjitha gjërat që bëj vetë", shton Qerimaj, i cili në Kampionatin Europian për të rinj në Durrës 2008, fitoi tre medalje ari: 151 kg në shtytje, 185 në shkëputje, 336 në dygarësh, duke u shpallur edhe sportisti më i mirë i aktivitetit.

Peshëngritësi shqiptar Erkand Qerimaj u shpall vjet kampion i trefishtë i Europës në Kampionatin e 34-t Europian të Peshëngritjes për të Rinj, duke fituar tri medalje të arta në stilin e shkëputjes, shtytjes dhe në dygarësh, duke mos pasur asnjë rival në peshën 77 kg ku konkurron. Ndërsa 2009-a shton në gjoksin e Qerimajt edhe dy medalje të tjera, 1 ari dhe 1 argjendi në Kampionatin Europian për të Rritur në Bukuresht të Rumanisë. Edhe në Lojërat Mesdhetare “Peskara 2009”, ai ka rrëmbyer 1 medalje ari dhe 1 medalje argjendi.

Në nëntor Qerimaj, së bashku me 2 peshngritës të tjerë shqiptar, Ervis Tabaku dhe Romela Begaj, mori pjesë në kampionatin Botëror të Peshëngritjes të zhvilluar në Gojang të Koresë së Jugut.

“Gara në Kampionatin Botëror ka qenë tepër e fortë, me rivalitet të madh, por mund të them se u kurorëzua me sukses. Jam shumë i kënaqur me rezultatin e arritur, pra me vendin e shtatë, ku ngrita 156 kg në stilin e shkëputjes dhe 193 kg në stilin e shtytjes. Për mua ka qenë sukses, pasi në pedanë u ngjitën peshëngritësit më të mirë për momentin, përfshirë këtu rekordmenë bote dhe kampionë olimpikë”, tregon peshëngritësi shkodran, Erkand Qerimaj.

26 medalje në total kanë krijuar një “muze” të vogël në shtëpinë e djaloshit shkodran, ku vetë Qerimaj veçon ndër to. “Medalja e parë e artë në Francë ka vendin e saj, por më të rëndësishmet janë ato në kampionatet botërore të rinjve, në Lojërat Mesdhetare të Peskarës, në Kinë, Pragë dhe Kolumbi për të rinjtë e në Rumani e Peskara për të rritur”, shprehet i lumtur Qerimaj.

Por kënaqësinë më të madhe shkodranit 21 vjeçar ia kanë dhënë rekordet e thyera. “Në vitin 2005 kam thyer dy rekorde europiane për paratërinjtë, pasi atëherë nuk ka pasur kampionate botërorë, por ajo që më jep më shumë krenari është fakti që kam thyer edhe dy rekorde botërore për të rinj. Këto janë të vetmet për Shqipërinë. Këto rekorde janë të regjistruar edhe në faqen zyrtare të Federatës Ndërkombëtare të Peshëngritjes”, tregon me krenari Erkand Qerimaj.

HermesNews - ©2009

Dërgo me email | Stampo artikullin | Artikulli është lexuar 686 here