11/26/2009 11:22:27 AM

Kujt i shërben?

Politika ka ngushtuar tej mase betejën në interesa dhe politika personale.

Doriana Metollari
drejtor@hermesnews.org
26 Nentor 2009

Ajo pjesë e arenës ndërkombëtare që nuk hesht, dmth ajo pjese e Europës qe vërtet e ka për zemër zgjerimin, la një mesazh shumë të qartë: ‘Nëse doni t’ju heqim kufijtë, lërini mënjanë format e vjetra të hasmërive dhe kthehuni dialogut politik!’

Mazhoranca shqiptare, ditët e para te protestave, i bëri thirrje opozitës të kthehej në Parlament dhe të ulej në bisedime; sot kundërpërgjigjet me protesta të tjera, çfarë ka rritur tensionin politik në vend.

Në kampin socialist, ujerat janë të turbullta, meqë brenda radhëve te saj, një grup deputetesh dolën hapur kundër kryesocialistit Rama dhe shprehën dëshirën të kthehen në Parlament.

I ndodhur përballë presioneve rozë, mazhorancës dhe ndërkombëtareve, PS hodhi poshtë çdo ftesë për t’u ulur në Parlament dhe vazhdon të kërkojë hapjen së kutive të votimit.

Nga ana tjeter Parlamenti Europian, pritet të votojë rezolutën e Komisionerit për zgjerim në Bashkimin Europian Olli Rehn, i cili ka kërkuar dhënien fund të tensionit politik, sepse kjo pengon shqiptarët të udhëtojnë pa viza brenda mesit të vitit të ardhshëm në vendet e Bashkimit Europian.

Dhe vete brenda Bashkimit Europian, ka shumë shtete që kanë kundërshtuar heqjen e kufijve për Shqipërinë (Ballkani Perëndimor) dhe këtyre vendeve, politika shqiptare po ua bën lojën dhe më të lehtë.








Nuk do të jetë e çuditshme, nëse Parlamenti sot do ti thotë ‘jo’ rezolutës, por nuk do te jete dhe aq e papranueshme sikur ajo ta miratoje atë. Loja po zhvillohet brenda kampeve te familjes europiane, të ndarë nga interesat e shteteve e cilat i përkasin.

Historikisht gurët janë lëvizur nga pak superfuqi botërore, por ne ditët tona roli i Europes po forcohet gjithnjë e me shume brenda skemës ndërkombëtare dhe ajo nuk do të jetë aq e predispozuar të bëhet garante për stabilitetin politik të vendit tone, nëse ne nuk tregojmë se jemi të aftë për dialog politik.

Por nuk dua t’i kërkoj arsyet shumë larg, sepse sot jemi ne qe kemi një problem dhe këtë duhet ta pranojmë. Nganjëherë politika jone, duket se nuk po merret me vendin. Ajo e ka ngushtuar tej mase betejën në interesa dhe politika personale.

Votat e shqiptareve mund te jene vjedhur, ose mund te mos jene vjedhur. Me këtë duhet te merren institucionet kompetente, ndryshe kot qe ekzistojnë... aq me tepër nuk është koha e protestave te dhunshme; nuk është koha e provokimeve. Krahët e hekurt që kanë filluar t’i tregojnë njëra-tjetrës opozita dhe pozita, nuk u shërben qytetareve.

Do ta kisha mbase me te lehte te thoja se opozita duhet te kthehet ne parlament, apo se mazhoranca, nuk ka vjedhur votat, por ne këtë mënyrë nuk do te beja politike editoriale neutrale.

Jemi ne vitin 2009. Europa po na i hap dyert. Shqiptaret këtë e meritojnë. Por, u duhen liderë europian, ndaj lërini hasmëritë zotërinj kushdo qofshi sepse qytetarët ju zgjodhën ju.

Nuk mund të jeni gjithë mazhorancë, roli i opozitës është vital për një shtet demokratik. Mos harroni se keni në dorë fatin e një kombi i cili ka një ëndërr te vetme: të ndjehet i barabarte me të tjerët dhe ju nuk e keni atë luks të gaboni përsëri...





Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 479 here