12/10/2009 2:04:33 PM

Cdo gje gati per zgjedhjet e balotazhit ne Kosove

Gati faza e dyte e votimeve ne Kosove

info@hermesnews.org
10 Dhjetor 2009

PRISHTINE- Në prag të mbajtjes së raundit të dytë të zgjedhjeve lokale në Kosovë, Komisioni Qendror i Zgjedhjeve thotë se nuk do të lejojë përsëritjen e parregullsive që kanë ndodhur në rrethin e parë të votimeve. Kryetarja e KQZ-së, Nesrin Lushta tha se përgatitjet për mbajtjen e zgjedhjeve të 13 dhjetorit, kanë hyrë në fazën përfundimtare dhe ato premtojnë për një proces të rregullt zgjedhor. “Ne jemi të përkushtuar dhe kemi bërë të gjitha përgatitjet e duhura në mënyrë që zgjedhjet e raundit të dytë për kryetar komune të jenë të lira dhe sipas standardeve ndërkombëtare”, u shpreh zonja Lushta.

Janë 21 komuna të Kosovës nga gjithsej 36, në të cilat të dielën qytetarët do t’u drejtohen kutive të votimeve për të zgjedhur kryetarin e komunës. Balotazhi do të zhvillohet në të gjitha qendrat ku në rrethin e parë të votimeve më 15 nëntor, asnjëri nga kandidatët nuk arriti të marrë më shumë se 50 përqindëshin e votave. Në garën e së dielës do të jenë nga dy kandidatë që pretendojnë të marrin pushtetin në komunat përkatëse. Nga qendrat e mëdha, balotazhi do të zhvillohet në Prizren, Mitrovicë, Gjilan e Pejë, ku edhe gara është më e fortë.

Partia Demokratike e Kosovës prin për nga numri i kandidatëve që garojnë në zgjedhjet e së dielës, pasuar nga Lidhja Demokratike, Aleanca për Ardhmërinë e Kosovës dhe koalicioni AKR-LDD. Janë, poashtu, edhe dy kandidatë nga subjektet politike serbe për komunën e Shtërpcës dhe atë të Novobërdës. Fushata parazgjedhore ka hyrë në ditët e fundit të saj dhe deri tani ajo ka kaluar pa incidente.

Garë e fortë në balotazh

Gara për raundin e dytë të votimeve është bërë më e fortë, për shkak të lëvizjeve të shumta që kanë ndodhur në kuptimin e pozicionimit të elektoratit. Dy ngjarje që kanë ndodhur ndërmjet dy raundeve të votimeve, siç ishte zhvillimi i papritur për prishjen e koalicionit PDK-LDK dhe rasti “Bllaca”, duket se kanë ftohur marrëdhëniet ndërmjet partnerëve të koalicionit aktual të nivelit qëndror, d.m.th. partisë së kryeminitrit dhe partisë së presidentit, duke krijuar një klimë tjetër për koalicione të reja.

Kjo ka bërë që kandidatët e PDK-së në Gjilan ose në Prizren edhe pse me një distancë të ndjeshme votash në raundin e parë, ta rrezikojnë fitoren në raundin e dytë, pikërisht për shkak se ata tash përballen me kandidatë që mbështeten nga koalicione më të forta.

Ndoshta koalicioni më i ndjeshëm është ai ndërmjet LDK-së dhe AAK-së. Këto dy parti i kanë zyrtarizuar koalicionet në Prizren, në Gjilan, në Dragash, ndërkohë që ka një koalicion të heshtur edhe për komuna të tjera, sadoqë atje nuk janë zyrtarizuar.

Ky koalicion ndoshta mund të prodhojë rezultate të tjera në raundin e dytë. Në raundin e parë të zgjedhjeve, në votime kanë dalë rreth 45 për qind e elektoratit, por rreth 10 për qind e votave janë anulluar dhe kjo i bie që pushtetet nëpër komuna do të vendosen me 40 për qind të elektoratit. Besohet se në raundin e dytë ky numër do të jetë akoma më i vogël.

Thirrje për proces të qetë zgjedhor

Komisioni Qendror i Zgjedhjeve ka marrë mbështetjen e institucioneve të Kosovës dhe të përfaqësuesve të trupit diplomatik në Prishtinë për organizimin e zgjedhjeve. Presidenti Fatmir Sejdiu gjatë një vizite që i bëri organit të zgjedhjeve, tha se me mbajtjen e votimeve të para pas pavarësisë, Kosova ka kapërcyer një sprovë të madhe të demokracisë, duke ruajtur imazhin e mirë edhe në sytë e bashkësisë ndërkombëtare.

Presidenti madje shfaqi besimin se raundi i dytë i votimeve do të organizohet më me lehtësi dhe më mirë.“E bëmë mirë më 15 nëntor, sado që mund të ketë vërejtje që janë normale dhe janë pjesë e punës të KQZ-së, Komisionit për Ankesa dhe Parashtresa dhe eventualisht Gjykatës dhe kemi hyrë në obligimin e madh që më 13 dhjetor ta përfundojmë mirë ciklin e zgjedhjeve”.

“Unë besoj se do të jetë shumë më lehtë për disa arsye. E para, është bërë një verifikim i mirë i potencialit institucional për t’u përballur suksesshëm me sfidën dhe tani kemi një përvojë; e dyta, keni shënuar pjesët ku gjërat nuk kanë shkuar si duhet sipas vlerësimeve tuaja dhe mund të korrigjohen në proces; e treta, keni shënuar vendet ku eventualisht duhet investim më i madh që mos të ndodhin çështje që mund ta pengojë procesin”, u ka thënë anëtarëve të KQZ-së presidenti Sejdiu.

Ai, po ashtu, u ka bërë thirrje qytetarëve për pjesëmarrje sa më të madhe në zgjedhje, ndërsa ka theksuar rëndësinë që ato të jenë të lira dhe demokratike. Procesi zgjedhor është vlerësuar pozitivisht edhe nga përfaqësuesit diplomatik në Kosovë. Sipas ambasadorit amerikan, Christopher Dell, 13 dhjetori kur mbahet balotazhi, do të jetë një ditë tjetër e madhe për Kosovën.

“Vetëm pak javë më parë Kosova ka nisur një fushatë ndërkombëtare: Kosova-evropianët e rinj. Mendoj se më 15 nëntor dhe jam i bindur që edhe me 13 dhjetor ne do t’ia dalim dhe sllogani do të jetë: Kosova-evropianë të zotë dhe demokratikë. Mendoj se ua kemi borxh të gjithë juve një mirënjohje të madhe për kontributin që keni dhënë në ndërtimin e shtetit tuaj dhe që i keni demonstruar botës se çfarë është e aftë të bëjë Kosova”, është shprehur ambasadori amerikan në prag të raundit të dytë zgjedhor.

Ndërkaq ambasadori britanik, Andy Sparks e ka vlerësuar ecurinë e zgjedhjeve në Kosovë si një dëshmi të mirë për zhvillimin e demokracisë megjithëse, siç tha ai, ka ende gjëra që duhet të përmirësohen. “Nuk ka zgjedhje të përkryera, madje as në Mbretërinë e Bashkuar, por ishte me të vërtetë një arritje e mirë dhe jam i bindur që më 13 dhjetor do të përmbyllet një proces i kënaqshëm për përparimin demokratik të Kosovës”, tha zoti Sparks.

Vërejtjet e vëzhguesve ndërkombëtarë

Ndërkohë Misioni Ndërkombëtar për Vëzhgimin e Zgjedhjeve komunale në Kosovë (ENEMO), ka shfaqur shqetësimin e tij për shkeljet e procedurës dhe zgjatjen e procesit të publikimit të rezultateve të rrethit të parë të zgjedhjeve më 15 Nëntor. Në raportin që u cilësua si kalimtar, misioni i Këshillit të Evropës, që ka vëzhguar zgjedhjet e 15 Nëntorit, ka shënuar një numër shkeljesh në ditën e zgjedhjeve, përfshirë edhe fshehtësinë e votës dhe të procedurave zgjedhore.

Në raport thuhet se në një numër vendvotimesh janë lejuar veprime që nuk janë në përputhje me standardet ndërkombëtare, ndërkohë që vlerësohet se gabimet administrative dhe teknike në vendvotime, kanë ndikuar në përmbledhjen e gjatë dhe të lodhshme të procesit të rezultateve në Qendrën për Numërim.

ENEMO ka kritikuar Komisionin Qendror të Zgjedhjeve për mospërsëritjen e votimeve në 6 vendvotime, ku janë anulluar rezultatet. Misioni Ndërkombëtar për Vëzhgimin e Zgjedhjeve, do të vëzhgojë edhe rrethin e dytë të zgjedhjeve lokale në Kosovë më 13 dhjetor.

Veç tjerash, ai iu ka rekomanduar autoriteteve të vendit që në këtë rreth të kenë kujdes udhëzimet e qarta për votuesit, të mos lejojnë votime familjare që prishin standardet ndërkomëbatre dhe iu ka bërë thirrje atyre që të mos përdorin burimet administrative gjatë periudhës së fushatës për zgjedhjet. Misioni u vendos në Kosovë nga mesi i muajti tetor, me ftesë të presidentit të Kosovës, Fatmir Sejdiu. Në ditën e zgjedhjeve, mbi 100 vëzhgues ndërkombëtarë, pjesë e misionit, vëzhguan zgjedhjet komunale në Kosovë.

HermesNews - ©2009

Dërgo me email | Stampo artikullin | Artikulli është lexuar 446 here